سنڌ جي وسيلن جي نيلامي ۽ ڦرلٽ

صاحب خان ڀٽي

سنڌ صوفين ۽ اوليائن جي ڌرتي آهي، جنهن کي  مالڪ قدرتي وسيلن  سان مالا مال ڪيو آهي، جنهن سبب سنڌ جي دشمنن جون نظرون  سنڌ جي وسيلن  تي رهنديون آهن، پيٽرول، گئس ۽ ڪوئلو تي به اختيار رڳو وفاق جو آهي، 1973ع کان سنڌ تي حڪمراني ڪندڙ پارٽي به سنڌ جي وسيلن تي خاموش آهي، سنڌ جا ٻيٽ توڙي زميون وڪرو ڪرڻ جو به سلسلو جاري آهي، سنڌي قوم کان ووٽ وٺي اقتدار جا مزا ماڻيندڙ حڪمران قدرتي وسيلن جي ڦرلٽ ۾ شامل رهيا آهن، ڪڏهن ٻٽو نظام ته ڪڏهن وري ڪراچي ڪميٽي جهڙيون سازشون به اسان کان ووٽ وٺي اقتدار ۾ ايندڙن جا تحفا آهن، ڪراچي کان ڪشمور تائين سنڌ  کي ڪالوني بڻايو ويو آهي ۽ ان ڪالوني جو سردار هڪ سياسي ٽولي کي مقرر ڪيو ويو آهي، جيڪو هر وقت سنڌ سان ٿيل سازشن تي خاموش رهي ٿو، هونئن ته ٻيٽن تي قبضي جي شروعات اڳوڻي آمر جنرل پرويز مشرف جي  دور کان شروع ٿي وئي هئي، پر ان کي عملي جامو پرائڻ لاءِ سنڌ سرڪار اين او سي جاري ڪئي، جڏهن سنڌ جي ٻيٽن تي قبضو ٿي ويو ۽ هٿياربند جٿو مقرر ڪيو ويو ۽ سنڌي قوم جي هٿيارن جي زور تي رستا روڪ ڪئي وئي ته ان وقت لڳو ته واقعي پاڻ کي سنڌي سڏرائي ووٽ وٺي اقتدار حاصل ڪندڙن ئي سنڌي قوم سان ايڏي وڏي زيادتي ڪئي آهي، سنڌي قوم جي سخت احتجاج کانپوءِ پيپلزپارٽي اين او سي ته واپس وٺي ڇڏي پر سندن ٻيٽن تي وڏا شهر اڏڻ وارا بيان اڄ به رڪارڊ تي آهن، سڀني کي خبر آهي ته جڏهن ٻيٽن تي وڏا شهر ٺهيا ته سنڌ حڪومت جو ان تي ڪو به اختيار نه رهندو، ايتري قدر جو سنڌي قوم اقليت ۾ تبديل ٿي ويندي ۽ سنڌين سان فلسطينن کان برو حشر ٿيندو، جڏهن پيپلزپارٽي چيئرمين بلاول ڀٽو زرداري ٻيٽن واري معاملي تي يوٽرن ورتو ۽ سنڌي قوم جي احتجاج تي ٻيٽن تي کيس بيان ڏيڻو پيو، ان وقت انهن وزيرن کي ڪجهه محسوس ضرور ڪرڻ گهرجي ها ته سندن پارٽي جو سربراهه ٻيٽن تي والار خلاف بيان ڏئي رهيو آهي ۽ هو سڄو ڏينهن چينل تي ويهي ٻيٽن تي شهر اڏڻ واري معاملي کي سنڌي قوم جي ترقي جا راڳ الاپي رهيا هئا.

1973ع کان اقتدار  ۾ رهندڙ   سنڌ جا حڪمران بحريا ٽائون، ذوالفقار آباد ۽  ٻين سنڌ دشمن رٿائن جا حامي بڻيل رهيا آهن، ايتري قدر جو سنڌ جي سون  جهڙي زمين کي  ڀڳڙن مٺ وڪرو ڪيو ويو، جڏهن سپريم ڪورٽ نوٽيس ورتو ته ان وقت  سنڌ جي حڪمرانن جون ننڊون حرام ٿي ويون هيون، پر جڏهن سپريم ڪورٽ بحريان ٽائون کان 4 سئو کان وڌيڪ ارب وصول ڪيا ته ان وقت سنڌ جي حڪمرانن جي پيٽ ۾ سور پئجي ويو ته اهي سنڌ جا پئسا آهن، سپريم ڪورٽ کي گهرجي ها ته سستي زمين وڪرو ڪندڙن کي قانون جي ڪٽهڙي ۾ آڻي ها ته خبر پئجي وڃي ها ته بلڊر مافيا  تي ڪير مهربان ٿي رهيو آهي، ظاهر ڳالهه آهي ته ڪراچي ۾ جيڪي سنڌي وسنديون ڊاٿيون پيون وڃن، اهي به سنڌ جي حڪمرانن جي آشير وارد سان ڊاهيون پيون وڃن، نه ته ٻئي کي ڪهڙي همت ته ڌرتي ڌڻين کي بي گهر ڪري. جيڪڏهن ڏٺو وڃي ته ڪراچي ۾ افغانين جون وڏيون وڏيون بستيون قائم آهن، جتي سيڪيورٽي ادارن جي وڃڻ جو سوال ئي پيدا نه ٿو ٿئي، ڪراچي ۾  اڪثر دهشتگرد ڪاررواين ۾ به اهي افغاني شهري ملوث هوندا  آهن،  ڪجهه ڏينهن اڳ سوشل ميڊيا تي هڪ وڊيو وائرل ٿي، جنهن بابت ٻڌايو پيو وڃي ته ڪراچي ۾ ريلوي جي زمين تي افغاني شهرين قبضو ڪري ورتو آهي، جنهن کي پوليس ختم ڪرائڻ لاءِ پهتي ته پوليس اهلڪارن مٿان پٿرن جو وسڪارو ڪيو ويو، ايتري قدر جو ان  ويڊيو ۾  پوليس جي موبائل وينن  کي نقصان پهچايو پيو وڃي، پوليس اهلڪارن کي ڀڄندي ڏسي سگهجي ٿو، افسوس جي ڳالهه آهي ته جڏهن به سنڌي پنهنجي  حقن لاءِ احتجاج ڪندا آهن ته اهي ئي اهلڪار سڌيون گوليون هلائيندا آهن، ڪراچي  ۾ فيڪٽرين مان بي دخل  ٿيل پورهيت جڏهن احتجاج ڪن ته اهي ئي پوليس اهلڪار انهن تي ايئن تشدد ڪندا آهن، جيئن اسرائيلي فوج فلسطينن تي ڪندي آهي، جڏهن سنڌي ڳوٺن کي ڊاٿيو ويندو آهي ته اهي ئي سيڪيورٽي ادارا هوائي فائرنگ به ڪندا آهن، شيلنگ به ڪندا آهن،  رڳو ڪراچي نه پر سکر تائين سنڌين کي بي گهر ڪري انهن کان روزگار کسيو پيو وڃي ته جيئن سنڌي قوم پنهنجي پيرن تي نه بيهي سگهي ۽ هو پنهنجي ناپاڪ مقصدن ۾ ڪامياب ٿي وڃن، سوچڻ جي ڳالهه آهي ته ڪراچي، سکر، دادو، لاڙڪاڻو ۽ ٻين شهرن ۾ رڳو سنڌين جا گهر ڇو پيا ڊاٿيا پيا وڃن، افغاني، بنگالي، بيهاري، پنجابي ۽ پٺاڻن جا گهر ڇو نه پيا ڊاٿيا وڃن، سنڌ جا وارث اسان سنڌي آهيون يا وري  اهي ڌاريا آهن، پيپلزپارٽي سنڌين  کان ووٽ وٺي اقتدار ۾ ايندي آهي، گهٽ ۾ گهٽ پيپلزپارٽي جي دور ۾ ته اهڙيون سازشون نه ٿيڻ گهرجن.

جيڪڏهن ڏٺو وڃي ته فلسطينن ۽  ڪشميرين سان به ايترو ظلم نه ٿيو هوندو، جيترو سنڌي قوم سان ٿي رهيو آهي، فلسطين  ۽ ڪشمير ۾ ماڻهن کي  کنڀي گم ڪرڻ جون خبرون اسان ڪڏهن به ناهن ٻڌيون، نه ئي انهن جو ڪو ليڊر کنڀيو ويو آهي نه ئي وري انهن ئي جيئرو ساڙي شهيد ڪيو ويو هو پر سنڌ ۾ ان کان به وڌيڪ خراب صورتحال آهي، ڪيترن ئي شاگردن کي کنڀي گم ڪيو ويو آهي، جن جو هيل تائين پتو ناهي پئجي سگهيو، ڪراچي مان ٻن ڀائرن کي کنڀي گم ڪيو ويو آهي، ڪو به ادارو انهن بابت ٻڌائڻ وارو نه آهي، کنڀي گم ڪيل نوجوانن ۽ شاگردن جا وارث سراپا احتجاج بڻيل آهن، جيڪڏهن ڪو قومپرست ٻيٽن تي غيرقانوني قبضي خلاف احتجاج ڪري ته انهن تي بغاوت جا ڪيس داخل ڪيا وڃن ٿا، آخر سنڌ سان ايترو ظلم ڇو پيو ڪيو وڃي، وسيلن تي هونئن به وفاق جو قبضو آهي، جن علائقن مان تيل، گئس ۽ ڪوئلو نڪري ٿو، اتان جي ماڻهن سان جيڪو ظلم ٿيو آهي، اها سڀني کي خبر آهي، مقامي ماڻهن کي روزگار ڏيڻ بدران ٻين صوبن کي ڏنو پيو وڃي، گئس سنڌ مان نڪري ٿي پر سنڌين کي نٿي ڏني وڃي، بجلي سنڌ ۾ ٺاهي وڃي ٿي پر ڪلاڪن جا ڪلاڪ لوڊشيڊنگ اسان وٽ ئي ٿئي ٿي. سنڌي شاگردن کي يونيورسٽين ۾ داخلائون ڏيڻ بدران پنجاب، خيبرپختونواهه ۽ افغانستان جي ماڻهن کي داخلائون ڏنيون پيون وڃن، ڪراچي يونيورسٽي کان ويندي ڪيترن ئي يونيورسٽين ۾ سنڌي شاگردن سان اهڙو ورتاءُ ڪيو پيو وڃي، جيئن ڀارتي ڪشميرين سان ڪندا آهن، سنڌي شاگردن کي هاسٽلز مان بي دخل ڪرڻ  ۽ داخلائون ڏيڻ وارن معاملن تي به  تعليم کاتي وارو وزير خاموش تماشائي بڻيل آهي، ايتري قدر جو پيپلزپارٽي چيئرمين بلاول ڀٽو زرداري کي سنڌ جي شاگرد جا احتجاج نظر نه پيا اچن، ڪراچي پريس ڪلب آڏو سنڌي شاگرد احتجاج تي ويٺل هئا ته ڪو به پيپلزپارٽي جو وزير سندن وٽ لڙي نه ويو، ڇا اهڙن حڪمرانن کي حڪمراني ڪرڻ گهرجي، جن کي سنڌي قوم جي ڪا ڳڻتي نه هجي، روز ڌارين کي خوش ڪرڻ ۾ لڳيا پيا هجن، ڌارين جو گٽر به بند ٿي وڃي ته سنڌ جو وڏي وزير آڌي رات جو روڊن تي اچي وڃي ٿو، پر جڏهن سنڌ جون نياڻيون پنهنجن پيارن لاءِ احتجاج ڪن ته وڏي وزير جي ڪن تي جونءَ به نه ٿي چري، ڌارين جي گهرن ۾ پاڻي نه اچي ته وڏو وزير فوري نوٽيس وٺي ٿو پر سنڌ جا آبادگار پاڻي نه هئڻ لاءِ ڪافي عرصي کان  سراپا احتجاج بڻيل آهن پر  سنڌ جي حڪمرانن کي اهو نظر نه ٿو اچي، ڇاڪاڻ ته انهن جي اکين تي پٽي ٻڌل آهي، اها پٽي جڏهن کلندي آهي، جڏهن اهي اقتدار کان ٻاهر هوندا آهن يا وري  کين جيل وڌو ويندو آهي، ان وقت انهن کي سنڌ ۽ سنڌي قوم سان ٿيل زيادتيون ياد اينديون آهن.

ٿر ۾ ڪوئلي جي کوٽائي جڏهن کان شروع ٿي آهي،  تنهن ڏينهن کان  ٿر جي سونهن متاثر ٿيڻ لڳي آهي، مور پکي، هرڻ ۽ ٻيا جانور گهٽجندا پيا وڃن، ايتري قدر جو ٿر جا ماڻهو لنگهه بند ٿيڻ خلاف سراپا احتجاج بڻيل آهن پر حڪومت چئي رهي آهي ته ٿر جي ماڻهن کي روزگار  سان گڏ انهن کي معاوضو به ڏنو ويو آهي، جيڪڏهن   انهن کي مناسب معاوضو ۽ روزگار ملي وڃي  ها ته اهي اڄ ڇو دربدر آهن، احتجاج ڇو ڪري رهيا آهن،  ٿر ۾ ڳوٺاڻا ٿر ڪمپنين پاران روڊ رستا بند ڪرڻ خلاف احتجاج ڪري رهيا آهن ته ڪراچي ۾ وري بحريا ٽائون جي ظلم خلاف  ڳوٺاڻا دانهون ڪري رهيا آهن پر مجال جو سنڌ جي حڪمرانن تي انهن جي دانهن پهچي. ٻڌڻ ۾ آيو آهي ته ٿر جي سونهن ڪارونجهر جبل  جي مائننگ جي اجازت ڏيڻ جو فيصلو ڪيو ويو آهي، اها اجازت ڪنهن ٻئي نه پر سنڌ جي وڏي وزير سيد مراد علي شاهه ڏني آهي. ٻڌڻ ۾ آيو آهي ته ڪارونجهر جي جبل جو پٿر ڪوئلي جي ڪمپنين جي روڊن ۽ ڊئمن تي استعمال ٿي رهيو آهي، ڪارونجهر جبل مقامي ماڻهن جي مٺي پاڻي جو واحد ذريعوآهي، پري پري کان ماڻهو ڪارونجهر جي سونهن ڏسڻ لاءِ ايندا آهن پر افسوس جو حڪومت تفريح ماڳن کي بچائڻ بدران انهن کي ختم ڪرڻ ۾ لڳي پئي آهي، سنڌ جي ٻيٽن کي به تفريح ماڳن ۾ تبديل ڪري سگهجي ٿو، وزيراعظم عمران خان ته قوم سان واعدو ڪيو هو ته ملڪ تفريح ماڳن کي هٿي وٺرائي ويندي پر سنڌ حڪومت ۽ وفاقي حڪومت ان جي ابتڙ ڪم ڪري رهي آهي، سنڌ جي ٻيلن کي ختم ڪيو ويو آهي، هاڻ قدرتي سونهن کي به مٽائڻ جون سازشون ٿي رهيون آهن، ٻيٽن تي قبضِي کانپوءِ  ڪارونجهر رينج جي ڪ لک 50 هزاري ايڪڙ ايراضي ۾ رينائيٽ پٿر جي کوٽائي  جي اجازت ڏيڻ وڏي زيادتي آهي. ايتري قدر جو ٿرپارڪر ضلعي ۾ گرينائيٽ ۽ صنعتون قائم ڪرڻ جي سفارش ڪئي وئي ، مطلب ته ٿر جي ماروئڙن تي اڃا وڏيون مشڪلاتون اچڻ واريون آهن، سنڌ جي ساڃاهه وندن ڪارونجهر جبل جي ڪٽائي روڪرائڻ جو مطالبو ڪيو آهي پر ان باوجود سنڌ سرڪار ان معاملي کي سنجيدگي سان نه پئي وٺي.جيئن ته ڪارونجهر جبل اثاثو  آهي، جنهن کي بچائڻ لاءِ هڪ ڀيرو ٻيهر سنڌي قوم جدوجهد جو اعلان ڪيو آهي پر  انهيءَ جدوجهد جو  سنڌ سرڪار تي ڪو اثر پوندو يا نه اهو ته وقت ئي ٻڌائندو، جيئن سنڌ جي ٻيٽن  واري معاملي تي سنڌ جي حڪمرانن کي يوٽرن وٺڻو پيو هو. هن وقت روحاني پيشوا سائين پيرپاڳاري کي ئي ميدان تي لهڻو پوندو ، قومپرست ڌرين کي هڪ پليٽ فارم تي گڏ ڪري سنڌ جي وسيلن جي ڦرلٽ کي روڪرائڻو پوندو، هن وقت سنڌ نازڪ صورتحال کان گذري رهي آهي، روز ڪو نه ڪو سنڌ دشمن فيصلو سامهون اچي رهيو آهي، جيڪڏهن هن وقت ڪو قومپرستن کي متحد ڪري سگهي ٿو، ته اهو پير سائين پاڳارو ئي آهي، سنڌي قوم سان زيادتيون وڌيون ويون آهن، جيئن وفاقي سرڪار خلاف پي ڊي ايم ٺهي آهي، ايئن فنڪشنل ليگ هڪ اتحاد جوڙي، جنهن ۾ سمورين قومپرست ڌرين کي شامل ڪيو وڃي ۽ مڪاني چونڊن ۾ ان جو سنڌ سان زيادتيون ڪندڙ حڪمرانن کي جواب ڏنو وڃي ته جيئن سنڌ خوشحال ٿي سگهي ۽ سنڌي قوم کي پنهنجا حق ملي سگهن.

Daily Sukaar Best Sindhi Articles by Sahib Khan Bhatti

 

Daily Sukaar Best Sindhi Articles by Sahib Khan Bhatti

 

Daily Hilal e Pakistan, Best Sindhi article by Sahib khan bhatti

 

Daily Pak Best Sindhi Articles by Sahib Khan Bhatti

 

Daily Sindh Hyderabad Best Sindhi Articles by Sahib Khan Bhatti

 

Daily Sindh Hyderabad Best Sindhi Articles by Sahib Khan Bhatti

 

Daily Sindh Hyderabad Best Sindhi Articles by Sahib Khan Bhatti

 

Daily sindh Best Sindhi Articles by Sahib Khan Bhatti

 

Daily Hilal e Pakistan, Best Sindhi article by Sahib khan bhatti

 

Daily Appeal karachi Best Sindhi Articles by Sahib Khan Bhatti

 

گستاخ فرانس خلاف مسلمانن جو رد عمل

صاحب خان ڀٽي

آمريڪا ۽ چين پاڻ کي دنيا ۾ سپر پاور ملڪ مڃرائڻ لاءِ ڏينهن رات هڪ ڪري ڇڏي آهي، ٻئي ملڪ هڪٻئي جو سامهون آهن پر چين اقتصادي طور آمريڪا کان وڌيڪ مضبوط ٿيندي نظر اچي رهيو آهي، آمريڪي شهرين جا بينڪ اڪائونٽ چين جي بينڪن ۾ به هئڻ جو انڪشاف ٿيو آهي، برطانيا ۽ فرانس سميت ڪيترن ئي غير  مسلم ملڪن جون نظرون مسلمان ملڪن مان نڪرندڙ تيل ۽  ٻين معدني وسيلن تي آهن، مصر، عراق، شام ۽ افغانستان ۾ ٿيل تباهي به وسيلن تي قابض ٿيڻ جي  هڪ ڪڙي آهي، جنهن سبب اهي سمورا غير مسلم ملڪ مذهب جي غلط تشريح ڪري دنيا ۾ مسلمانن کي بدنام ڪرڻ جي ڪوشش ڪندا رهيا آهن، سڄي دنيا کي خبر آهي ته  دهشتگرد ڪنهن تيار ڪيا ۽ انهن کي وري ڪيئن آمريڪالاءِ خطرو قرار ڏئي ختم ڪيو ويو.

جيڪڏهن ڏٺو وڃي ته افغانستان، مصر، عراق ۾ ٿيل تباهي پٺيان به سپر  پاور ملڪ آهي،  انهيءَ تباهي ۾ لکين  بي گناهه ماڻهن کي شهيد ڪيو ويو، افغانستان ۾ به آمريڪي فوج ۽  طالبان وچ ۾ مقابلو هلي رهيو آهي،جنهن ۾ طالبان ۽ آمريڪا کي ڪو خاص نقصان ٿيو آهي،  رڳو غريب ماڻهو  ئي مري رهيا آهن، بي گهر به ٿيا آهن ته رڳو غريب عوام ئي ٿيو آهي، ڪڏهن آمريڪي فوج جي بمباري ۾ غريب ماڻهو وري ويندا آهن ته ڪڏهن وري دهشتگردن جو نشانو بڻجي ويندا آهن، فلسطين ۾ وري اسرائيل ظلم ڪري رهيو آهي، پر ان باوجود مسلمان ملڪ هڪ نه ٿيا پر هاڻ ڳالهه وڌندي پئي وڃي، غير مسلم ملڪ پيغمبرن جا گستاخ خاڪا جاري ڪري مسلمان کي جنگ ڪرڻ جي دعوت ڏئي رهيا آهن،  جنهن جي شروعات  ڊينمارڪ ٿي وئي هئي پر هاڻ فرانس ان کي اڳتي وڌائي رهيو آهي. پاڻ کي سيڪولر سڏرائيندڙ فرانس جنهن باهه کي ٻاري رهيوآهي، اها سندس لاءِ وڏي خطرناڪ ثابت ٿيندي، فرانس کي مسلمانن جي جذبن سان کيڏڻ نه گهرجي ها. 

ٻڌڻ ۾ آيو آهي ته فرانس جي گادي واري شهر  پيرس ۾ هڪ استاد شاگردن کي گستاخ خاڪا ڏيکاريا هئا، جنهن کانپوءِ هڪ شخص انهيءَ استاد کي قتل ڪري ڇڏيو، فرانسيسي صدر ايمنوئل ميڪخوان  به واقعي هنڌ جو دورو ڪيو، جنهن کانپوءِ مسلمانن خلاف هڪ وڏو آپريشن شروع ڪرڻ جو فيصلو ڪيو ويو، فرانسيسي صدر اسلام مخالف بيان ڏيندي چيو ته ڪجهه به ٿي پئي پر هو ڪارٽون ٺاهڻ وارو سلسلو بند نه ڪندا، سوشل ميڊيا تي خبرون هلي رهيون آهن ته  پيغمبرن جي گستاخي ڪندڙ استاد جي قتل کانپوءِ فرانسيسي حڪومت مسلمانن لاءِ رڻ ٻاري ڏنو آهي، اتي ماڻهو پاڻ کي غير محفوظ سمجهي رهيا آهن، فرانسيسي صدر استاد جي قتل جي واقعي جو نوٽيس ته ورتو پر ان جو نوٽيس نه ورتو ته آخر گستاخ خاڪا  ڇو ۽ ڇا لاءِ ٺاهيا پيا وڃن ۽ ڇو  ڏيکاريا پيا وڃن؟، اهڙي واقعي کانپوءِ فرانسيسي حڪومت 120 هنڌن جي تلاشي وٺڻ جو به فيصلو ڪيو آهي، جتي به مسلمان رهندا آهن، انهن علائقن جي سختي سان نگراني ڪئي ويندي، ڪجهه تجزيه نگارن جو چوڻ آهي ته فرانس ۾ 2022ع ۾ صدارتي چونڊون ٿيڻ واريون آهن، جنهن سبب ايمينوئيل مذهب جي اوٽ وٺي ماڻهن کي وڌيڪ ڀڙڪائي رهيو آهي، ته جيئن پنهنجي مقصدن ۾ ڪامياب ٿي وڃي.

آمريڪا ۾ به صدارتي اليڪشن ٿيڻ وڃڻ واريون آهن، جنهن جا دنيا تي به اثر پوندا، ظاهر ڳالهه آهي، جڏهن به آمريڪا ۾ چونڊون ٿينديون آهن ته مسلمان ملڪن لاءِ هڪ نئين آفت ضرور ايندي آهي، ڪڏهن مصر، ڪڏهن عراق ته ڪڏهن ڪري وري افغانستان جهڙن ملڪن تي ٿيل ڪارروايون اسان ڏسي چڪا آهيون، هاڻ ڏسڻو اهو آهي ته آمريڪي اليڪشن کانپوءِ ڪهڙي مسلمان ملڪ جو وارو اچي ٿو، اهو ممڪن ئي نه آهي ته ڪنهن ملڪ خلاف ڪارروائي نه ٿئي يا وري مذهبي دهشتگردي جو جواز بڻائي ڪارروائي ڪئي وڃي، هونئن به آمريڪا عرب ملڪن تي ڏينهون ڏينهن اسرائيل کي تسليم ڪرڻ جو دٻاءُ وڌائي رهيو آهي ۽  ڪجهه عرب ملڪن اسرائيل کي تسليم ڪري دوستي جو هٿ به وڌائي ڇڏيو آهي، اهڙي صورتحال دوران فرانس ۾ اسلامي فوبيا پکڙجڻ سان آمريڪا پنهنجي مقصدن ۾ ڪامياب ٿي ويندو، هن وقت آمريڪا جو دٻاءُ سعودي عرب تي آهي، پوءِ  ٻين جو وارو به ايندو، پر پاڪستان ۾ حالتون ٿورو مختلف آهن، جتي حڪمران چاهين به ايئن نه ٿا ڪري سگهن. آمريڪا جي ڪوشش هوندي ته فرانس کي مسلمانن خلاف وڌيڪ ڪارروائن لاءِ ڀڙڪائي ته جيئن هو عرب ملڪن تي اسرائيل کي تسليم ڪرڻ جو دٻاءُ  وجهڻ ۾ ڪامياب ٿي وڃي، اهڙي ڳمڀير  صورتحال ۾ صرف هڪ ئي ملڪ اهڙو آهي جو آمريڪا ۽ ٻين ملڪن کي هر وقت جواب ڏيڻ لاءِ تيار هوندو، ترڪ صدر رجب طيب اردگان فرانسيسي صدر جي اهڙي عمل کي مسلمانن خلاف سازش قرار ڏنو آهي ۽ دنيا جي مسلمان ملڪن کي فرانسيسي شين جو بائيڪاٽ ڪرڻ جي اپيل ڪئي آهي، ڪجهه عرب ملڪن ۾ فرانسيسي شين جو بائيڪاٽ ٿي چڪو آهي،  ڪويت ۾ فرانسيسي پراڊڪٽس کي اسٽور تان هٽايو ويو. فرانسيسي صدر توهين جوڳي ۽ مسلمان مخالف قدمن، کان پوءِ اسلامي دنيا طرفان سخت رد عمل سامهون اچي ويو آهي. پر ان باوجود  فرانسيسي صدر مسلمان ملڪن کان معافي ناهي گهر نه ئي پنهنجو بيان واپس ورتو آهي.

جيئن ته فرانس ۾ گستاخ خاڪن کان پوءِ سڄي دنيا جا مسلمان هڪ آواز ٿي ويا آهن پر سعودي عرب هيل تائين ڪنهن وڏي احتجاج جي خبر ناهي پهتي، رڳو ترڪي، بنگلاديشن، عراق، مصر، پاڪستان ۽ ڀارت ۾ فرانس خلاف احتجاج جو سلسلو شروع ٿي ويو آهي. بنگلاديش ۾ لکين ماڻهو فرانسيسي صدر جا پتلا ٺاهي انهن کي باهيون ڏئي پنهنجي ڪاوڙ جو اظهار ڪري رهيا آهن، پاڪستان رڳو  فرانيسي سفير کي سڏائي پنهنجو احتجاج رڪارڊ ڪرايو آهي پر اسان جي  حڪمرانن کي هن حساس معاملي تي رڳو احتجاج نه پر فرانس جي سفير کي نيڪالي ڏيڻ گهرجي ها پر افسوس جو اسان جي حڪمرانن ايئن نه ڪيو، ايران، قطر، او آو آءِ سي ۽ عرب ملڪن جي تعاون ڪائونسل طرفان به سخت مذمتي بيان جاري ڪيا ويا آهن، جڏهن ته اسلامي دنيا ۾ فرنچ شين جو بائيڪاٽ ٽاپ ٽرينڊ بڻجي ويو.

ان ڳالهه ۾ ڪو شڪ نه آهي ته غير مسلم ترقي يافته ملڪ اڄڪلهه مسلمانن خلاف مهم هلائي رهيا آهن، جيڪي ڏينهن رات مسلمانن خلاف سازشن ۾ رڌل آهن، ڳرا هٿيار به رڳو مسلمان ملڪن تي ئي استعمال ڪيا پيا وڃن، عراق ۾ ڪهڙي طرح غير مسلم ملڪن تباهي آندي، مصر  ۽ شام ۾ ڪيئن معصوم ٻارڙن کي شهيد ڪيو ويو، اها ڳالهه ڪنهن کان لڪيل نه آهي، هاڻ  وري ڊنمارڪ کانپوءِ فرانس ۾ پيغمبرن جا گستاخ خاڪا ڇاپي مسلمانن  خلاف  ويڙهه جو اعلان ڪيو ويو آهي، ان سان دنيا ۾ امن ڪامياب ٿئي يا نه ٿئي ؟ پر ايترو ضرور چوندس ته فتح مسلمانن  جي ٿيندي، غيرتمند مسلمان ڪڏهن  به پنهنجي پيغمبرن جي گستاخي برداشت نه ٿو ڪري سگهي، ترڪ صدر رجب طيب اردگان به چيو آهي ته مسلمانن خلاف مهم  هلي رهي آهي، جيڪا ٻي جنگ عظيم ۾ يهودين خلاف هلائي وئي هئي، جيئن ته هن وقت سڄي دنيا جا مسلمان هڪ آواز ٿي ويا آهن، انهن ملڪن جا حڪمران به گوڏا کوڙي ڇڏيا آهن، کين احتجاج ڪرڻو پئجي رهيو آهي، نه ته  رڳو  ترڪي ئي واحد ملڪ  هو، جنهن سڀ کان پهرين اهڙي ڪڌي عمل جي مذمت ڪئي ۽ ان جو مقابلو ڪرڻ جو اعلان ڪيو، جنهن کانپوءِ مسلمان ملڪن ۾ فرانس خلاف احتجاجن جو سلسلو شروع ٿيو، هن وقت گڏيل قومن کي پنهنجو ڪردار ادا ڪرڻ گهرجي ۽ غير مسلم ملڪن کي پيغمبرن جي گستاخي کان روڪڻ ۽ انهن کي سزائون ڏيڻ لاءِ ڪو قانون جوڙڻو پوندو، ٻي صورت ۾ مسلمان ته روڊن ۾ هوندا پر غير مسلم ملڪ به سک جو ساهه کڻي نه سگهندا. مسلمان ملڪن جي حڪمرانن کي به گهرجي عوام کي فرانس جي شين جو بائيڪاٽ ڪرڻ جي اپيل کان اڳ هو پاڻ فرانسيسي سفيرن کي پنهنجن ملڪن مان نيڪالي ڏين ۽ فرانس جي سمورين شين تي پابندي لڳائن، جنهن سان اقتصادي  طور به فرانس کي نقصان رسندو ۽  اهڙو ڪڌو عمل ٻيهر نه ڪندا، ايتري قدر جو فرانسيسي شهرين تي به پابندي لڳائي وڃي، جيستائين ڪو اهڙو قانون نه ٿو ٺاهيو وڃي، جنهن سان گستاخ خاڪا ٺاهيندڙ کي سزائون ملن.جيڪڏهن فرانس جي حڪومت اهڙن جاهلن کي اجازت ڏيندي رهندي ته مسلمان به پنهنجو رد عمل ظاهر ڪندا رهندا.

Daily Awami Awaz article by Sahib khan bhatti

 

dailykalyan.com Best Sindhi Articles by Sahib Khan Bhatti

 

Daily pak sindh Best Sindhi Articles by Sahib Khan Bhatti

 

Daily pak sindh Best Sindhi Articles by Sahib Khan Bhatti

 

Daily sindh Best Sindhi Articles by Sahib Khan Bhatti

 

Daily Jeejal karachi, Best Sindhi article by sahib khan bhatti

 

Daily Hilal e Pakistan, Best Sindhi article by Sahib khan bhatti

 

Daily Hilal e Pakistan, Best Sindhi article by Sahib khan bhatti

 

سنڌ حڪومت وٽ اختيار آهن؟

صاحب خان ڀٽي

سنڌ جي گادي واري شهر ڪراچي ۾ ڏينهون ڏينهن آبادي وڌي رهي آهي  پر حڪومت ان معاملي کي سنجيدگي سان ناهي ورتو، پاڙيسري ملڪن مان هجرت ڪري سنڌ جي دل ڪراچي ۾ غير سنڌي اچي آباد ٿي رهيا آهن، حڪومت غيرقانوني طور تي سنڌ ۾ آباد ٿيندڙن کي پنهنجن ملڪن ڏانهن منتقل ڪرڻ لاءِ ڪا به حڪمت عملي ناهي جوڙي، افغانستان، ڀارت ۽ بنگلاديش مان وڏي لوڌ ڪراچي ۾ اچي آباد ٿي رهي آهي، جن  هتان جا سڃاڻپ ڪارڊ به ٺهرائي ڇڏيا آهن، سنڌي قوم جي احتجاج جي باوجود سنڌ سرڪار جي ڪن تي جونءَ به نٿي چري، جنهن سبب ڏينهون ڏينهن  ڪراچي جي آبادي وڌي رهي آهي، وڏيون وڏيون عمارتون ٺهڻ سان گڏ جبلن تي به  ماڻهن پنهنجا گهر تعمير ڪري ڇڏيا آهن پر سنڌ حڪومت ڪٺ پتلي حڪومت جيان سمورو تماشو ڏسي رهي آهي، ڪراچي جي نالن تي به غيرقانوني قبضو ڪيو ويو آهي، جنهن سبب شهر ۾ نيڪال وارو نظام درهم برهم آهي، رهيل ڪسر شهر جا نفيس ماڻهو پوري ڪري ڇڏين ٿا، جڏهن سڄي سنڌ ۾ برسات جو سلسلو شروع ٿيو هو ته ان وقت نام نهاد قومي ميڊيا رڳو ڪراچي  شهر کي فوڪس ڪيو ۽ سنڌ جي ٻين شهرن ۾ آيل برسات جي تباهي کي  نه ڏيکاريو ويو، اهو رڳو ان ڪري ٿيو،  جو هن شهر ۾ پرڏيهين ديرا ڄمائي ورتا آهن، جن کي سنڌ جي ٻين شهرن سان ڪو به واسطو نه آهي، سنڌ سرڪار پاڻ به دعويٰ ڪري رهي هئي ته ڪراچي ۾ ڪجهه نامعلوم ماڻهو گٽر نالن کي بند ڪري رهيا آهن، جنهن سبب شهر ۾ پاڻي بيهجي رهيو آهي، ظاهر ڳالهه آهي ته جڏهن حڪومت ڪمزور هوندي ته ڪراچي ۾ غريب ماڻهن جو رت وهائيندڙ نفيس ماڻهن لاءِ گٽر بند ڪرڻ ڪا وڏي ڳالهه نه هوندي،  سنڌ حڪومت جا ترجمان اهي ته ٻڌائي رهيا هئا ته گٽر بند ڪيا پيا وڃن پر انهن خلاف ڪارروائي نه پيا ڪن، ڇا سنڌ سرڪار ايتري بيوس آهي جو گٽر بند ڪندڙ نامعلوم ماڻهن خلاف ڪارروائي به نه ڪري سگهي.

گذريل ڏينهن وڏي وزير مراد علي شاهه جي صدارت هيٺ پراونشل ڪوآرڊينيشن اينڊ امپليمينٽيشن ڪميٽي جي اجلاس ٿيو، جنهن ۾ ڪور ڪمانڊر ڪراچي سوڌو ٻين ميمبرز جي شرڪت ڪئي، جنهن دوران ڪراچي ۾ ايندڙ سال جي جون مهيني تائين نالن تان قبضا هٽائڻ ۽ صفائي ڪرائڻ جو فيصلو ڪيو ويو، هاڻ انهيءَ فيصلي تي ڪيترو عمل ٿيندو، اهو ته وقت ئي ٻڌائندو پر نالن ويجهو  جيڪي ماڻهو آباد آهن، اهي سولائي سان پنهنجا گهر ڊاهڻ جي اجازت ڏيندا، ڇا سنڌ  سرڪار وٽ  ايترا وسيلا موجود آهن جو نالن تان غيرقانوني طور ٺهيل اڏاوتون ختم ڪرائي سگهي.

ڪراچي ۾ رڳو نالن تي غيرقانوني اڏاوتون قائم نه آهن، پر ريل گاڏين جي پٽڙين ويجهو به اڏاوتون ٺهيل آهن، پر  جيئن ته حڪومت  نيڪال  نظام کي بهتر بڻائڻ لاءِ جيڪو نالن تان قبضا  ختم ڪرڻ وارو فيصلو ڪيو آهي، اهو بهتر آهي پر  انهيءَ عمل سان ڪيترائي ماڻهو بي گهر ٿيندا، جيڪڏهن اهي سنڌ جا اصلوڪا رهواسي آهن ته انهن کي گهر ڏيڻ حڪومت جي ذميواري آهي، جيڪڏهن اهي ڪنهن ٻئي ملڪ جا شهري آهن ۽ ٻين صوبن مان آهن ته انهن کي واپس پنهنجن علائقن ڏانهن موڪليو وڃي، انهن کي گهر ڏيڻ حڪومت جي ذميواري ناهي آهي، سنڌ ۾ غيرقانوني طور رهندڙ پرڏيهين کي پنهنجن ملڪن ڏانهن موڪلڻ سان ئي سنڌ جي گادي واري شهر ۾ صفائي سٿرائي جا انتظام بهتر ٿيندا ۽ آبادي جو بار به گهٽبو، افغانستان مان اچي سنڌ جي گادي واري شهر ۾ آباد ٿيل افغانين کي پنهنجي ملڪ ڏانهن واپس موڪليو وڃي، هونئن به سنڌ ۾ بدامني جو ڪارڻ به پرڏيهه مان آيل ماڻهو آهن، ٻين صوبن مان اچي سنڌ ۾ آباد ٿيندڙ ماڻهو به سنڌ سرڪار جي ناقص پاليسين تي اعتراض اٿاري رهيا آهن ته سنڌ حڪومت ناڪام ٿي چڪي آهي، ڪي به سهولتون فراهم نه پيون ڪيون وڃن، اهڙي صورتحال ۾ سنڌ حڪومت کي گهرجي  ته انهن کي پنهنجن صوبن ڏانهن موڪليو وڃي ته جيئن پنهنجي صوبن جي حڪومتن کان وڃي  سهولتون حاصل ڪن، سنڌ تي بار نه بڻجن، اڳ ئي ٻين صوبن جا ماڻهو سنڌ جي سرڪاري نوڪرين تي قابض ٿيل آهن، جيڪا سنڌي قوم سان وڏي زيادتي آهي. انهن ماڻهن کي پنهنجن صوبن ۾ رهڻ پسند نه آهي، سنڌ ۾ اچي سنڌ ۾ نفرتون پکيڙي رهيا آهن، سنڌ جي گادي واري شهر ۾ رهن ٿا، جتي سموريون سهولتون ميسر آهن پر ٻين شهرن ۾ اهڙيون سهولتون موجود نه آهن ان باجود هو سنڌ سرڪار تي تنقيد ڪندا رهن ٿا ۽ حڪومت خاموشي سان تماشائي بڻيل آهي، ڌاريا سنڌ حڪومت تي تنقيد ڪن ٿا ته ان وقت حڪومت خاموش رهي پر جڏهن سنڌي ماڻهو ڪراچي ۾  پنهنجي حقن لاءِ احتجاج ڪن ٿا سنڌ سرڪار  انهن  تي پوليس  ذريعي لٺبازي ڪرائي  ظلم ڪري ٿي،  آخر اهڙي رويي سان سنڌ جي حڪمرانن کي ڪو فائدو ملندو؟

سنڌ ۾ ڌرتي ڌڻي گذريل 72 سالن کان احتجاج ڪري رهيا آهن ته مقامي ماڻهن کي روزگار  ڏيو، پر ان  باوجود سنڌ تيل، گئس  ڪڍندڙ ڪمپنين ۾ سنڌي نه هئڻ برابر آهن، پورٽ قاسم جو بنياد ڪنهن رکيو، اهو به سڀني کي خبر آهي پر اتي ڪيترا سنڌي ماڻهو ڪم ڪن ٿا، ڪيترا آفيسر سنڌي آهن، اها ڳالهه به ڪنهن کان لڪيل نه آهي، هزارين سنڌي نوجوانن يونيورسٽين مان ڊگريون کڻن ٿا، جن کي  سرڪاري نوڪريون نه ٿيون ملن ۽ ٻين صوبن جي  عورتن توڙي مردن کي سنڌ ۾ نوڪري ملي وڃي ٿي، آخر  انهيءَ سازش پٺيان ڪير آهي؟ سنڌ حڪومت کي سوچڻو پوندو، وفاقي ادارن ۾ سنڌي نه هئڻ برابر آهن، ايتري قدر جو راندين جي ميدان ۾ به سنڌي نوجوانن کي نظر انداز ڪيو ويو آهي، پاڪستان ٺهڻ کان هيل تائين پاڪستان جي ڪرڪيٽ ٽيم ڪو به سنڌي رانديگر نه اچي سگهيو آهي، ڇا رڳو اهل پنجاب ۽ خيبرپختونخواهه جا ماڻهو آهن، سنڌ ۽ بلوچستان ۾ اصل رانديگر نه آهن يا وري اهو رڳو وڏن ادارن ۾ ويٺل تعصب پرست ماڻهن جو رويو آهي، جيڪي سنڌي نوجوانن کي اڳتي ڏسڻ نه ٿا چاهين، ڪجهه عرصو جعلي ڊوميسائيل وارو مامرو اٿيو ته ان ۾ به سنڌ سرڪار خاموش نظر آئي، بلڊر مافيا به رڳو سنڌي وسندين کي ڊاهي رهي آهي، ان تي به سنڌ سرڪار خاموش آهي، بلڊر مافيا کي افغانين، بنگالين ۽بيهارين جون بستيون نظر نه ٿيون اچن، جيڪڏهن نظر اچن ٿا ته رڳو ڳوٺ نظر اچن ٿا، بلڊر مافيا کي شايد لڳي ٿو ته سنڌ فلسطين آهي، سنڌ جي انچ انچ تي قبضو ڪرڻ سندن لاءِ اسرائيل جيان سولو آهي، حڪومت انهن بلڊر مافيائن خلاف ڪارروائي نه ٿي ڪري، پوليس به سندن سهولتڪار بڻيل آهي، ڇا سنڌ ۾ رهندڙ سنڌي ڪو افغانستان، بنگلاديش يا ڀارت مان لڏي آيا هئا، جن جا اوهان ڳوٺ ڊاهي رهيا آهيو، جيڪڏهن اوهان کي گهر ڊاهڻ آهن ته افغانين، بنگالين ۽ بيهارين جا ڊاهيو، جيڪي غير قانوني طور سنڌ ۾ ترسيل آهي، جيڪي هن ملڪ تي بار بڻيل آهن، اصلوڪن رهواسين خلاف ڪارروائي ڪري اوهان ڇا ٿا ثابت ڪرڻ چاهيو؟  جيڪڏهن سنڌ حڪومت وٽ ڪي اختيار آهن ته پوءِ فوري طور غيرقانوني قبضا ختم ڪرائڻ سان گڏ سنڌ ۾ آباد ٿيل ڌارين جا نادرا پاران جاري ڪيل سڃاڻپ ڪارڊ رد  ڪرائي ۽ سنڌ جي سرحد وٽ وڏي چيڪ پوسٽ قائم ڪئي وڃي، خاص طور پنجاب سنڌ دنگ وٽ، جيڪي به ماڻهو به پنجاب مان سنڌ ۾ داخل ٿي رهيا آهن، انهن جو رڪارڊ رکيو وڃي ته جيئن سنڌ ۾ داخل ٿيندڙن کي خبر پئي ته هو ڪهڙي صوبي ۾ داخل ٿي رهيا آهن، هتي ته مختلف صوبن مان اچي ماڻهو ايئن گهمي رهيا آهن، جيئن هي صوبو هنن جي پيءُ جي ملڪيت هجي، جيڪڏهن سنڌ پنجاب بارڊر  بهترين چيڪ پوسٽ قائم ٿي ته دهشتگردي جي واقعن ۾ گهٽتائي اچي سگهي ٿي، ڇاڪاڻ ته سنڌ ۾ اهي دهشتگردي ڪارروايون ڪندا آهن، جيڪي ٻين صوبن مان ايندا آهن.

حڪومت تي پي ڊي ايم جي جلسن جو وڌندڙ دٻاءُ

صاحب خان ڀٽي

پاڪستان جي تاريخ ۾ پهريون ڀيرو ووٽ کي عزت ڏيڻ واري نعري تي ملڪ جون 11 سياسي وڏيون پارٽيون هڪ پيج تي اچي ويون آهن، گجرانوالا ۾ٿيل پاڪستان ديموڪريڪٽڪ  جلسي کان پوءِ حڪومت جون ننڊون حرام ٿي ويون آهن، جنهن جو  اندازو ڪراچي ۾ ٿيل جلسي مان لڳائي سگهجي ٿو،  اڳوڻي وزيراعظم ميان محمد نوازشريف جي تقرير تي اعتراض به اٿارايا ويا ۽ سندس موقف کي رد ڪيو ويو پر ان باوجود لکين ماڻهو پي ڊي ايم سان گڏ نظر اچي رهيا آهن، جنهن به شهر ۾ پي ڊي ايم جو جلسو ٿي رهيو آهي، اتي عوام جو  سمنڊ اٿلي رهيو آهي، حڪومت پاران دعويٰ ڪئي وئي آهي ته پي ڊي ايم اختلافن جي ور چڙهي وئي آهي ۽ عوام سندن موقف رد ڪيو آهي پر عوامي سمنڊ ڪجهه ٻيو ئي ٻڌائي رهيو آهي، ڪراچي ۾ ٿيل جلسي کانپوءِ حڪومت بوکلاهٽ جو شڪار نظر آئي، ڪئٽن رٽائرڊ صفدر جي گرفتاري کانپوءِ صحافي کي کنڀي گم ڪرڻ وارن مامرن مان لڳي ٿو ته حڪومت پي ڊي ايم  کي ناڪام بڻائڻ لاءِ هرممڪن وسيلا اختيار ڪري رهي آهي ۽ حڪومت آخري حد تائين وڃي سگهي ٿي، ڪراچي کانپوءِ جڏهن  پي ڊي ايم جو جلسو دهشتگردي جي ور چڙهيل صوبي بلوچستان ۾ ٿيو ته ان وقت ميڊيا تي  ان جلسي کي ڪا خاص ڪوريج نه ڏني وئي ۽ حڪومتي ترجمانن کي پريس ڪانفرنس ڪرڻي پئجي وئي ۽ قومي ميڊيا حڪومتي نمائندن کي ڏيکارڻ ۾ رڌل نظر آئي، ان باوجود سوشل ميڊيا تي پي ڊي ايم جي جلسي کي لکين ماڻهن ڏٺو، انهي جلسي ۾ پي ڊي ايم جي اڳواڻن انڪشاف چيو ته ڪجهه اتحادي اتحاد ختم ڪرڻ چاهين ٿا، جيڪڏهن ايئن ٿيو ته ووٽ جي عزت ڏيڻ واري جدوجهد کي ڇيهو رسندو.

ماضي ۾ جڏهن تبديلي پسندن جا جلسا ٿي رهيا هئا ته ان وقت ميان محمد نوازشريف جي حڪومت هئي ۽ ان حڪومت خلاف گٿا لفظ ڳالهايا ويندا هئا ۽ ميڊيا ذريعي سڌي ريت انهن کي ڏيکاريو ويندو هو، پر تبديلي پسندن جي حڪومت اچڻ کانپوءِ ميڊيا تي سخت پابنديون لڳايون ويون آهن ۽ اهو چيو پيو وڃي ته اهي ملڪ دشمني ڪري رهيا آهن، ڇا ووٽ کي عزت ڏيڻ وارو نعرو ملڪ دشمني آهي؟ يا وري مهانگائي سٽيل عوام کي حق ڏيارڻ لاءِ آوز اٿارڻ گناهه آهي، جيڪڏهن حڪومت مهانگائي ۽بيروزگاري  جو خاتمو آڻي ها ته ڇا اڄ پي ڊي ايم جا جلسا ڪامياب ٿين ها، بلڪل نه؟ عوام پي ٽي آءِ کي ان ڪري ووٽ ڏنو هو ته کنڊ 45 ڪلو  هئي ان کي سستو ڪيو ويندو، ڊالٽر 100 کان وڌيڪ هو، ملڪ تي قرض چڙهيل هو، عوام ته تبديلي حڪومت جي موقف کي لبيڪ ڪيو هو ته پي ٽي آءِ  جي حڪومت اچڻ کانپوءِ ملڪ جو قرض لهي ويندو ۽ ماڻهن روزگار جو موقعا ملندا پر  تبديلي پسندن جي حڪومت اچڻ کانپوءِ جيڪي ماڻهو روزگار سان لڳل هئا، اهي بيروزگار ٿي ويا، جن وٽ گهر هئا، انهن کي بي گهر ڪيو ويو، ملڪ ٻيڻ ٽيڻ تي قرضي ٿي ويو، ڇا ملڪ جي غريب عوام تبديلي پسندن کي ان ڪري ووٽ ڏنو هو ته دنيا  آڏو هٿ ٽنگي قرض ورتو وڃي؟ ڇا غريب عوام تبديلي پسندن کي ان ڪري ووٽ ڏنو هو، جو  انهن کي  نوڪرين تان برطرف ڪيو وڃي، انهن جون پگهارون بند ڪيون وڃن، بلڪل نه اڄ پي ڊي ايم سان گڏ عوام جو سمنڊ گڏ آهي ته اهو  پي ٽي آءِ حڪومت جي ناڪام پاليسين جي ڪري آهي، جيڪڏهن ماڻهو بيروزگار نه ٿين ها، انهن جا گهر نه ڊاهيا وڃن ها، ڊالر جو اگهه وڌائي عوام جي پئسن تي ڌاڙو نه هنيو وڃي ها،  ڏينهن رات نوٽ نه ڇاپيا وڃن ها ته اڄ ملڪ جو عوام موجوده حڪمرانن سان گڏ بيٺل هجي ها، حڪومت کي هڪ  ئي وقت ملڪ جي غريب عوام تي ايڏو وڏو بار نه وجهڻ گهرجي ها.

جيئن ته هاڻي پي ِڊي ايم پنهنجي طاقت جو مظاهرو بلوچستان ۾ ڪري چڪي آهي، اتي به  هزارين ماڻهو  پي ڊي ايم جي موقف جي حمايت ڪري رهيا آهن ته حڪمرانن کي عوام جي طاقت کي مڃڻو پوندو، اها ڪنهن کي به خبر نه آهي ته هن ملڪ ۾ ووٽ کي عزت ملندي يا نه ؟ پر ايتري خبر آهي ته جن کي موجوده حڪمران چور چوندا هئا، انهن جي حڪومتي دور ۾ مهانگائي گهٽ هئي، ماڻهو خوشحال هئا ۽ روزگار جا موقعا پيدا ٿي رهيا هئا پر تبديلي پسندن جي حڪومت ۾ ملڪ اندر انارڪي پکڙجي رهي آهي، بلوچستان جو عوام حقن لاءِ جان قربان ڪرڻ لاءِ به تيار آهي، ڪافي عرصي کان پنهنجي جدوجهد به جاري رکيو پيو  اچي  ۽ هاڻي وري سنڌي قوم ڪراچي ڪميٽي ۽ سنڌ جي سامونڊي ٻيٽ چين ۽ جاپان کي وڪرو ڪرڻ واري معاملي تي سراپا احتجاج بڻجي وئي آهي، ايتري قدر جو جنهن سنڌ اسيمبلي پاڪستان کي ٺاهڻ لاءِ قراداد پيش ڪئي هئي، انهي اسيمبلي جي ٻيٽن تي والار خلاف ٺهراءَ کي ملڪ  جي صدر عارف علوي ۽ وزيراعظم عمران خان ٿڏي ڇڏي آهي، مطلب ته پاڪستان ٺاهڻ کانپوءِ اسٽيبلشمينٽ سنڌ اسيمبلي کي اهميت نه ٿي ڏي ۽ نه ئي سنڌي قوم کي ڪجهه سمجهن ٿا، سنڌي قوم ته ڪالا باغ ڊيم جي خلاف به روڊن تي هئي، پر ٻيٽن تي والا سنڌي قوم جي وجود جو سوال آهي، ٻيٽن تي وڏا شهر اڏڻ سنڌين کي اقليت ۾ تبديل ڪري سنڌ جي انچ انچ کي وڪرو ڪري ڌارين کي آباد ڪرڻ جي سازش آهي، جيڪو به سنڌي وزير يا مشير  سنڌ ۾ وڏا شهر ٺاهي ڌارين کي آباد ڪرڻ جي حمايت ڪري ٿو اهو ڪڏهن به سنڌ جو سڄڻ نه ٿو ٿي سگهي، سنڌي قوم هن وقت پنهنجي بقا جي جنگ وڙهي رهي آهي پر افسوس سنڌ جي حڪمرانن هيل تائين سنڌ ۾ ڌارين جي آباڪاري جو سلسلو روڪي ناهن سگهيا.

جيتوڻيڪ وفاقي سرڪار سنڌ هاءِ ڪورٽ کي خاطري ڪرائي آهي ته جيستائين سنڌ حڪومت راضي نه ٿيندي ٻيٽن تي ڪم نه ٿيندو، پر ان باوجود سنڌ جي ٻيٽن تي ڪنسٽرڪشن جو ڪم تيزي سان جاري آهي، هڪ وڏي عمارت پري کان نظر اچي رهي آهي، ان کان علاوه ميڊيا تي هلندڙ وڊيوز ۾ ڪجهه گهر به نظر اچي رهيا آهن،اٽارني جنرل خالد جاويد عدالت ۾ ٻڌايو هو ته ماڻهن ۽ مينگروز کي ڪو به نقصان نه ٿيندو، ڏنگي ۽ ڀنڊار ٻيٽن تي نئون شهر اڏڻ لاءِ سنڌ حڪومت سان رابطو جاري آهي، اسان سنڌ اسيمبلي مان منظور ڪيل ٺهراءُ جو احترام آهي، قانون کان مٿانهون ڪو به ڪم نه ڪندي، جيستائين سنڌ حڪومت راضي نه ٿيندي ٻيٽن تي ڪم نه ٿيندو، ٻيٽ سنڌ جي ملڪيت آهن. اٽارني جنرل جي اعتراف باوجود صدر عارف علوي چئي رهيو آهي ته 1973ع ۾ شهيد ذوالفقار ڀٽو اهي ٻيٽ پورٽ قاسم جي حوالي ڪري ڇڏيا هئا، هاڻ ان ۾ ڪيتري صداقت آهي اهو ته پيپلزپارٽي ئي ٻڌائي سگهي ٿي پر  اٽارني جنرل ۽ صدر جي بيان تضاد آهي، جنهن مان اندازو لڳائي سگهجي ٿو ته دال ۾ ڪجهه ڪارو آهي. پي ڊي ايم جي جلسي ۾ به سنڌ ۽ بلوچستان جي سامونڊي تي  وفاق جي والار کي غير قانوني ۽ غير آئيني قرار ڏنو ويو آهي، جيڪڏهن صدر عارف علوي ۽ وزيراعظم عمران خان سنڌ اسيمبلي جي ٺهراءَ کي عزت نه ڏيندا ته ڇا سنڌ جو عوام انهن جي فيصلن کي مڃيندو؟ جيڪڏهن وفاقي حڪومت جو اهڙو ورتاءُ رهيو هو ته هن ملڪ ۾ انارڪي پکڙجندي ۽ ملڪ کي 1973ع واري صورتحال کي منهن ڏيڻو پئجي سگهجي ٿو، موجوده حڪومت وڏا شهر اڏي سنڌ ۾ ڌارين کي تبديل ڪري سنڌ کي فلسطين بڻائڻ چاهي ٿي، جنهن کي سنڌي قوم ڪنهن به صورت ۾ ڪامياب ٿيڻ نه ڏيندا، ڪجهه  سنڌ جا وزير وڏا شهر اڏڻ  واري فيصلي جي حمايت ڪري رهيا آهن، جنهن سان سنڌ جي عوام ۾ ڪاوڙ پکڙجي رهي آهي ۽ پيپلزپارٽي جي ساک  به متاثر ٿي رهي آهي.

بهرحال حڪومت هڪ طرف سنڌ جي ماڻهن سان مهاڏو اٽڪائي نفرتون پکيڙي رهي آهي ته مٿان وري پي ڊي ايم جي  ڪامياب جلسن جو راڳ دنيا جي مختلف چينلن ۾ ٻڌڻ اچي رهيو آهي، پاڪستان ۾ به ميڊيا تي پي ڊي ايم جا جلسا نه پر جلسيون نظر اچي رهيون آهن پر دنيا جي ٻين  چينلن تي عوامي سمنڊ نظر اچي رهيو آهي، قومي ميڊيا تي پي ڊي ايم جلي جلسن کي سڌي ريت نه ڏيکارڻ واري عمل باوجود وفاقي حڪومت خوف زده نظر اچي رهي آهي ۽ پي ڊي ايم کي ماضي جيان غدار قرار ڏيڻ وارو پراڻو فارمولا  استعمال ڪيو پيو وڃي پر سوشل ميڊيا ۽ موجوده حڪمرانن جي پاليسي جي ڪري عوام غداري جو سرٽيفڪيٽ ورهائيندڙن تي يقين نه پيو ڪري، اڳ ۾ ڪنهن کي غدار قرار ڏنو ويندو هو ته عوام انهن جي جلسن نظر نه ايندو هو، پر  موجوده حڪومت ڏينهن رات هڪ ڪري پي ڊي ايم کي غدار قرار ڏيڻ جي ڪوشش ڪري رهي آهي ۽ چيو پيو وڃي ته اهي ڀارت کي خوش ڪري رهيا آهن، ڀلا موجوده حڪمران اهو ٻڌائڻ پسند ڪندا، ته غريب عوام کي بيروزگار ڪري هو ڪنهن کي خوش ڪري رهيا آهن، ڀلا  موجوده حڪومت اهو ٻڌائيندي ته ڊالر جو اگهه  وڌائي ڪنهن کي خوش ڪيو ويو؟ ڪير اهو ٻڌائيندو ته کنڊ ۽ اٽي جا هٿرادو اگهه وڌائي ڪنهن کي خوش  ڪيو پيو وڃي، جيڪڏهن پي ڊي ايم وارا ڀارت کي خوش ڪري رهيا آهن ته پوءِ حڪومت ملڪي معشيت کي تباهه ڪري ملڪ کي ڪمزور ڪري رهي آهي، ان جو فائدو ڪنهن کي ٿيندو؟ هاڻ حڪومت کي اهو غداري وارو ڪارڊ کيڏڻ کان پاسو ڪرڻ گهرجي، 11 پارٽين جو اتحاد ٽٽي سگهي ٿو پر عوام ۾ حڪومت خلاف جيڪا ڪاوڙ جي لهر پکڙيل آهي، اها ختم ٿيڻ ناممڪن آهي، اڄ عوام تبديلي جو نالو ٻڌي پريشان ٿي وڃي ٿو، اهو سڀ ڪجهه حڪمرانن جي غلط پاليسين  جي ڪري ٿي رهيو آهي، پي ڊي ايم جي جلسن کان ڊنل حڪومت کي گهرجي ته پابنديون لڳائڻ بدران انهن کي پنهنجو آواز عوام تائين پهچائڻ جي اجازت ڏني وڃي، جيڪڏهن اوهان ملڪ کي خوشحال بڻائي ڇڏيو آهي ته عوام اوهان سان گڏ هوندو، جيڪڏهن اوهان کان ملڪ جو عوام خوش ناهي ته اهي پي ڊي ايم ڏانهن ويندا،  گذريل ڏينهن جيڪو ڪوئيٽا ۾ جلسو ٿيو، اهو جلسو ملڪي تاريخ ۾ تمام وڏو اهميت جوڳو آهي ڇاڪاڻ ته مايوسي جي ورچڙهيل بلوچستان جو عوام پي ڊي ايم سان گڏ ٿي ويو آهي، هونئن به بلوچستان دهشتگردي جي ورچڙهيل آهي، ڪا به پارٽي اتي جلسو ڪرڻ کان اڳ تمام گهڻو سوچيندي آهي، ان وقت بلوچستان جي عوام کي پي ڊي ايم ذريعي هڪ امن جي ڪرن نظر آئي آهي ۽ پي ڊي ايم جي موقف کان به مطئمن ٿي ويا آهن.هاڻي ڏسڻو اهو آهي ته عوامي طاقت کي موجوده حڪومت تسليم ڪري ٿي يا نه؟  پر هڪ ڳالهه واضح ٿي رهي آهي ته ملڪ ۾ هاڻ سليڪٽيڊ نه پر حقيقي تبديلي ايندي نظر اچي رهي آهي.