Wednesday 30 November 2016
سنڌ جي عشق ۾ شهيد ٿي ويل سرويچ
صاحب خان ڀٽي
صوفين جي سرزمين تي ڪيترن ئي اهڙن ماڻهن جنم ورتو آهي جن پنهنجي محنت ۽ اڻ ٿڪ
جدوجهد سان وڏو نانءُ ڪمايو آهي ته ڪن وري پنهنجي ڌرتي خاطر جانين جا نذرانا ڏئي پنهنجي تاريخ لکي آهي جيڪي اڄ ۾
سڄي سنڌي قوم جي دلين ۾ زنده آهن، انهن کي اڄ به قوم فخر سان ياد ڪندي آهي ۽
انهن جي ڪيل خدمتن جا مثال ڏئي نوجوانن ۾
سنڌ ڌرتي سان محبت ۽ جدوجهد جو جذبو پيدا ڪيو ويندو آهي. ڪي ماڻهو اهڙا به هوندا
آهن جن کي ڪڏهن به وساري نه سگهبو آهي، اهي هميشه
هر هڪ جي دل ۾ ڌڙڪندا رهندا آهن، ان جو سڀ کان وڏو سبب اهو ئي هوندو آهي جو
اهي ماڻهو انسانيت جي خدمت تي يقين رکندا آهن ۽ پنهنجي قوم لاءِ جانين جو نذرانو ڏيڻ
کان به نه ڪيٻائيندا آهن، تنهن ڪري ئي چوندا آهن ته ڪي ماڻهو تاريخ ٿين ٿا ۽ انهن
ئي ماڻهن مان سرويچ پير زادو به هڪ هو، جنهن 9 فيبروري 1991ع موهن جي ڌڙي ڀرسان سنڌوءَ
جي ڪپ تي قائم ڳوٺ ٻلهڙيجي ۾ لطف پيرزادي
جي گهر ۾ جنم ورتو، جنهن کي ننڍ پڻ کان ئي لطيف جي شاعري سان وڏو لڳاءُ هو، جنهن
سبب کيس لطيف جو پارکو به سڏيو ويندو هو، سرويچ پيرزادي کي ننڍ پڻ کان ئي سنڌ سان
تمام گهڻي محبت هئي جنهن سبب سندس رڳ رڳ ۾ سنڌيت
شامل هئي، هو ذات پرستي کان پاڪ هو، کيس فڪر هو ته صرف ۽ صرف سنڌ ۽ سنڌ جي
ماروڙئن جو فڪر هو، سنڌ نوجوانن سان ٿيندڙ زيادتين، ڌارين جي لوڌ ۽ معدني وسيلن جي
ڦر لٽ تي سرويچ پيرزادي کي تمام گهڻي ڳڻتي هوندي هئي، جنهن سبب هن پنهنجي جدوجهد
جو مرڪز صرف ڪراچي کي بڻايو هو، سرويچ پيرزادي جي ان جدوجهد تي ديدار امرت جي
شاعري ڪتاب جا ڪجهه شعر ياد آيا آهن
بڻجي اڀرين تون!سنڌڙيءَ جو آواز،
علي! توتي ناز، آهي ساري سنڌ کي،
تنهنجو جذبو جوان، ڏسي مرڪي سنڌ،
علي! تنهنجي جند سنواريندي سنڌ کي.
جڏهن 2010ع ۾ مهاٻوڏ آئي هئي ته ان وقت سنڌ جا ڪامورا صرف بيان ڏيڻ ۾ پورا هئا ۽ متاثرن
لاءِ ايندڙ فنڊن کي ڳڙڪائڻ بابت ٽڪساٽ ڪري رهيا هئا ته ان وقت لطيف جي پارکو سرويچ
پيرزادي مهاٻوڏ جي متاثرن جي مدد لاءِ
جدوجهد شروع ڪئي هئي ۽ انهن جي هر ممڪن مدد ڪرڻ جي به ڪوشش ڪئي هئي، هر هڪ
احتجاج ڪندڙ سنڌي سان سرويچ هڪ آواز ٿي ويندو هو، سندس دل ڌڙڪندي هئي ته اها به
صرف سنڌ لاءِ ڌڙڪندي هئي، سندس اڻ ٿڪ محنت مان لڳندو هو ته هو سنڌ جو ڪو جوڌو هو،
سندس ڪيل ان محنت ۽ جدوجهد تي مون کي ديدار امرت جي شاعري ڪتاب جون ڪجهه سيٽون ياد
آيون آهن.
سوڀ مقدر تنهنجي ٿيندو،
منزل چمندي تنهنجا پير،
اُٿُ سنڌڙيءَ جا سرويچ سپاهي!
اُٿُ سنڌريءَ جا سورهيه شير!
اٿ سنڌڙي جا سورهيه شير!
سرويچ پيرزادي پنهنجي ننڍڙي عمر ۾ سنڌ کي پنهنجي ڇاتي ۾سمائي ڇڏيو هو، پر
افسوس جو سرويچ پيرزادو کي سنڌ جي راجڌاني شهر ڪراچي مان 2014 ع ۾گم ڪيو ويو، جنهن بعد سندس وارثن عدالتن جو به در کڙڪايو،
بيريسٽر ضمير گهمري سرويچ پيرزادي جي گمشدگي بابت عدالت ۾ داخل پٽيشن جي پيروي به ڪئي
هئي، ايتري قدر جو عدالت طرفان سرويچ پيرزادي کي بازياب ڪرائي عدالت ۾ پيش ڪرڻ جو
به حڪم به جاري ڪيو ويو، پر افسوس جو عدالت جي حڪم کي ڪنهن به اداري اهميت نه ڏني ۽
نه ئي سرويچ پيرزادي جي ڳولا لاءِ ڪي قدم کنيا ويا، عدالت ۾ اڃا ڪيس هلي رهيو هو
ته پهرين ڊسمبر تي نوري آباد ويجهو سرويچ پيرزادي جو لاش آيو، جنهن بعد سڄي سنڌ سوڳ
۾ مبتلا ٿي وئي هئي، سندس امڙ جي اکڙين ۾ لڙڪ هئا ته ٻي طرف وري سندس پيءُ پنهنجي
بهادر پٽ جي شهادت تي فخر ڪري رهيو هو ۽ چئي رهيو هو ته سندس پٽ کي سنڌ سان محبت ڪرڻ
جي ڏوهه ۾ شهيد ڪيو ويو، هر هڪ پارٽي طرفان به سرويچ پيرزادي جي چچريل لاش هٿ اچڻ
واري واقعي جي مذمت ڪئي وئي هئي، ايس اين پي سربراهه سيد جلال محمود شاهه، ايس ٽي
پي اڳواڻ قادر مگسي ۽ ٻين قومپرست ڪارڪنن طرفان ڏک جو به اظهار ڪيو ويو هو. سرويز
پيرزادي جي چچرل لاش هٿ اچڻ کانپوءِ مختلف شهرن ۾ احتجاج به ڪيا ويا هئا.
تو سوا هي چري، دل جهرندي رهي، ڳرندي رهي،
باهه وانگي هي دکندي رهي، ٻرندي رهي،
تنهنجو وڇوڙو سمنڊ هو، جنهن جنهن کي نه ڪو ساحل هو
ٻيڙي جيان هئي زندگي، ٻڏندي رهي، ترندي رهي.
هونءَ ته سنڌ ڌرتي کي رب پاڪ ڪراچي کان ڪشمور
۽ ڪارونجهر کان ڪاڇي تائين قدرتي خزانن ۽ اڻ کٽ معدني وسيلن سميت ڪيترن ئي
نعمتن سان مالا مال بڻايو آهي پر ان باوجود هتان جا پڙهيل لکيل نوجوان بي روزگاري
کان تنگ ٿي آپگهات ڪري رهيا آهن ته ڪي وري ڌرتي جي خوشحالي ۽ ماروئڙن جي ڏکن ۽
اهنجن کي گهٽائڻ لاءِ پاڻ پتوڙي رهيا آهن، معدني وسيلن سان مالا مال سنڌ جون
حالتون اڄ اتي اچي بٺيون آهن جو نه ڪو دانهن ٻڌڻ وارو آهي ۽ نه ئي ڪو انصاف ڪرڻ
وارو بچيو آهي، اهو ئي سبب آهي جو اڄ ڪراچي کان ڪشمور تائين ڌارين جي لوڌ کي ڀريو
ويو آهي ۽ صوفين جي ڌرتي کي دهشتگردن جي حوالي ڪري ڌرتي ڌڻين کي نڌڻڪو بڻايو ويو
آهي، سنڌ جي تيل ۽ گيس ڪمپنين ۾ به ڌرتي ڌڻين کي ڀرتي نه پيو ڪيو وڃي، ايتري قدر
جو ٿر مان نڪرندڙ ڪوئلي به ٿر واسين کي پريشانين جي ور چاڙهي ڇڏيو آهي، جنهن سبب
اهي اڄ به سراپا احتجاج بڻيل آهن، ديدار امرت به ٿر جي ماڻهن جي صورتحال کي پنهنجي
شاعري ڪتاب ۾ تمام بهتر بيان ڪيو آهي، سندس ڪتاب جي ڪجهه شاعري هي آهي .
اڻ کٽ ڪارو سون به آهي،
تيل گيس ۽ لوڻ به آهي،
هان پر ناهي کير جو ڍُڪ،
مانيءَ ڳڀو۽ پاڻي ٻُڪُ.
سنڌ جون يونيورسٽيون هجن يا وري ڪاليج اتي به ساڳيون ئي حالتون آهن، جتي سنڌي
شاگردن کي سنڌي لباس پائڻ کان به روڪيو وڃي ٿو،
جيڪڏهن ڪو احتجاج ڪري ته ان کي هيسائڻ به معمول بڻيل آهي، گهرن تي چڙهايون،
جهونن جون گرفتاريون به روز جو معمول بڻجي ويون آهن، سنڌ جي حقن بابت آواز اٿارڻ
تي ماڻهن کي کنڀي گم ڪيو وڃي ٿو، جيڪڏهن انهن جي بازيابي لاءِ ڪو احتجاج ڪري ته
انهن خلاف به ڪريڪ ڊائون شروع ڪيو ويندو آهي. پيپلزپارٽي جي جمهوري دور ۾ جسقم
چيئرمين بشير خان کي به شهيد ڪيو ويو، ايتري قدر جو سندس ڀاءُ ۽ ان جي ساٿي سلمان
وڌي کي به زنده ساڙيو ويو، ان کان اڳ به ٻين قومپرستن کي به شهيد ڪيو ويو پر ان
باوجود نه ته سنڌ حڪومت انهن جي قتل بابت ڪا جاچ ڪئي ۽ نه ئي ڪو خاص بيان ڏيڻ جي
زحمت ڪئي.جڏهن سنڌ ۾ قومي ڪارڪنن کي کنڀي گم ڪرڻ جو سلسلو شروع ٿيو ته ان وقت
اديبن ۽ صحافين احتجاجي مظاهرا ڪري ڌرڻا هنيا هئا،
سنڌ سرڪار به انهن جي احتجاجن تي ڪو به ڌيان نه ڏنو هو ۽ نه ئي وري سنڌي
نوجوانن جي کنڀجڻ واري معاملي کي سنجيدگي سان ورتو هو، جنهن بعد انهن مان ڪجهه
نوجوانن جا چچريل لاش به مليا هئا، جنهن سبب سڄي سنڌ سوڳ ۾ مبتلا ٿي وئي هئي. جڏهن
ته قومي دانشور عطا محمد ڀنڀرو جي فرزند جو چچريل لاش هٿ آيو هو، سنڌ جي مهان
اديب، ڏاهي ۽ دانشور سائين عطا محمد ڀنڀري
جي فرزند جو لاش ملڻ تي سڄي سنڌ جي اديبن ۽
دانشورن احتجاج به ڪيو هو.هونءَ ته گذريل ڪيتري ئي عرصي کان سنڌ ۾ ماڻهن کي کنڀي گم ڪيو پيو وڃي،
جيڪو سلسلو اڄ به جاري ۽ ساري آهي، هن وقت تائين استاد محمد راهمون، سهيل ڀٽي،
الله وڌائي مهر، مجيب چولياڻي، سني ڪاڪيپوٽي سميت ڪيترائي قومپرست ڪارڪن گم آهي جن
جو به هن وقت تائين ڪو پتو نه پئجي سگهيو آهي، عدالتن ۾ گمشدگين بابت ڪيس به هلي
رهيو آهي پر ان باوجود ماڻهن جي گمشدگين وارو سلسلو رڪجي نه سگهيو آهي. عدالتن کان
مٿانهين قتلن خلاف به ماڻهو سراپا احتجاج بڻيل آهي ۽ گم ٿيل ماڻهن جي بازيابي لاءِ
به احتجاج ڪيو پيو وڃي،
بهرحال اڄ سرويچ پيرزادي جي ٻي ورسي ملهائي پئي وڃي ۽ کيس ڀيٽا به پيش ڪئي پئي
وڃي ۽ هر هڪ ماڻهو کيس ياد به ڪري رهيو
آهي، جنهن سبب سرويچ هر هڪ جي دل ۾ زنده
آهي، سنڌ جا ساڃاهه وند، دانشور ۽ ماروئڙا اڄ به سرويچ جي سنڌ سان ڪيل محبت
۽ ڏنل قرباني کي سرخ سلام پيش ڪري رهيا آهن، جيتوڻيڪ اڄ سرويچ پيرزادو هن فاني
دنيا ۾ نه رهيو آهي تنهن باوجود هر هڪ شخص جي اکڙين ۾ سندس وڇوڙي جا لڙڪ
موجود آهن ۽ سندس شهادت تي فخر به آهي، ڇاڪاڻ
ته هي ڌرتي صوفين ۽ اوليائن جي ڌرتي آهي جتي انقلابي ماڻهو جنم وٺندا رهندا آهن، جڏهن
به سنڌ سان ظلم ٿيو آهي بهادرن جنم ورتو آهي ۽ سرويچ هڪ ڀيرو ٻيهر جنم وٺندو.
Tuesday 29 November 2016
Monday 28 November 2016
آرمي چيف جي مقرري ۽ راحيل شريف جون خدمتون
صاحب
خان ڀٽي
جڏهن
ملڪ ۾ نئين آرمي چيف جي مقرري بابت ميڊيا ۾ بحث شروع ٿيو هو ته ان وقت ڪجهه ماڻهو
چئي رهيا هئا ته جنرل راحيل شريف پنهنجي ملازمت جي مدي ۾ واڌ وٺندو پر جنرل راحيل
شريف ملازمت جي مدي واڌ نه وٺڻ وارو فيصلو ڪيو ۽ بيان ڏنو هو ته هو مقرر وقت تي
پنهنجو عهدو ڇڏي ڏيندو، تنهن بعد وڃي سموريون اڳڪٿيون دم ٽوڙي ويون هيون، پر جڏهن جنرل
راحيل شريف ههڙو اعلان ڪيو ته ان وقت سياسي ڌرين پاران تمام گهڻي واکان ڪئي و ئي
هئي ۽ جنرل راحيل شريف جو وقار اڃا وڌيڪ
بلند ٿي ويو هو، ڇاڪاڻ ته جنرل راحيل شريف واحد شخص هو جنهن اعلان ڪيو هو ته هو
ڪڏهن به ملازمت جي مدي ۾ و اڌ نه وٺندو پر افسوس جو ان وقت ڪجهه رجسٽرڊ تنظيمن
طرفان اسلام آباد، لاهور سميت ٻين شهرن ۾ آرمي چيف بابت بينر لڳايا ويا هئا جن ۾
لکيل هو ته آرمي چيف جنرل راحيل شريف وڃڻ جي ڳالهه نه ڪيو ۽ ڪجهه بينرن تي لکيل هو
اب نهي تو ڪب، ملطب ته اهڙن بينرن کان پوءِ سياسي اڳواڻن طرفان ڳڻتي جو به اظهار ڪيو ويو هو ۽ اهڙين بينرن جي ترديد به
ڪئي وئي هئي، تنهن باوجود حڪومت کي اها ڳڻتي به هئي ته آخر اهو ڪير آهي جيڪو فوج
کي اچڻ جي دعوت ڏئي رهيو آهي، تنهن بعد وڃي هڪ ٻه اڳوڻن جي ڳولا به ڪئي وئي هئي ته
آخر اهي ڪهڙا ماڻهو آهن جيڪي اهڙي قسم جا بينر لڳائي رهيا آهن، بعد خبر پئي هئي ته
اها تنظيم رجسٽرڊ به ٿيل آهي پر ايترو مشهور نه هئي جو هر ڪنهن ماڻهو کي ان بابت ڄاڻ هجي ها،
بهرحال خبرن جي ترديد کان پوءِ حڪومت طرفان ڪجهه ڪارروائي به ڪئي وئي هئي، جئين جئين آرمي
چيف جنرل راحيل شريف جي رٽائرڊ ٿيڻ جو وقت ويجهي اچي رهيو هو تئين تئين ان بابت
بحث به وڌندو پئي ويو، پر جڏهن ته آرمي چيف جنرل راحيل شريف 29 نومبر تي اختيار
منتقل ڪرڻ جو اعلان ڪيو ته ميڊيا ته اڃا وڌيڪ گرما گرم بحث شروع ٿي ويا، هر هڪ اهو
ئي سوچڻ لڳو ته آخبر پاڪ فوج جو نئون آرمي چيف ڪير ٿيندو؟، تڏهن نوازشريف طرفان
نئين آرمي چيف جي مقرري لاءِ مشاورت ڪئي
وئي هئي، جنهن دوران آرمي چيف ۽ چيئرمين جوائنٽ چيفس آف اسٽاف جي مقرري لاءِ
مشاورت به ڪئي وئي هئي. مشاورت دوران نئين آرمي چيف جي مقرري لاءِ 4 سينيئر ترين
ليفٽننٽ جنرلز زبير محمد حيات، اشفاد نديم، جاويد اقباد رمدي ۽ قمر جاويد باوجوده
جي نالن تي غور ڪيو ويو هو. جڏهن ته چيئرمين جوائنٽ چيفس آف اسٽاف ڪاميٽي لاءِ
زبير محمود حيات ۽ اشفاق ندي بابت به غور ويچار ڪيو ويو هو تڏهن هڪ دفعو ٻيهر
ميڊيا کي بريڪنگ نيو ز ملي وئي هئي ۽ آرمي چيف جنرل راحيل شريف جو بيان به شوشل
ميڊيا تي اچي ويو هو.
گذريل
ڇنڇر ڏهاڙي وزيراعظم ميان محمد نوازشريف جنرل
قمر جاويد باجوده کي فوج جو سرباهه ۽ جنرل زبير محمود حيات کي چيئرمين جوائنٽ چيفس
آف اسٽاف جو سربراهه قمر جاويد باجوده مقرر ڪيو هو ۽ ان سان ملاقات به ڪئي هئي، جيڪو اڄ آرمي چيف جي عهدي جو قسم
کڻي رهيو آهي، جيڪڏهن ڏٺو وڃي ته سينارٽي لسٽ ۾ پهرين نمبر تي موجود ۾ پهرين نمبر
محمود جنرل حيات هو. جنهن کي چيئرمين چيف جوائنٽ
چيف اسٽاف بڻايو ويو، جڏهن ته چوٿين نمبر تي موجود جنرل قمر جاويد باجوده کي فوج
جو سربراهه بڻاايو ويو، اهڙي طرح ٻئين ۽ ٽئين نمبر تي موجود جنرل اشفاق نديم احمد
۽ جنرل جاويد اقبال سپر سيٽ ٿيا جيڪي فوجي
روايتن موجب پنهنجي عهدن تان رٽائرمينٽ وٺي ڇڏيندا. پر جڏهن قوم کي خبر پئي تڏهن
سڄي ملڪ ۾ نئين آرمي چيف بابت بحث شروع
ٿيا، ميڊيا تي هڪ ڀيرو ٻيهر نئين آرمي چيف بابت خبرون هلڻ شروع ٿي ويون هيون.
آرمي
چيف جنرل راحيل شريف رٽائرڊ ٿيڻ کان اڳ الوداعي دورا به ڪيا، تنهن باوجود ڪجهه
ماڻهو اڳڪٿيون ڪري رهيا هئا ته راحيل شريف پنهنجي ملازمت جي مدي ۾ واڌ وٺندو، اهي
سمورا اهو چئي رهيا هئا ته آرمي چيف جنرل راحيل شريف جيڪي به دهشتگردن خلاف آپريشن
شروع ڪيا هئا انهن ختم ٿي ويندا پر آرمي چيف جنرل راحيل شريف پنهنجي بيان ۾ چيو ته
ڪو به آپريشن سندس وڃڻ کان پوءِ بند نه ٿيندو ۽ سمورا آپريشن جئين جو تئين جاري
رهندا، جئين اڳ هلي رهيا هئا. آرمي چيف جي اهڙي بيان بعد قوم کي وڃي ساهه پيو هو،
ڇاڪاڻ ته جنرل راحيل شريف جيڪي به ملڪ ۾ آپريشن شروع ڪيا هئا ان سان ملڪ ۾ امن
امان جي صورتحال بهتر ٿي هئي ۽ دهشتگردن کي ڪافي حد تمام گهڻو نقصان به پهچايو
ويوهو، ملڪ ۾ امن امان جي صورتحال قائم ڪرڻ تي جنرل راحيل شريف جي ڏيهه توڙي
پرڏيهي ۾ رڪارڊ واکاڻ ڪئي وئي هئي ۽ پاڪ فوج جي خدمتن کي ساراهايو ويو هو.
جنرل
راحيل شريف جڏهن سوات، خيبرايجنسي ۽ ملڪ
جي ٻين ڪيترن ئي شهرن ۾ آپريشن ڪيو ته ڏوهارين کي لڪڻ جي جڳهه نه ملي رهي هئي ۽ دهشتگرد ٻرن لڪي ويا
هئا جيڪي لڪي لڪي وار ڪرڻ تي مجبور ٿي ويا، ايتري قدر جو دهشتگردن اهڙين ڪاررواين
۾ واڌ به ڪئي هئي ۽ هن ملڪ ۾ آرمي پبلڪ اسڪول تي حملي ۾ ڪيترن ئي معصوم ٻارڙن کي
به قتل ڪيو ويو هو، ان جو سڀ کان وڏو سبب اهو هئي هو ته هن ملڪ ۾ دهشتگردن جي
خاتمي لاءِ ترت قدم کنيا پئي ويا، جنهن سبب دهشتگرد پاڪ فوج جي جوانن کان ڀڄي رهيا
هئا. جنرل راحيل شريف جي رٽائرڊ ٿيڻ جي ويجهو ايندي ئي ڀارت کي به ساهه پئجي ويو
هو ۽ ڀارت طرفان پاڪستان کي به مختلف قسمن جون ڌمڪيون ڏنيون پئي ويون، ايتري قدر
جو ڀارت طرفان اهو به چيو هو ته هو
پاڪستان جو پاڻي به بند ڪري ڇڏيندا، جنهن جي پاڪستان طرفان مذمت به ڪئي وئي هئي
۽ گڏيل قومن ۾ پاڪستان جي مقرر نمائنده مليحه لوڌي به پنهنجي بيان چيو هو ته
ڀارت پاڻي کي هٿيار جي اوزار طور استعمال
ڪرڻ چاهي ٿو جنهن جي هو سخت لفظن ۾ مذمت ڪن ٿا، تنهن باوجود ڀارت پنهنجي هوڏ تان
نه لٿو هو ۽ پاڪستان خلاف زهر جهڙا لفظ ڳالهائيندو هو .
جيتوڻيڪ
ايل او سي تي پاڪ فوج جا جوان الرٽ هئا پر ان باوجود ڀارت طرفان پاڪستان تي اڳرائي
جو سلسلو جاري آهي، ڪجهه ڏينهن کان سرحد وٽ ڇڪتاڻ واري به صورتحال آهي، جڏهن ڀارت
طرفان سرحد وٽ سرجيڪل اسٽرائيڪل جي دعويٰ ڪئي وئي هئي ته ان وقت پاڪ آرمي طرفان چيو ويو هو ته ڀارت طرفان ڪو به
سرجيڪل اسٽرائيڪ نه ڪيو ويو، جيڪي سرحد پار ڪري آيا انهن خلاف ڪارروائي ڪئي وئي،
ايتري قدر جو ڀارت طرفان سرجيڪل اسٽرائيڪ جي دعويٰ دوران پاڪستان جي ڪيترن ئي
نوجوانن کي شهيد ڪرڻ جي دعويٰ به ڪئي وئي، جڏهن ته پاڪستان طرفان به ڀرپور جواب
ڏنو ويو ايتري قدر جو پاڪستان طرفان هڪ ڀارتي فوجي اهلڪار کي به سوگهو ڪيو ويو هو
جنهن جي حوالگي جو ڀارت مطالبو به ڪيو هو. جڏهن ته گڏيل قومن جي سيڪريٽري جنرل بان
ڪي مون طرفان پاڪ ڀارت سرحد ڇڪتاڻ تي ڳڻتي جو اظهار ڪيو ويو هو ۽ بان ڪي مون طرفان
پاڪستان ۽ ڀارت کي ڇڪتاڻ ختم ڪري ڳالهين جو دڳ وٺڻ جي صلاح ڏني هئي جنهن کي ڀارت
نه مڃيو جنهن سبب نريندر مودي پاڪستان خلاف مختلف وقتن تي بيان ڏيندو رهيو آهي.
بهرحال
آرمي چيف جنرل راحيل شريف ويندي ويندي اهو واضع طور اعلان ڪري چڪو آهي ته سندس وڃڻ
کان پوءِ به ملڪ ۾ سمورا آپريشن جاري رهندا ۽ انهن تي ڪي به اثر نه پوندا، جڏهن ته
ڀارت طرفان به نئين آرمي چيف جي مقرري تي ڳڻتي ظاهر ڪئي وئي آهي ۽ ڀارتي آرمي چيف
طرفان اهو بيان ڏنو ويو آهي ته پاڪ فوج جو نئون سربراهه کان ڀارت کي هوشيار رهڻو
پوندو، جيڪڏهن ڏٺو وڃي ته ڀارت جي اهڙي بيان کان پوءِ اهو محسوس ٿي رهيو آهي ته
ڀارت نئين آرمي چيف جي مقرري کان به تمام گهڻو پريشان نظر اچي رهيو آهي، جنهن جو
اندازو هاڻوڪي بيانن مان لڳائي سگهجي ٿو، جڏهن ته جنرل راحيل شريف جون قوم لاءِ
ڪيل خدمتون هميشه ياد رکيون وينديون، ڇاڪاڻ ته جنرل راحيل شريف واحد آرمي چيف آهي
جنهن ملازمت جي مدي ۾ واڌ نه وٺي سچي سپهه سالار
سان گڏ قوم جي تحفظ لاءِ هر ممڪن قدم کنيا آهن.
Sunday 27 November 2016
Friday 25 November 2016
پروين شاڪر، 1952 ع ۾ ڪراچي ۾ جنم ورتو
محبت ۽ خوشبوئن جي شاعره طور سڃاتي ويندڙ پروين شاڪر جو اڄ 64 هون جنم ڏينهن
ملهايو پيو وڃي.
پروين شاڪر، 1952 ع ۾ ڪراچي ۾ جنم ورتو.انگريزي ادب ۾ ماسٽر جي ڊگري وٺڻ کان
پوءِ هوءَ اعليٰ سرڪاري عهدي تي فائز رهي. پروين شاڪر ڪجهه عرصو ڪراچي يونيورسٽي ۾
پڙهائڻ واري شعبي سان لاڳاپيل رهي.
پروين شاڪر کي منفرد لهجي جي شاعره هجڻ ڪري مختصر عرصي ۾ نهايت ئي گهڻي شهرت
حاصل ٿي.
ڪنهن کي ڪهڙي خبر هئي ته پروين شاڪر، هڪ دنيا کي پنهنجي سحر ۾ گرفتار ڪري وٺندي
۽ دنيا سندس لفظن جي حسن جي ديواني ٿي ويندي. هر جاءِ سندس فن جا چرچا هوندا ۽ مٿس
ڪاميابين جا ايترا دروازا کلي ويندا جو دنيا
حيران ٿي ويندي.
پروين شاڪر تيزي سان پنهنجي شاعري
واري سفر جون منزلون طئي ڪري ورتيون ۽ هوءَ شاعري کي سڄي عمر ڏيندڙ ڪيترن ئي سينئر
شاعرن کان اڳتي نڪري وئي.
هن خوبصورت شاعره جي صورت ۾ شاعري ۾ تهذيب، شائستگي ، جمال ، فن ۽ فڪر جا نوان
دروازا کلندي ڏٺا ويا .
ڪجهه ماڻهو پروين شاڪر کي رڳو محبت جي شاعره طور محدود ڪري ڇڏيندا آهن جيڪوخيال
سراسر غلط آهي
پروين شاڪر جي شاعري جون ڪيتريون ئي شڪليون
۽ ڪيترائي حوالا آهن. هن وٽ انسان جي احترام جا ڪيترائي ڏيئا ٻرندي نظر اچن
ٿا ته هن ظلم ۽ جبر خلاف به ڪيترائي اشارا
ڪيا آهن.
پروين شاڪر کي پنهنجي ڌرتي پنهنجي مٽي سان تمام گهڻي محبت هئي .هوءَ پنهنجي
وطن سان پنهنجي وجود جي نسبت کي نهايت وڏو اعزاز سمجهندي هئي .
پروين شاڪر عملي زندگي ۾ ڪيتريون ئي شڪستون کاڌيون،سندس زندگي ۾ ڪيترائي خال
هئا جيڪي شايد ان جي مرڻ گهڙي تائين پورا نه ٿي سگهيا.
پروين شاڪر خوشبو، صد برگ، خودڪلامي ۽ انڪار جي صورت ۾ جيڪي شعري مجموعا ڇڏيا
آهن اهي صدين تائين پروين شاڪر کي زنده رکندا.
ان ڪري پروين شاڪر کي ڪجهه لمحن نه پر زمانن
جي شاعره چئجي ته وڌيڪ مناسب لڳندو .........
Thursday 24 November 2016
Subscribe to:
Posts (Atom)