Sahib khan bhatti: February 2019

Thursday 28 February 2019

ڌارين کي بينڪ اڪائونٽس کولڻ اجازت، آخر ڇو؟

صاحب خان ڀٽي

ملڪ ۾جڏهن کان تحريڪ انصاف جي حڪومت آئي، تنهن ڏينهن کي ڌارين کي ملڪي شهري تسليم ڪرڻ واريون ڪوششون تيز ٿي ويون آهن ، وزيراعظم عمران خان قومي اسيمبلي جي اجلاس ۾ به افغان مهاجرن سميت سموري ڌاري لوڌ کي سڃاڻپ ڪارڊ جو چيو هو ، جنهن تي اپوزيشن پاران احتجاج به ڪيو ويو پر ان باوجود وزيراعظم عمران خان ڌارين جي لوڌ کي آباد ڪرڻ لاءِ ڏينهن رات هڪ ڪري ڇڏي آهي، ڪڏهن حڪومت پاران ڌارين جي لوڌ کي آباد ڪرڻ جون ڳالهيون ڪيون وڃن ٿيون ته ڪڏهن وري انهن کي هتان جو شهري تسليم ڪرڻ لاءِ ملڪ جي اصل رهواسين تي دٻاءُ وڌو وڃي ٿو، ڪڏهن ته غدار جا لقب ڏئي ماڻهن کي خاموش ڪرايو وڃي ٿو ۽ اهو سلسلو رڪجي نه سگهيو آهي، 25 فيبروري 2019 تي وزيراعظم عمران خان پنهنجي ٽوئيٽ پيغام چيو آهي ته مون هدايت جاري ڪئي آهي ته جيڪي به رجسٽرڊ افغان مهاجرن آهن، اهي بينڪ اڪائونٽس کولي سگهن ٿا، جنهن کانپوءِ اهي ملڪ جي رسمي معشيت ۾ شرڪت ڪري سگهن ٿا، وزيراعظم عمران خان اهو به چيو ته اهو سڀ ڪجهه اڳ ئي ٿيڻ گهرجي ها.

بهرحال وزيراعظم عمران خان هجي يا نوازشريف يا ڪو ٻيو هجي، سڀني جي اها ئي ڪوشش هوندي آهي ته ڌارين جي لوڌ کي آباد ڪري انهن کي هن ملڪ جو شهري تسليم ڪيو وڃي ۽ اها ڪوشش گذريل ڪيترن ئي ڏهاڪن کان جاري آهي ۽ اها ڌارين جي سموري لوڌ خاص طور تي سنڌ ۾ آباد ڪئي وئي آهي، اهو ئي سبب آهي جو جيڪو به وزيراعظم ايندو آهي، اهو انهن کي سنڌ ۾ ووٽ جو حق ڏئي سنڌين کي اقليت ۾ تبديل ڪرڻ جي ڪوشش ڪندو آهي، جيڪڏهن اهو ڪنهن ٻئي ملڪ ٿئي ته هن ملڪ رڙيون ٻڌڻ ۾ اينديون آهن ته اهو غلط ٿي رهيو آهي پر جيڪڏهن هن ملڪ اهو سڀ ڪجهه ٿئي ته چيو ويندو آهي ته رڙيون ڪندڙ ملڪ دشمن آهن، آخر اهو ٻٽو معيار ڇو آهي، آخر ملڪ ۾ اصل ڌڻين کي اقليت ۾ تبديل ڪرڻ لاءِ ڌارين کي سڃاڻپ ڪارڊ ڏيڻ کان ويندي انهن کي ٻيون سهولتون ڏيڻ جون ڪوششون ڇو پيون ڪيون وڃن، آخر سنڌين جو ڏوهه ڪهڙو آهي؟ جو وزيراعظم عمران خان ڌارين جي لوڌ کي سڃاڻپ ڪارڊ ڏيڻ جي ڳالهه ڪري رهيو آهي ته ڪڏهن وري انهن کي بينڪ اڪائونٽس کولڻ جي اجازت ڏئي رهيو آهي،

جيڪڏهن افغان مهاجرن کي انهيءَ لاءِ ترسايو ويو هو ته انهن کي هن ملڪ جو شهري تسليم ڪيو ويندو ته پوءِ آخر ملڪ ۾ وڌندڙ آبادي تي ڳڻتي جو ڊرامو ڇو پيو رچايو وڃي، آخر ڇو وڌندڙ آبادي تي آگاهي مهم هلائي پئي وڃي، ڀلي اوهان لکين رپيا وڌندڙ آبادي کي گهٽائڻ واري مهم تي خرچ ڪيو پر ان سان مسئلو حل نه ٿيندو، جيستائين اوهان ملڪ ۾ ڌارين کي آباد ڪرڻ وارو سلسلو بند نه ڪندا، تيستائين هن ملڪ ۾ دهشتگرد داخل ٿيندا رهندا ۽ اهي مهمان اوهان جي ملڪ جي سلامتي خطري ۾ وجهي ڇڏيندا. جيڪڏهن ڏٺو وڃي ته هن ملڪ ۾ جيڪي به دهشتگردي جا واقعا ٿيا آهن، انهن جون سموريون ڪڙيون خاص طور تي افغانستان سان ملنديون آهن، مزارن، درگاهن ۽ امام بارگاهن تي جيڪي به حملا ٿيا آهن، انهن جون به ڪڙيون افغانستان مليون آهن ۽ جڏهن به هن ملڪ ۾ ڪو سانحو پيش آيو آهي ته قوم کي کي بريفنگ ڏني وئي ته دهشتگرد افغانستان مان آيا هئا پر افسوس جو حڪمرانن مهمان نواز جو ڊرامو رچائي انسانيت جو مثال ڏئي انهن کي ترسائيندو آهي ۽ اها ڌاري لوڌ هاڻ هت مڪمل طور آباد ٿي چڪي آهي،

جيئن ته نادرا ۾ خاص ٽولو آهي، جيڪي افغانين جا ڪارڊ ته سولائي سان ٺاهي ڏئي ڇڏيندو آهي، بنا ڪنهن جاچ پڙتال جي ڌارين جي لوڌ کي ڪارڊ جاري ڪيا ويندا آهن، هن ملڪ ۾ افغاني، برمي بيهاري، بنگالي ۽ ٻي ڌاري لوڌ وٽ پاڪستان جا سڃاڻپ ڪارڊ آهن پر جڏهن هتان جي اصل رهواسين کي ڪارڊ ٺهرائڻ لاءِ در در ڀٽڪايو ويندو آهي ۽ اهو بانور ڪرايو ويندو آهي ته نادرا وڏو اصول پرست ادارو آهي پر حقيقت ان جي ابتڙ آهي، هن ملڪ ۾ هزارين ڌارين کي سڃاڻپ ڪارڊ آهن پر ان جو جواب اڄ ڏينهن تائين ناهي ڏنو ويو ته آخر انهن کي ڪارڊ ٺاهي ڏيندڙن خلاف ڪارروائي ڇو نه ٿي آهي؟ آخر ڇو وزيراعظم اهڙي حساس اداري جي اهڙي رويي تي خاموش آهي؟

جيڪڏهن ڏٺو وڃي ته انهن سمورن سوالن جو جواب اسان کي ڪڏهن به نه ملندو، ڇاڪاڻ ته وزيراعظم عمران خان پاڻ ئي چئي چڪو آهي ته انهن کي تسليم ڪرڻو پوندو، جيڪڏهن وزيراعظم انهن کي تسليم ڪرڻ جو چئي رهيو آهي ته پوءِ آخر اسان کي تسليم ڇو نه پيو ڪيو وڃي؟ آخر ڇو سنڌ جي ماڻهن کي حق نه پيا ڏنا وڃن، آخر ڇو سنڌ جي نوجوانن کي هر شعبي کان پري رکڻ جي ڪوشش ٿي رهي آهي، آخر ڇو سنڌ جي سرڪاري ادارن ۾ ڌاري لوڌ کي نوڪريون ڏنيون آهن؟ آخر ڇو سنڌ ۾ ترقياتي ڪم نه ڪيا ويا آهن؟ آخر ڇو سنڌ ۾ دهشتگردن کي کلي ڇوٽ ۽ ڌرتي ڌڻين ڌرتي تنگ ڪئي وئي آهي؟ آخر ڇو سنڌ جي قديم عمارتن کي مسمار ڪرڻ جي ڪوشش ڪئي پئي وڃي؟ انهن سمورن سوالن جا جواب شايد اسان کي ڪير نه ڏيندو؟ مون کي ياد آهي ته ڪجهه اڳوڻي صلاحڪار سرتاج عزيز چيو هو پاڪستان افغانين جي مهمان نوازي ڪري رهيو آهي ۽ انهن کي نوڪريون به ڏنيون ويون آهن.

اڄ حڪمران پاڻ چئي رهيا آهن، اسان ٻين جنگون وڙهيون آهن پر اهو نه چيو آهي ته انهن جنگن ۾ متاثرن کي به پاڪستان ۾ آباد ڪيو ويو ۽ انهن کي آباد ڪري ملڪ تي هڪ وڏو بار وڌو ويو آهي، جنهن جي سٽ هڪ ڏينهن هي ملڪ برداشت نه ڪري سگهندو، اهو وقت پري نه آهي، جڏهن اهي افغان مهاجر ايوانن ۾ هوندا ۽ افغانستان جي سپورٽ ڪندا ۽ ملڪي سلامتي کي داءُ تي لڳائي ڇڏيندا، ڇاڪاڻ ته جيڪي حڪمران قدم کڻي رهيا آهن، ان سان ملڪ جو ڪو ڀلو نه ٿيندو، جيستائين اوهان پنهنجي ملڪ جي عوام تي انسانيت نه ڏيکاريندا ۽ هن ملڪ جي عوام کي انسان نه سمجهندا، تيستائين ڪا به تبديلي نه ايندي، باقي رهي ڳالهه انهن ڌارين کي آباد ڪرڻ جي ته ان سان نه ڪنهن ملڪ کي فائدو ٿيو آهي ۽ نه ئي وري هاڻ ٿيندو؟ جيڪڏهن اسان جي ملڪ جي حڪمرانن کي ڌارين کي آباد ڪرڻو هو ته پوءِ اهو ڊرامو ڇو رچايو ويو ته اهي مسلمان ڀائرن آهن ۽ جنگ ختم ٿيڻ بعد واپس هليا ويندا.

جيڪڏهن ان وقت پاڪستان جي حڪمرانن کي انهن ڌارين کي واپس موڪلڻ جي نيت هجي ها ته انهن افغان مهاجرن کي سرحد وٽ ڪئمپون قائم ڪري ترسائين ۽ انهن کي ملڪ ۾ آباد نه ڪن ها پر افسوس جو حڪمرانن هڪ سازش تحت افغان مهاجرن کي آباد ڪرڻ لاءِ مهمان نواز جو ڊرامو رچايو ۽ اڄ چيو پيو وڃي ته انهن کي تسليم ڪرڻو پوندو ۽ انهن کي به شهريت ڏيڻي پوندي، جيڪڏهن هڪ ٻه لک افغاني هجن ها ته ڪنهن کي به اعتراض نه هجي ها پر اها ڌاري لوڌ لکن جي تعداد ۾ آهي، جنهن سان ملڪي حالتون ته خراب ٿي رهيون آهن پر ان سان مقامي ماڻهن جا حق به غضب ٿي رهيا آهن، آخر ڇو وزيراعظم عمران افغان مهاجرن کي اڪائونٽ کولڻ جي اجازت ڏني آهي؟ جيڪڏهن انهن کي اڄ بينڪ اڪائونٽ کولڻ جي اجازت ڏني آهي ته اڳتي هلي انهن کي ووٽ ڏيڻ جي به اجازت ڏني ويندي.

وزيراعظم جي انهيءَ قدم مان صاف ظاهر ٿي رهيو آهي ته حڪومت جو اهو ضد آهي ته ملڪ جي اصل قومن کي اقليت ۾ تبديل ڪيو وڃي ۽ اها وزيراعظم جي هدايت ان جي هڪ ڪڙي آهي، سمورو ڪم هڪ لکيل اسڪرپٽ ٿي رهيو آهي، ڌارين جي لوڌ کي سنڌ ۾ آباد ڪري انهن کي بينڪ اڪائونٽ کولڻ جي اجازت ڏيڻ کانپوءِ ٻيون سهولتون به ڏنيون وينديون، جيڪڏهن حڪمرانن کي ڌارين جو ايڏو احساس آهي ته پوءِ انهن کي پنهنجن ملڪن ڏانهن موڪلي ۽ جيڪي ڌاريا ملڪ جي سرڪاري ادارن ۾ ڪم ڪري رهيا آهن، انهن کي نوڪري مان ڪڍيو وڃي ۽ جن هن ملڪ ۾ ملڪيتون ٺاهيون آهن، انهن کي به ڪڍيو وڃي پر اهو تڏهن ئي ممڪن ٿيندو، جڏهن سنڌ جو عوام هڪ ڀيرو ٻيهر ڌارين جي لوڌ خلاف ڀرپور احتجاج ڪندو ۽ هم آگاهي مهم هلائندو ته آخر ڪهڙي اصولن تحت برمين، بنگالين، بيهارين ۽ افغانين کي آباد ڪرڻ لاءِ حڪمرانن ڏينهن رات هڪ ڪري ڇڏي آهي؟ آخر ڇو حڪمران سنڌين کي اقليت ۾ تبديل رڪڻ جو ڪوششون ڪري رهيا آهن، اهو اسان ان ڪري چئي رهيا آهيون ته جيڪا به ڌاري لوڌ آهي، اها سنڌ۾ آباد آهي ۽ اهي ڌاريا سنڌ تي بار آهن پر ان کان وڌيڪ هن ملڪ تي بار آهن ۽ جيڪڏهن انهيءَ ڌاري لوڌ کي پنهنجن ملڪن ڏانهن موڪلڻ لاءِ قدم نه کنيا ويا ته ان مان صاف ظاهر ٿي ويندو ته حڪمران انهن کي هڪ سازش تحت آباد ڪري رهيا آهن.

Wednesday 27 February 2019

ڀارتي جنگي جنون ۽ هوائي فوج جي ڀرپور جوابي ڪارروائي

صاحب خان ڀٽي

پلواما واقعي کانپوءِ ڀارت بدحواس ٿي ويو آهي ۽ اتان جي ميڊيا پاڪستان تي ڏمرجي وئي آهي، جنهن سبب ڀارتي سرڪار ۽ ڀارتي ميڊيا جو رويو به جارحيت وارو ٿي ويو آهي، جنهن سبب ٻنهي ملڪن ڇڪتاڻ گهٽجڻ بدران وڌندي پئي وڃي، گذريل ڏينهن به ڀارتي فوج طرفان پاڪستان جي سرحدن ۾ داخل ٿيڻ جي ڪوشش ڪئي وئي ته پاڪستان جي هوائي فوج ڀرپور جواب ڪارروائي ڪندي ڀارت جي ٻن جهازن کي ڪيرائي تباهه ڪري ڇڏيو، جڏهن ته هڪ پائليٽ کي گرفتار ڪيو ويو هو، جنهن جي بيان جي ويڊيو به منظر عام تي اچي وئي آهي، جنهن پنهنجو نالو اڀي نندن ٻڌايو آهي ۽ ڀارت طرفان به جهاز تباهه واري معاملي جي تصديق ڪري ڇڏي آهي ۽ اها به تصديق ڪئي آهي ته سندن پائليٽ ۽ جهاز گم آهن.

پلواما واقعي کان پوءِ ڀارت جنگي جنون ڏکڻ ايشيا ۾ خطي جون گهنٽيون وڄائي ڇڏيون آهن، سرحد جي ٻنهي پاسن کان ماڻهن ۾ ڀارتي جنگي جنونيت سبب خوف ۽ حراس پکڙجي ويو آهي ، پاڪستان طرفان ڀارت کي پلواما واقعي تي ڀرپور سهڪار جي خاطري ڪرائي وئي هئي ۽ چيو ويو هو ته ڀارت پاڪستان کي پڪا ثبوت ڏي ته جوابدارن خلاف سخت ڪارروائي ڪئي ويندي، ايتري قدر جو پاڪستان طرفان اهو واضح ڪيو ويو هو ته جنگ مسئلي جو حل ناهي، ڳالهيون ڪيون وڃن، جنگ ڪرڻ سولي آهي پر ان کي ختم ڪرڻ تمام ڏکيو آهي پر مودي سرڪار جي جنگي جنون انهن ڳالهين ڏانهن ڪو به ڌيان نه ڏنو ۽ خطي ۾ پاڻ کي طاقتور ثابت ڪرڻ لاءِ جنگ جون ڌمڪيون ڏيندو رهيو ۽ ڀارتي ميڊيا به جنگي جنون ۾ مبتلا ٿي ويا ۽ پاڪستان خلاف پروپيگنڊا شروع ڪئي وئي، جنهن جو نتيجو اهو نڪتو جو ڀارتي جهازن پاڪستاني سرحدن ۾ گهڙڻ جي ڪوشش ڪئي ۽ پاڪستان جي هوائي فوج جي ڀرپور جوابي ڪارروائي بعد ڀارتي جهاز ڀڄي ويا.

ڊي جي آءِ ايس پي آر موجب، ڀارتي جهاز 2 لڳي 55 منٽن تي داخل ٿيا ۽ اسان جو رد عمل به ٻه لڳي 58 منٽن تي ٿيو، جنهن بعد هو واپس موٽي ويا، ايتري قدر جو ڊي جي آءِ ايس پي آر طرفان واقعي واري هنڌ جون تصويرون به جاري ڪيون ويون هيون، ايتري قدر جو پرڏيهي وزير شاهه محمود قريشي پاران عالمي ميڊيا کي واقعي واري هنڌ به وٺي وڃي صورتحال کان آگاهه ڪرڻ جو چيو آهي پر ڀارت ان ڳالهه کي مڃڻ لاءِ تيار ئي نه آهي ته پاڪستان ۾ ڪو به جاني نقصان نه ٿيو آهي. بهرحال ڀارت جي جنگي جنون سان خطي ۾ صورتحال انتهائي خراب ٿي وئي آهي.

جيڪڏهن هن وقت عالمي برادري پاڪستان ۽ ڀارت وچ ۾ پيدا ٿيل ڇڪتاڻ گهٽائڻ لاءِ ڪي به قدم نه کنيا ته اڳتي هلي اڃا وڌيڪ ڇڪتاڻ واري صورتحال ٿي سگهي ٿي، جنهن سان هن خطي ۾ امن امان جي صورتحال به خراب ٿي سگهي، جيئن ته ڀارت ۾ اليڪشن جو وقت آهي ۽ ڀارتي وزيراعظم نريندر مودي کي اليڪشن ۾ ڪامياب ٿيڻ لاءِ پنهنجي ملڪ جي عوام کي ڪجهه نه ڪجهه ڏيکارڻو ضرور هو ۽ نريندر مودي جي انهيءِ جنگي لاڙي ٻنهي ملڪن ۾ جيڪا ڇڪتاڻ واري صورتحال پيدا ڪئي آهي، ان سان مودي کي وقتي فائدو ته ملي سگهي ٿو پر ان سان لکين ماڻهو متاثر به ٿي سگهن ٿا، جنهن جي ڪري ڀارت کي جنگ کان پاسو ڪري ڳالهين واري ميز تي اچڻ گهرجي، ٻي صورت ۾ خطي جي صورتحال خراب ٿي سگهي ٿي. بالاڪوٽ ۾ ٿيل ڀارتي ايل او سي ڀڃڪڙي تي عالمي برادري به خاموش آهي، هن وقت تائين رڳو چين کان سواءِ ٻئي ڪنهن به ملڪ ڇڪتاڻ گهٽائڻ لاءِ ڪو به بيان نه ڏنو آهي.

پاڪستان طرفان هوائي حدن جي ڀڃڪڙي تي ڀارتي ڊپٽي هاءِ ڪمشنر کي طلب ڪري سخت احتجاج ڪيو. پرڏيهي کاتي جي ترجمان موجب ڀارتي جهازن ايل او سي جي ڀڃڪڙي ڪئي آهي ۽ ان جارحيت کي عالمي سطح تي اٿاريو ويندو، چيني پرڏيهي وزارت جي ترجمان لوڪينگ ڀارتي جهازن جي پاڪستاني حدن جي ڀڃڪڙي ۽ ان جي جواب ۾ پاڪستاني هوائي فوج جي فوري ڪارروائي کان پوءِ پيدا ٿيندڙ صورتحال تي ٻنهي ملڪن کي صبر جو مظاهرو ڪرڻ جي هدايت ڪئي آهي، چين چيو آهي ته اميد آهي ته ڀارت ۽ پاڪستان اهڙا قدم کڻندا جنهن سان خطي ۾ خوشحالي ۽ ٻنهي ملڪن جي لاڳاپن ۾ بهتري ايندي.

جيڪڏهن هن وقت ڏٺو وڃي ته ڀارت ۾ پاڪستاني سرحد اندر داخل جهازن واري واقعي تي مودي سرڪار پاران جشن ملهايو پيو وڃي ۽ چيو پيو وڃي ته پلواما واقعي جو ڀرپور جواب ڏنو ويو آهي، پاڪستان پاران به ڀارت کي ڀرپور جواب ڏيڻ جو سوچيو ويو آهي پر ان باوجود ڀارت جنگي جنون ختم نه ٿي سگهي آهي، ايتري قدر جو سنڌ اسيمبلي، پنجاب اسيمبلي ۽ خيبرپختونخواهه اسيمبلي ۾ ڀارتي فضائي حملي خلاف مذمتي ٺهراءُ به جمع ڪرايو ويو پر علي محمد خان چيو ته هي وقت ٺهرائن جو نه آهي، هي وقت ڀارت کي منهن ٽوڙ جواب ڏيڻ جو آهي، ان حوالي سان وزيراعظم عمران خان جي صدارت هيٺ قومي سلامتي جو اجلاس به ٿيو، جنهن دوران ڀارت کي ڀرپور جواب ڏيڻ جو فيصلوڪيو ويو آهي ۽ 3 رڪني ڪميٽي به جوڙي وئي آهي، جيڪا اپوزيشن جماعتن کي اعتاد ۾ وٺندي.

نواز ليگ اڳواڻ مريم نواز پنهنجي ٽوئيٽ پيغام ۾ چيو آهي ته سندس ملاقات اڳوڻي وزيراعظم نوازشريف سان جناح اسپتال ۾ ملاقات ٿي، جنهن دوران نوازشريف چيو ته پاڪستان جي الله حفاظت ڪري. ايتري قدر جو اڳوڻي صدر آصف علي زرداري، اپوزيشن ليڊر شهباز شريف، خورشيد شاهه، شيري رحمان، رحمان ملڪ، ثناءُ الله زهري ٻين ڀارتي جارحيت جي مذمت ڪئي آهي ۽ اهو سلسلو هن وقت به هلي رهيو آهي.

جڏهن پلواما واقعو ٿيو هو ته ان کانپوءِ فوري طور پرڏيهي وزير شاهه محمود قريشي گڏيل قومن جي سيڪريٽري جنرل انتونيو گوٽريس کي خط لکيو هو، جنهن ۾ چيو ويو هو ته گڏيل قومون ڀارتي ڌمڪين جو نوٽيس وٺندي فوري طور مداخلت ڪري، پر ان باوجود ڀارت طرفان اڳرائي ڪئي وئي، جنهن جو جواب ڏيڻ به تمام گهڻو ضروري آهي، پر ڀارت کي رڳو چونڊن جي حوالي سان پاڪستان خلاف پروپيگنڊا ڪرڻ درست عمل نه آهي، هڪ طرف والاريل ڪشمير ۾ ڪرفيو واري صورتحال تي ٻئي طرف وري ڀارتي ميڊيا پاڪستان خلاف زهر اوڳاڇي رهي آهي، ايتري قدر جو والاريل ڪشمير ۾ حريت اڳواڻن کي حراست ۾ به ورتو ويو آهي، اهڙي صورتحال پاوجود به سياسي پارٽين عزم ورجايو آهي هو ته والاريل ڪشميرين سان گڏ آهن.، جيڪڏهن ڏٺو وڃي ته ڀارت هر ڀيري پاڪستان تي الزام لڳائيندو آهي.

ڀارت ۾ ڪجهه به ٿئي ته ان جون ڪڙيون پاڪستان سان جوڙيون وينديون آهن پر پاڪستان طرفان ڪڏهن به اهڙو رويو اختيار نه ڪيو ويو آهي، ڇاڪاڻ ته پاڪستان ۾ جيڪي به حملا ٿيا آهن، اهي افغانستان مان ئي ايندا آهن، پاڪستان ۾ جيڪي به آپگهاتي حملا ٿيا آهن، انهن جون به ڪڙيون وڃي افعانستان سان ملنديون آهن، ايتري قدر جو ماڻهو اغوا ٿي ويندو آهي ته ان جو لاش به افغانستان مان ئي ملندو آهي ۽ پاڪستان طرفان بنا ثبوتن جي ڪڏهن به ڀارت تي الزام نه لڳايو ويو آهي، جيئن ته انصاف واري عالمي عدالت ۾ ڪلڀوش ياديو جو ڪيس هلي رهيو آهي، جنهن جو فيصلو اچڻ اڃا باقي آهي، ايف اي ٽي ايف جو اجلاس به ٿي چڪو آهي هر ڏسڻو اهو ايه ته پاڪستان جو نالو گري لسٽ م نڪري ٿو يا نه ؟ جيڪڏهن انهيءَ سڄي صورتحال کي ڏسجي ته ڀارت پاڪستان کي عالمي سطح تي اڪيلو ڪرڻ چاهي ٿو ۽ پاڪستان طرفان به اهو واضح ڪيو ويو آهي ته ڀارتي ڪوششون ناڪام بڻايون وينديون،

پي ٽي آءِ اڳواڻ فخر امام اڱاري ڏهاڙي قومي اسيمبلي جي اجلاس ۾ خطاب ڪندي چيو هو ته پاڪستان جيڪڏهن اسامه بن لادن خلاف آپريشن دوران ڪارروائي ڪري ها ته اڄ ڪنهن به ملڪ کي اهڙي ڪارروائي ڪرڻ جي جرئت نه ٿئي هئي، اجلاس ۾ اهو به چيو ويو ته پاڪستان 3 جنگن ۾ حصو وٺي چڪو آهي ۽ اهي جنگون ٻين جون هيون پر هي جنگ اسان جي پنهنجي آهي، ڀارت کي ڀرپور جواب ڏنو ويندو، ڀارت ڪنهن به غلط فهمي ۾ نه رهي. بهرحال ڀارت جي اڳرائن سان خطي ۾ ڇڪتاڻ ته پيدا ٿيندي پر ان سان گڏ دنيا جي ٻين ملڪن تي به ان جا خراب اثر پوندا، ڀارتين ڌمڪين سبب اسٽاڪ مارڪيٽ ۾ ٻاڙائي رهي، جڏهن ته ڪاروبار به ٺپ ٿي ويو آهي، ڀارتي رپئي جي مُلهه ۾ به لاٿ آئي آهي. هڪ ڳالهه ته صاف ظاهر آهي ته ڪنهن به مسئلي جو حل جنگ نه هوندي آهي، جنهن سبب ڀارت کي گهرجي ته ڪنهن به اڳرائي ڪرڻ کان اڳ ايترو ضرور سوچي ته ٻئي ملڪ ايٽمي طاقتون آهن ۽ عالمي برادري کي به گهرجي ته فوري طور ڇڪتاڻ تي ضابطو آڻڻ لاءِ پنهنجون ذميواريون پوري ڪري ٻي صورت ۾ خطي ۾ تمام وڏي ڇڪتاڻ پيدا ٿي سگهي ٿي، جنهن کي ختم ڪرڻ عالمي برادري بعد ۾ تمام گهڻو ڏکيو ٿي ويندو.

Monday 25 February 2019

وڌندڙ مهانگائي، مارچ ۾ ڇا ٿيندو؟

صاحب خان ڀٽي

سڌريل ۽ ترقي يافته ملڪن ۾ جڏهن به حڪومت عوام دشمن فيصلو ڪندي آهي ته عوام روڊن تي احتجاج ڪندو آهي ۽ اتان جا حڪمران عوامي رد عمل سبب پنهنجو فيصلو واپس وٺندا آهن، فرانس ۾ به مهانگائي ۽ تيل جي اگهن ۾ واڌ خلاف احتجاج ڪيو ويو، جنهن ۾ عوام وڏي انگ ۾ شرڪت ڪئي، ان کان پوءِ ٻين ملڪن ۾ به مهانگائي خلاف احتجاج ڪيو ويو پر اسان جي ملڪ ۾ اڃا تائين ڪنهن به وڌندڙ مهانگائي خلاف ڪو آواز نه اٿاريو ويو آهي، جنهن سبب حڪمران روز بجلي ۽ گيسن جي اگهن ۾ واڌ ڪري عوام مٿان مهانگائي جو بم ڪرائي رهيا آهن ۽ عوام ڪنهن مسيحا جو انتظار ڪري رهيو آهي پر لڳي نه ٿو ته ڪو مسيحا ايندو ۽ مهانگائي کان نجات ڏياريندو، عوام کي پاڻ ئي پنهنجي حقن لاءِ آواز اٿارڻو پوندو ڇاڪاڻ ته جيڪي پارٽيون اپوزيشن جو ڪردار ادا ڪنديون هيون، اهي اڄ ڪلهه احتساب جي سمنڊ ۾ ڦاٿل آهن، ڪڏهن انهن کي جيل ۾ وڌو ويندو آهي ته ڪڏهن وري انهن کي آزاد ڪيو ويندو آهي.

مطلب ته اندر ۽ ٻاهر ڪرڻ وارو سلسلو رڪجي نه سگهيو آهي ۽ اهو سلسلو گذريل ڪيترن ئي سالن کان هلي رهيو آهي، ملڪ جون ٻه وڏيون پارٽيون اڄ ڪلهه احتساب جي چڪي ۾ پسجي رهيون آهن ۽ ڪا به پارٽي هن ملڪ ۾ نه بچي آهي، جيڪا عوام جي لاءِ احتجاج ڪري ۽ حڪومت کي ڪنهن عوام دشمن فيصلي کان روڪي سگهي، پيپلزپارٽي هجي يا وري مسلم ليگ نواز ، انهن ٻنهي پارٽين جا اڳواڻ جيل وڃي رهيا آهن ۽ عدالتن ۾ به منهن ڏئي رهيا آهن ۽ انهن ٻنهي پارٽين وٽ ايترو وقت ئي نه آهي ته اهي عوامي مسئلن ڏانهن ڪو ڌيان ڏئي سگهن، باقي رهي ننڍين پارٽين جي ته اهي خاموش آهن، ڇاڪاڻ ته ڪجهه ڏينهن اڳ جيڪو ڪجهه مولوين سان ٿيو ، اهو به سڀني جي سامهون آهي، جيڪي عالم سڳورا نوازشريف خلاف اسلام آباد ۾ ڌرڻو هڻي ويهي رهيا هئا ۽ انهن خلاف ڪارروائي کان سيڪيورٽي ادارن کتو جواب ڏئي ڇڏيو هو، اهي ئي اڄ انهن کي فسادي ۽ ڏڦيڙ پکيڙيندڙ قرار ڏئي رهيا آهن، ميڊيا تي به حڪمرانن کي خوش ڪرڻ وارين خبرن کانسواءِ ڪجهه به نه هلي رهيو آهي، اپوزيشن جو ڪو خاص رد عمل به نظر نه اچي رهيو آهي.

جيڪڏهن اپوزيشن جو رد عمل اچي رهيو آهي ته اهو رڳو نيب جي گرفتارين خلاف اچي رهيو آهي، هر طرف نيب جي ڪاررواين خلاف رڙيون ٻڌڻ ۾ اچي رهيون آهن، سنڌ اسيمبلي جي اسپيڪر آغا سراج دراني جي گرفتاري تي اڳوڻي صدر آصف علي زرداري ڳڻتي جو اظهار ڪندي چيو آهي ته هاڻ بس، حڪومت کي وڌيڪ وقت نه ٿا ڏئي سگهون، ايتري قدر جو هڪ صحافي سوال ڪيس ته اهو احتجاج نيب جي ڪاررواين خلاف آهي يا وري عوام جي لاءِ آهي ته آصف علي زرداري صحافي کي جواب ڏيندي چيو ته اهو احتجاج عوام لاءِ آهي، مهانگائي خلاف آهي، اڳوڻي صدر آصف علي زرداري اسلام آباد ۾ ڪجهه ڏينهن پريس ڪانفرنس ڪندي چيو ته هو مولانا فضل الرحمان سان مارچ ۾ گڏ به ٿي سگهن ٿا ۽ پنهنجو الڳ احتجاج به ڪري سگهن ٿا.

جيڪڏهن ڏٺو وڃي ته حڪومت مديني واري رياست جون دعوائون ڪندي اقتدار ته حاصل ڪري ورتو پر عوام جي لاءِ مديني واري رياست جا سمورا دروازا بند ڪرڻ جي ڪا ڪسر نه ڇڏي آهي، حج تي سبسڊي ختم ڪري لک کان وڌيڪ خرچ حج تي وڌايا ويا آهن ۽ حج خرچ ۾ واڌ سبب اپوزيشن جو سخت رد عمل به سامهون آيو، جنهن تي مذهبي معاملن واري وفاقي وزير نورالحق قادري چيو ته جن وٽ پيساآهن، اهي حج ڪن، جن وٽ پيسا ناهن، اهي حج نه ڪن. مطلب ته حڪومت عوام کي فائدو ڏيڻ ۾ ڪا به سنجيدگي نه ڏيکاري رهي آهي،جيڪڏهن حڪومت کي عوام جو ٿورو به احساس هجي ها ته حج خرچ وڌائي ميديني واري رياست ڏانهن وڃڻ جا در بند ڪرڻ جي ڪوشش نه ڪري، هونئن ته هر شيءُ حڪومت مهانگي ڪري ڇڏي آهي، ايتري قدر جو تيل به مهانگو آهي ۽ ٻيون شيون به مهانگيون ڪيون ويون آهن، بي روزگاري به وڌي رهي آهي ۽ انهيءَ بيروزگاري واري لهر ۾ صحافتي ادارا به بچي نه سگهيا آهن، مطلب ته هر طرف حڪومت ڏڪار واري صورتحال قائم ڪري ڇڏي آهي، نواز ليگ اڳواڻ الزام لڳائي رهيا آهن ته پي ٽي آءِ حڪومت پيسا ڇاپي رهي آهي، جنهن سبب رپئي جو مُلهه گهٽجي ويو آهي ۽ ڊالر جو مُلهه وڌي ويو آهي.

اڳوڻو صدر آصف علي زرداري چئي رهي آهي ته تحريڪ انصاف کي حڪومت هلائڻ نه پئي اچي، حڪمرانن جي ڪري پاڪستان اڪيلو ٿي ويو آهي، جنهن جي جواب ۾ تحريڪ انصاف جي اڳواڻن چيو آهي ته پاڪستان اڪيلو نه ٿي رهيو آهي پر آصف علي زرداري اڪيلو ٿي رهيو آهي؟ هاڻ خبر نه ٿي پئي ته پاڪستان اڪيلو ٿي رهيو آهي يا وري اڳوڻو صدر آصف علي زرداري؟ ان بابت ته اهي پاڻ ئي ٻڌائي سگهن ٿا پر هڪ ڳالهه صاف ظاهر آهي ته تحريڪ انصاف جي حڪومت ۾ مهانگائي چوٽ تي چڙهي وئي آهي ۽ مهانگائي جو جن بوتل مان نڪري آيو آهي ۽ اها بوتل الائي ڪنهن وٽ آهي ۽ اهو جن الائي ڪنهن جي چوڻ تي هلي رهيو آهي، جيستائين انهن ٻنهي ڳالهين جي خبر نه پوندي، تيستائين اهو معاملو حل ٿيڻ ممڪن نه ٿيندو، باقي رهي ڳالهه تحريڪ انصاف حڪومت جي ته پوءِ هن حڪومت بجلي ۽ گيس جي اگهن ۾ تمام گهڻي واڌ ڪئي آهي، جنهن جو مثال تاريخ ۾ نه ٿو ملي.

جيڪڏهن ڏٺو وڃي ته مديني واري رياست ۾ مهانگائي واري جن جو ڪو به تصور نه آهي ۽ نه ئي وري مديني واري رياست ۾ ڌارين کي سڃاڻپ ڪارڊ ۽ شهريت ڏني ويندي آهي ۽ نه ئي وري انهن کي مستقل طور آباد ڪيو ويندو آهي، اهو ئي سبب آهي جو ڪيترائي پاڪستاني اڄ به مديني واري رياست ۾ قيد آهن پر اسان جي ملڪ ۾ ته سعودي جي عرب سڳورن کي هتي دعوتون ڏئي شڪار ڪرايو ويندو آهي ۽ عرب سڳورن کي خوش ڪرڻ لاءِ طعام تيار ڪرايا ويندا آهن ۽ مجال آهي جو ڪو سعودي سڳورن جي شڪار تي ڪو پابندي هڻي يا وري انهن کان ڪو پڇي ته اهي ناياب پکين ۽ جانورن جو شڪار ڇو ڪري رهيا آهن، عرب سڳورا ته شڪار ڪري سوشل ميڊيا تي تصويرون به شيئر ڪندا آهن، نه ئي ڪو محب وطن جانورن ۽ پکين جي تحفظ لاءِ عدالتن ۾ ويو آهي، ڇاڪاڻ ته انهن کي خبر هوندي آهي ته جيڪڏهن عرب سڳورن جو شڪار بند ڪيو ويو ته سندن روزگار بند ٿي ويندو، جيڪي به عرب سڳورن جا نوڪر ۽ انهن جا چمچا آهن، اهي نه ٿا چاهين ته ملڪ ۾ جانورن جي شڪار تي پابندي لڳائي وڃي، جيستائين عرب سڳورن لاءِ جانورن جي شڪار تي پابندي نه ٿي لڳائي وڃي، تيستائين انهن جي روزي هلندي رهندي؟

بهرحال اهو هڪ الڳ معاملو آهي پر تحريڪ انصاف جي حڪومت حاجي سڳورن کي ملندڙ سبسڊي ختم ڪرڻ جي منظوري ڏئي عوام مٿان هڪ ٻيو مهانگائي جو بم ڪيرايو آهي، نئين حج پاليسي موجب، حج پانڌيئڙا گذريل سال جي ڀيٽ ۾ ڏيڍ لک رپيا وڌيڪ ادا ڪندا، پنجاب، ڪي پي، فاٽا جي حج پانڌيئڙن لاءِ حج خرچن ۾ هڪ لک 56 هزار رپيا وڌيڪ ادا ڪندا، سنڌ ۽ بلوچستان جا حج پانڌيئڙا حج خرچن جي مَد ۾ هڪ لک 46 هزار رپيا وڌيڪ ادا ڪندا، اتر ريجن يعني اسلام آباد، پنجاب، ڪي پي ۽ فاٽا واسين لاءِ حج خرچ 2 لک 80 هزار رپين مان وڌي 4 لک 36 هزار رپيا ٿي ويو آهي. جڏهن ته سنڌ ۽ بلوچستان لاءِ حج خرچ 2 لک 70 هزار رپين مان وڌي 4 لک 26 هزار رپيا ٿي ويو آهي.

بهرحال مهانگائي خلاف سياسي پارٽين جي خاموشي ان ڪري آهي جو هو پنهنجا مسئلا حل ڪرائن يا عوام لاءِ روڊن تي نڪرن، جڏهن پيپلزپارٽي جي حڪومت هئي ته اپوزيشن خلاف ڪي به ڪيس نه هئا ۽ نوازشريف پيپلزپارٽي خلاف احتجاج ڪري رهيو ۽ جڏهن نوازشريف جي حڪومت هئي تڏهن وري تحريڪ انصاف ۽ پاڪستان عوامي تحريڪ جو سربراهه ڊاڪٽر طاهر القادري نوازشريف جي حڪومت خلاف ڌرڻاهڻي رهيا هئا، مطلب ته ان وقت اپوزيشن کي احتجاج حق هو ۽ اهو احتجاج ميڊيا تي به ڏيکاريو ويندو هو پرهاڻ ته ڪو احتجاج به ڪري ٿو ته اليڪٽرانڪ ميڊيا تي نظر نه ٿو اچي پر سوشل ميڊيا تي ضرور نظر ايندو آهي، اهو ئي سبب آهي.

جڏهن به اليڪٽرانڪ ميڊيا تي ڪا به خبر هلندي آهي ته پوءِ ماڻهو سوشل ميڊيا تي ان کي ڳولهڻ شروع ڪري ڇڏيندا آهن ۽ پوءِ ان خبر جي اصل حقيقت جي خبر پوندي آهي، اسان ته تحريڪ انصاف جي حڪومت کان اهو ئي مطالبو ڪنداسين ته اوهان ڀلي مديني واري رياست قائم ڪيو پر مديني واري اصل رياست جا در غريب عوام لاءِ بند نه ڪيو ۽ مهانگائي جو ايترو بار ملڪ جي غريب عوام مٿان نه وجهو جو اڳتي هلي عوام کي روڊن تي اچڻو پئي، جيڪڏهن عوام روڊن تي آيو ته پوءِ اهو احتجاج روڪڻ حڪمرانن لاءِ تمام گهڻو ڏکيو ٿي ويندو. باقي رهي ڳالهه سياسي پارٽين جي ته اهي به احتجاج جو سوچي رهيا آهن، ٻڌڻ ۾ اچي رهيو آهي ته جي يو آءِ سربراهه مولانا فضل الرحمان به مارچ ۾ احتجاج ڪندو ۽ پيپلزپارٽي به مڪمل حمايت جو اعلان ڪري ڇڏيو آهي، جڏهن ته پيپلزپارٽي پنهنجو الڳ احتجاج ڪرڻ جو به چيو آهي، جنهن کان پوءِ لڳي ٿو ته مارچ ۾ هڪ سياسي ڇڪتاڻ وارو ماحول هوندو، جيڪڏهن اپوزيشن گڏجي احتجاج ڪيو ته حڪومت پاران به ڪي قدم کڻڻ جا امڪان آهن، جيڪڏهن ان دوران طاقت جو استعمال ڪيو ويو ته حالتون اهڙيون خراب ٿي وينديون جو تحريڪ انصاف حڪومت ان کي ڪنٽرول ڪرڻ چاهيندي به نه ڪري سگهندي.

Pages

Thursday 28 February 2019

Wednesday 27 February 2019

Monday 25 February 2019

Sunday 24 February 2019

Saturday 23 February 2019

Friday 22 February 2019