Sahib khan bhatti: July 2017

Sunday 30 July 2017

چوڌري نثار جي استعيفيٰ ۽ وزيراعظم جي پريشاني

صاحب خان ڀٽي

سپريم ڪورٽ ۾ پاناما ليڪس ڪيس جي جي آءِ ٽي رپورٽ بابت فيصلو محفوظ ٿيڻ کانپوءِ وزيراعظم نوازشريف جي پريشاني ۾ تمام گهڻو اضافو ٿي ويو آهي ۽ اها پريشاني دور ڪرڻ لاءِ وزيراعظم نوازشريف ڪٽنب سميت مري گهمڻ هليو ويو آهي، هڪ طرف پاناما ليڪس جي پريشاني ۾ سندس جان آجي ئي نه ٿي هئي ته مٿان وري ناراض پارٽي اڳواڻ چوڌري نثار جي استعيفيٰ به سندس پريشاني ۾ واڌ ڪري ڇڏي آهي. ان حوالي سان نواز ليگ اڳواڻ به ٿرٿلي ۾ اچي ويا آهن ۽ ريلوي واري وفاقي وزير خواجا سعد رفيق چيو آهي ته وفاقي گهرو وزير چوڌري نثار ۽ نوازشريف جو ساٿ 35 ورهيه پراڻو آهي ۽ هو ڪنهن به صورت ۾ اهڙو ڪو قدم نه کڻندو، ٻئي طرف وري سڌ سماءُ جي وزير مريم اورنگزيب چيو آهي ته تصديق بنا چوڌري نثار بابت ڪا به خبر نه هلائي وڃي پر پرنٽ، اليڪٽرنڪ ۽ سوشل ميڊيا تي گذريل ڪجهه ڏينهن کان اهي بحث ٿي رهيو آهي ته چوڌري نثار وزيراعظم نوازشريف کي استيفيٰ جو مشورو ڏنو هو پر وزيراعظم نوازشريف اهڙي مشوري کان انڪار ڪيو هو ۽ جي يو آءِ ( ف) مولانا فضل الرحمان ۽ محمود اچڪزئي سميت ٻين اڳواڻن وزيراعظم کي اهو مشورو به ڏنو هو ته هو استعيفيٰ نه ڏئي ڇاڪاڻ ته وزيراعظم کي عوامي مينڊيٽ حاصل آهي ۽ عوامي نمائيندو آهي، ان جي ڪري ئي وزيراعظم نوازشريف پنهنجي بيانن ۾ چوندو رهيو آهي ته هو عوام طرفان رد ڪيل پارٽي اڳواڻن جي چوڻ تي استعيفيٰ نه ڏيندو.

هونئن ته پنجاب جي وڏي وزير شهباز شريف وفاقي گهرو وزير چوڌري نثار سان ملاقات ڪري معاملا نبيرڻ جي ڪوشش ڪئي آهي پر سندن پريس ڪانفرنس مان لڳي رهيو هو ته اڃا به کوڙ سارا مطالبا چوڌري نثار جا ناهن مڃيا ويا، جنهن سبب ريلوي واري وفاقي وزير خواجا سعد رفيق چيو هو ته چوڌري نثار نواز ليگ نه ڇڏيندو ۽ سندس ساٿ تمام گهڻو پراڻو آهي، باقي رهي ڳالهه بيان ڏيڻ جي ته اهو وري جمهوريت جو سونهن آهي. اختلاف رکڻ هر ڪنهن جو حق آهي. مطلب ته چوڌري نثار جا ٻيا سمورا مطالبا ته نواز ليگ قبول ڪري ورتا آهن پر هڪ اهڙو مطالبو به آهي، جيڪو نواز ليگ قبول ڪرڻ کان لنوائي رهي آهي ۽ اهو مطالبو ڪهڙو آهي، ان بابت ته نوازليگ يا وري چوڌري نثار ئي ٻڌائي سگهي ٿو. جيڪڏهن ڏٺو وڃي ته نوازشريف جيڪي پيپلزپاررٽي جي دور ۾ احتجاج ڪيا ان کان وڌيڪ خراب حالتون سندس حڪومت ۾ ٿيون آهن.

پاناما بابت جي آءِ ٽي جي رپورٽ تي فيصلو محفوظ ٿيڻ بعد اپوزيشن پارٽين به اجلاس سڏائڻ وارو عمل تيز ڪري ڇڏيو آهي، پيپلزپارٽي ۽ تحريڪ انصاف طرفان به اجلاس طلب ڪيا ويا هئا، جن ۾ انهن پارٽين جي اڳواڻن به شرڪت ڪري پاناما تي فيصلو محفوظ ٿيڻ بعد واري صورتحال تي غور ويچار ڪيو هو. تحريڪ انصاف سربراهه عمران خان ۽ پيپلزپارٽي طرفان وزيراعظم کان استعيفيٰ جو مطالبو به ڪيو ويو، هي ڪو پهريون ڀيرو نه هو جو پيپلزپارٽي ۽ تحريڪ انصاف طرفان وزيراعظم کان استعيفيٰ گهري وئي هجي، ان کان اڳ به اهڙو مطالبو ٿيندو رهيو آهي.

جيڪڏهن پيپلزپارٽي جي گذريل حڪومت جي سياسي صورتحال تي نظر ڦيرائينداسين ته اڄ واريون حالتون پيپلزپارٽي کي پيش آيون هيون. جڏهن محترمه بينظير ڀٽو کي شهيد ڪيو ويو هو ته ان کانپوءِ پيپلزپارٽي کي حڪومت ملي هئي ۽ ان حڪومت کي ڪجهه ڏينهن مس گذريا هئا ته نواز ليگ طرفان اڳوڻي جنرل پرويز مشرف طرفان هٽايل چيف جسٽس افتخار چوڏري جي بحالي لاءِ احتجاج شروع ڪيا هئا پر ان کان اڳ نواز ليگ طرفان مشرف جي دور ۾ اهڙي ڪا به جدوجهد نه ڪئي وئي هئي، بهرحال نواز شريف طرفان جيڪو احتجاج جو سلسلو شروع ڪيو ويو ان مطالبي کي اڳوڻي صدر آصف علي زرداري صاحب قبول به ڪيو هو ۽ افتخار چوڌري کي بحال به ڪري ڇڏيو هو، جڏهن پيپلزپاٽي نواز ليگ مان جان ڇڏائي ته مٿان طاهر القادري به ميدان ۾ لهي آيو هو ۽ ان کان پوءِ ڪراچي ۾ دهشتگردن مفاهمت جي نالي تي رت جي راند کيڏي هئي ۽ پيپلزپارٽي مفاهمت جي نالي تي سڀ ڪجهه بردشت ڪيو هو. ايتري قدر جو نواز ليگ طرفان يوسف رضا گيلاني کان استعيفيٰ جو به مطالبو ڪيو ويو هو ۽ يوسف رضا گيلاني عدالتي فيصلي کي قبول ڪندي نااهل به ٿي ويو هو پر اڄ ٿوريون حالتون تبديل نظر اچي رهيون آهن جيڪا پارٽي ٻين کان استعيفيٰ جو مطالبو ڪندي هئي اها پارٽي اڄ سمورين پارٽين جي استعيفيٰ واري مطالبي کان مڃڻ کان انڪار ڪري رهي آهي ۽ ان مطالبي کي غير آئيني ۽ غير قانوني قرار ڏنو پيو وڃي.

جڏهن نواز ليگ اقتدار ۾ آئي ته ان وقت به پيپلزپارٽي چونڊن کي قبول ڪيو هو ۽ ٻنهي پارٽين ۾ لاڳاپا به بهر هئا پر وقت گذرڻ سان گڏوگڏ ٻنهي پارٽين ۾ اختلاف وڌيا ۽ ان جا ڪارڻ به ڪيترائي هئا، ڪڏهن رينجرز جي اختيارن تي چوڌري نثار ۽ پيپلزپارٽي جي اڳواڻن جا بيان هئا ته ڪڏهن وري پاڻي ۽ ٻين مسئلن تي ٻنهي پارٽين ۾ لاڳاپا متاثر ٿيا، جڏهن اڳوڻو صدر آصف علي زرداري علاج جي بهاني پرڏيهه ويو ته ان وقت به ٻنهي پارٽين ۾ اختلاف ٿيا هئا ۽ اختلاف ان وقت ظاهري طور سامهون آيا جڏهن مفاهمت وارو پاسو ڇڏي تحريڪ انصاف جي شروع ڪيل جدوجهد ۾ شامل ٿيڻ جو فيصلو ڪيو ويو هو. ڪڏهن ڪڏهن ته چوڌري نثار ۽ پيپلزپارٽي اڳواڻن وچ ۾ اختلاف ايترا ته چوٽ چڙهي ويندا هئا جو وزيراعظم نوازشريف کي پرچائڻو پئجي ويندو هو.

هاڻ جڏهن پيپلزپارٽي به وزيراعظم نوازشريف کان استعيفيٰ جو مطالبو ڪري رهي آهي ته ان وقت نوازليگ جا اڳواڻ ان کي غيرقانوني قرار ڏئي رهيا آهن. بهرحال هاڻ وقت ئي ٻڌائيندو ته وزيراعظم نوازشريف استعيفيٰ ڏئي ٿو يا وري کانئس ورتي ٿي وڃي، ان بابت چوڻ وقت کان اڳ ئي هوندو.جيڪڏهن ڏٺو وڃي ته ايندڙ چونڊن ۾ باقي ٿورو ئي وقت رهجي ويو آهي، عوامي مسلم ليگ جي سربراهه شيخ رشيد چيو آهي ته سياست جو فيصلو 2018 ع ۾ نه پر 2017ع ۾ ٿيڻو آهي، ان کان به شيخ رشيد اڳڪٿيون ڪندو رهيو آهي، ڪڏهن قرباني کان اڳ قرباني جي ڳالهه ڪندو آهي ته ڪڏهن وري چوندو آهي ته کيس بوٽن جو آواز اچي رهيو آهي. پر هاڻ چئي رهيو آهي ته اڳ عيد کان اڳ ئي ڪاسائي هليو ويو هو پر هاڻ ايئن نه ٿيندو.

بهرحال هن قت سڄي ملڪ جي عوام جون نظرون پاناماليڪس جي فيصلي تي لڳل آهن، ڇاڪاڻ ته ڪجهه ماڻهو ان فيصلي کي وڏو اهم قرار ڏئي رهيا آهن، ڇاڪاڻ ته هي تاريخ ۾ پهريون ڀيرو ٿيندو جو ڪنهن پنجاب جي سياستدان کي عدالت مان سزا ملندي هجي.

وزيراعظم بابت به فيصلو محفوظ ٿي چڪو آهي، تحريڪ انصاف سربراهه عمران خان خلاف غير ملڪي فنڊنگ جا الزام لڳل آهن ۽ مٿس ڪيس به هلي رهيا آهن، جيڪو به هڪ وڏو حساس معاملو آهي، هاڻ ڏسڻو اهو آهي ته تحريڪ انصاف جي مستقبل جون عدالتون ڪهڙو ٿيون فيصلو ڪن؟

Wednesday 19 July 2017

Daily Awami Awaz, Sahib khan bhatti article

Saturday 15 July 2017

پاناما، ڪاسائي ۽ جمهوريت

صاحب خان ڀٽي

عوامي مسلم ليگ جي سربراهه شيخ رشيد چيو آهي ته اڳ قرباني کان اڳ ڪاسائي ڀڄي ويو هو پر هاڻ حالتون تبديل ٿي چڪيون آهن، جنهن تي نواز ليگ به تمام گهڻو ٻڙڌڪ مچايو آهي پر هن وقت تائين ٻنهي پارٽين اهو واضح نه ڪيو آهي ته آخر اهو ڪاسائي آهي ڪير؟ بهرحال ڪاسائي ڪير آهي ۽ اهو ڪڏهن ظاهر ٿيندو، ان بابت ٻنهي پارٽين کي ضرور خبر هوندي جو اڄ ڪلهه ڪاسائي جو ذڪر عام ٿي ويو آهي.

جيتوڻيڪ هن وقت تحريڪ انصاف، پيپلزپارٽي ۽ ٻين اپوزيشن پارٽين پاران وزيراعظم نوازشريف کان استعيفيٰ جو مطالبو ٿي رهيو آهي، ته ساڳي وقت ئي اي اين پي ۽ هڪ ٻي جماعت پاران وزيراعظم نوازشريف کان استعيفيٰ جو مطالبو نه ڪرڻ جو فيصلو ڪيو ويو آهي، انهن جو موقف آهي ته وزيراعظم نوازشريف کان سپريم ڪورٽ جي فيصلي کان اڳ استعيفيٰ جو مطالبو ڪرڻ درست عمل نه آهي.

جيڪڏهن ڏٺو وڃي ته هن وقت دهشتگردي به ملڪ جي اندر وڌي رهي آهي ته سياست ۾ گرما گرمي اچي وئي آهي. اپوزيشن ميمبرن پاران به پارلياماني پارٽين جو اجلاس سڏايو ويو هو پر ان ۾ به سياسي پارٽين طرفان اهو اتفاق نه ٿي سگهيو ته آخر وزيراعظم کان استعيفيٰ ڏيڻ گهرجي يا نه، البته اپوزيشن ليڊر خورشيد، ايم ڪيو ايم پاڪستان جي اڳواڻ فاروق ستار ۽ تحريڪ انصاف سربراهه عمران خان پاران وزيراعظم نوازشريف کان استعيفيٰ جو مطالبو ڪيو پيو وڃي، اهڙي مطالبي جي رد عمل ۾ وزيراعظم نوازشريف چيو آهي ته هو انهن سياستدانن جو مطالبو نه مڃيندو جن کي عوام رد ڪري ڇڏيو آهي. اهڙن بيانن کان پوءِ حڪومت ۽ اپوزيشن پارٽين طرفان حڪمت عملي جوڙڻ لاءِ اجلاس به ٿي رهيا آهن، ڪجهه سياستدان چئي رهيا آهن ته پاناما ڊرامو هاڻ ختم ٿي رهيو آهي، اڄ ڪلهه ڪي پي ۾ تحريڪ انصاف سربراهه عمران خان ته سنڌ ۾ وري پيپلزپارٽي ڪو چيئرمين آصف زرداري سنڌ جا دورا ڪري رهي آهي.

ريلوي واري وفاقي خواجا سعد رفيق چيو آهي ته پاناما ذريعي پاڪستان کي نشانو بڻايو ويو آهي، هاڻ خبر نه ٿي پئي ته پاناما ذريعي پنهنجي سياست چمڪائي يا وري پاڪستان کي نشانو بڻايو ويو؟ اهو ته اهي سياستدان ئي ڄاڻين.ڪجهه ساڃاهه وندن جو خيال آهي ته هن ڀيري هڪ ٻيو بحران جمهوري بحران جنم وٺڻ وارو آهي، ڇاڪاڻ ته پيپلزپارٽي به پنهنجي واري وٺي چڪي آهي ۽ نواز ليگ به پنهنجو مدو پورو ڪرڻ واري آهي.

هاڻ ڏسڻو اهو آهي ته هن ڀيري ٽئين واري ڪنهن جي ٿي ٿئي؟ جڏهن اڳوڻي يوسف رضا گيلاني کي عدالت پاران نااهل ڪيو ويو ته ان وقت پيپلزپارٽي صبر ۽ تحمل کان ڪم ورتو هو ۽ عدالت جي فيصلي کي تسليم ڪندي هڪ ٻئي پارٽي اڳواڻ کي وزيراعظم چونڊرايو هو پر هن ڀيري پنجاب جي شينهن سنڌ جي تير کي مات ڏئي ڇڏي آهي،

ماضي ۾ نوازشريف سان ڇا ٿيو هو ۽ ڪهڙي ريت کيس ملڪ مان نيڪالي ڏني وئي اهو سڀ ڪجهه ڪنهن به ماڻهو کان اڃا وسريو نه آهي، جڏهن رٽائرڊ جنرل پرويز مشرف نواز ليگ جو تختو اونڌو ڪيو هو ان وقت حالتون تبديل هو، ان وقت نه ته پرڏيهي ميڊيا هن ملڪ جون سياسي خبرون ڏيکاريندي هئي ۽ نه ئي سوشل ميڊيا جو سهارو هوندو هو، اهو ئي سبب هو جو ان وقت پرويز مشرف هڪ جمهوريت جو تختو اونڌو ڪرڻ ۾ ڪامياب ٿي ويو هو پر هن وقت پرڏيهي ميڊيا جون نظرون به پاڪستان جي سياسي صورتحال تي آهن ته سوشل ميڊيا تي به باهه ٻريل آهي، جنهن سبب سوشل ميڊيا تي پابندي هڻڻ جون ڪوششون ڪيون پيون وڃن، ڇاڪاڻ ته انهن ادارن جي تمام گهڻي بي عزتي به ٿي رهي آهي، جيڪي ملڪ ۽ قوم جي خلاف فيصلا ڪري رهيا آهن ۽ انهن جا ڪرتوت سوشل ميڊيا تي وائکا ٿي رهيا آهن، جنهن سبب نه ته سياستدانن کي سوشل ميڊيا تي اظهار جي آزدي جو حق پسند آهي ۽ نه ئي وري اهي ادارا چاهين ٿا سندن خلاف ڪا به پوسٽ شيئر ٿئي، جنهن سبب نوان نوان قانون جوڙيا پيا وڃن.

هن ملڪ ڪنهن ڪرپشن ڪئي ۽ ڪنهن نه ڪئي، اهو ايڏو مسئلو نه آهي پر سڀ کان وڏو مسئلو اهو آهي ته آخر ڪرپشن ختم ڪيئن ڪجي؟ ۽ ان جو علاج ڪهڙو آهي، ان ڏانهن ڪير به ڌيان نه ڏئي رهيوآهي. هن وقت سياستدانن جمهوريت کي لوڏي ڇڏيو آهي، صرف پنهنجي انا ۽ پنهنجي ضد جي خاطر جمهوريت کي هڪ ڀيرو ٻيهر داءُ تي لڳائي ڇڏيو آهي.

هن ڀيري جيڪڏهن جمهوريت کي ڪجهه ٿيو ته ان جا ذميوار به سياستدان ئي هوندا، هن وقت عالمي منظرنامو به تبديل ٿي رهيو آهي، آمريڪا جون نظرون به سي پيڪ منصوبي تي آهن، جنهن بابت اسٽيبلشمنٽ مختلف اسڪولن ۾ جاڳرتا مهم به هلائي هئي ۽ ريليون به ڪڍيون ويون هيون ته هن منصوبي سان خطي ۾ ترقي ٿيندي، جيڪڏهن جمهوريت کي نقصان ٿيو ته ان منصوبي جا به خواب به اڌورا رهجي ويندا، ڀلي کڻي ان منصوبي سان ڪنهن کي به فائدو ٿيو پر جمهوريت کي بچائڻ هر هڪ سياستدان جي ذميواري آهي، ڇاڪاڻ ته هن جمهوريت خاطر شهيد ذوالفقار علي ڀٽي کي ڦاهي تي چاڙهيو ويو ۽ هن جمهوريت جي ڪري ئي شهيد مير مرتضيٰ کي گوليون هڻي قتل ڪيو ويو ۽ هن جمهوريت جي ڪري ئي جمهوريت جي دشمنن محترمه بينظير ڀٽو کي شهيد ڪري ڇڏيو، جنهن جا قاتل اڄ به وائکا نه ٿي سگهيا آهن.

مسلم ليگ نون جي سربراهه نوازشريف کي ته صرف جيل ۾ وڌو هو، جيڪو اڄ به چئي رهيو آهي ته ساڻس نا انصافي ٿي آهي، جيڪڏهن جيل ۾ ڪجهه ڏينهن قيد ڪاٽڻ وزيراعظم نوازشريف کان ناهن وسريا ته آخر لاڙڪاڻي جي شهيدن جيڪي جمهوريت لاءِ قربانيون ڏنيون، اهي عوام ان ڪيئن وسري سگهن ٿيون. ان لاءِ سمورن سياسي پارٽين کي گڏجي اهڙي حڪمت عملي جوڙڻي پوندي جو پاناما ليڪس ۾ شامل نالن کي سزا به ملي وڃي ۽ جمهوريت به بچي وڃي ۽ جيڪي ڪاسائي جو ذڪر ڪري رهيا آهن، انهن کي اهو واضح ٿئي ها عوام جي ئي حڪمراني هلندي ۽ ڪو به شخص چور دروازي کان اقتدار ۾ نه ايندو.