جهنڊن جي ڏنڊن کان ڊنل پي ٽي آءِ سرڪار

صاحب خان ڀٽي

جي يو آءِ ف مولانا فضل الرحمان جي آزادي مارچ جتي اپوزيشن کي هڪ هنڌ گڏ هلڻ تي مجبور  ڪري ڇڏيو آهي ته اتي ئي حڪومت جون ننڊون به حرام ٿي ويون آهن ۽ حڪومت مولانا جي مارچ کي روڪڻ لاءِ مختلف حربا هلائڻ شروع ڪري ڇڏيا آهن،شروعات ۾ جي يو آءِ جي تنظيم انصارالاسلام تي پابندي لڳائي وئي، ڇاڪاڻ  ته انهيءَ تنظيم جي وڏي انگ ۾ ڪارڪنن جي هٿن ۾ ڏنڊن واريون تصويرون سوشل ميڊيا تي وائرل ٿيون هيون، جنهن کانپوءِ نادرا طرفان جي يو آءِ اڳواڻ حافظ حمدالله جو سڃاڻپ ڪارڊ رد ڪيو ويو ۽ کيس غير ملڪي قرار ڏنو ويو، جڏهن ته هو سينيٽر به رهي چڪو آهي پر آخر نادرا جون اکيون ان وقت ڇو کليون جڏهن آزادي مارچ شروع ٿيڻو وارو هو، اهو سلسلو اتي نه روڪيو، تنهن کانپوءِ جي يو  آءِ اڳواڻ مولانا مفتي ڪفايت الله کي گرفتار ڪيو ويو، پر جڏهن پي ٽي آءِ اسلام  آباد ۾ ڌرڻو هنيو هو ته ان وقت ڪنهن  به وڏي اڳواڻ جي گرفتاري نه ٿي هئي ۽ نه ئي کين روڪڻ جي ڪوشش ڪئي وئي هئي، ايتري قدر جو 126 ڏينهن حساس علائقي اسلام آباد  ۾ ڌرڻو هنيو ويو هو، ايتري قدر جو ججن کي به سپريم ڪورٽ وڃڻ ۾ ڏکيائي پيش اچي رهي هئي، چيني صدر جو دورو به ملتوي ٿيو هو، هاڻ جڏهن پي ٽي آءِ ڌرڻي کانپوءِ حڪومت ۾ آئي آهي ته  وزيراعظم عمران خان چئي رهيو  آهي ته ڌرڻن سان ملڪي معشيت تي اثر  پئي ٿو، پر جڏهن پي ٽي آءِ پاڻ 126 ڏينهن اسلام آباد ۾ ڪڙو چاڙهي رکيو ڪو به ادارو انهن خلاف ڪارروائي  ڪرڻ لاءِ تيار نه هو ته ان وقت شايد پي ٽي آءِ کي ملڪ کي ٿيندڙ نقصان جي ڪا به پرواهه نه هئي پر ان باوجود نواز ليگ سرڪار ان وقت صبر جو مظاهرو ڪيو هو پر ان باوجود پارليامينٽ ۽ پي ٽي وي تي حملو ٿيو اهلڪارن تي تي تشدد ڪيو ويو ، ايتري قدر جو پارليامينٽ ۽ پي ٽي وي حملي جو ڪيس اڄ به عدالتن ۾ هلي رهيو آهي، جنهن جو فيصلو اڄ به اچي رهيو آهي، ملڪ جي ٻن وڏين پارٽين جا سربراهه اڄ جيل ۾ سزا ڪاٽي رهيا آهن، جيئن سنڌ ۾  اڳ صحافين کي ٻڪري چوڪري جي ڪيس ۾ گرفتار ڪيو ويندو هو، ايئن سياستدانن  تي ڪرپشن جا ڪيس هلي رهيو آهي، عجيب ڳالهه اها آهي ته جيڪڏي سياستدان پيپلزپارٽي  ۽ نواز ليگ کي ڇڏي پي ٽي آءِ  ۾ شموليت اختيار ڪري وٺڻ ٿا، انهن تي ڪو به ڪيس نه ٿو هلي، جيڪڏهن نوازشريف ۽ آصف علي زرداري جي حڪومت تي ڪرپشن جا الزام آهن ته پوءِ جيڪي  سياستدان هن وقت پي ٽي آءِ ۾ آهن، اڪثريت انهن جي  آهي،  ڇا انهن تي ڪو  به الزام نه هوندو؟

بهرحال پي ٽي آءِ ۾ شامل سياستدانن خلاف نيب ڪا به جاچ هن وقت تائين شروع نه ڪري ڇڏي آهي ۽ اپوزيشن جو مطالبو آهي ته سڀني خلاف احتساب ٿيڻ گهرجي، رڳو سياستدانن جو ئي احتساب ڇو ٿي رهيو آهي؟ هاڻ ڏسڻُ اهو آهي ته اهو احتساب ڪڏهن شروع ٿيندو، جڏهن سمورا ڪرپٽ ماڻهو نيب جي تحويل ۾ هوندا پر جيئن ته هاڻ ملڪ جون حالتون تيزي سان تبديل ٿي رهيون آهن ۽  اڪثر ماڻهو خوش ٿي رهيا آهن ته هو پراڻي پاڪستان ۾ داخل ٿيڻ طرف وڃي رهيا آهن پر ڪجهه جو چوڻ آهي ته جيڪڏهن موجوده حڪومت وئي ته ٽين قوت اچي ويندي پر انهن لاءِ هڪ ڳالهه واضح ٿيڻ ضروري آهي ته ملڪ جون حالتون انتهائي خراب آهن، هڪ طرف ڪشميرين ۾ ڪاوڙ جي لهر پکڙيل آهي ته ٻئي طرف وري سوشل ميڊيا تي ڪشميرين جي احتجاجن مان به ڪاوڙ صاف نظر اچي رهي آهي،جماعت اسلامي اڳواڻ سراج الحق چيو آهي ته ڇڪتاڻ واري صورتحال سبب ڪشمير ڪاز کي تمام گهڻو نقصان پهتو آهي، جيڪڏهن ڏٺو وڃي ته ان ڳالهه ۾ به ڪو شڪ نه آهي،  اها ڳالهه به درست آهي پر پي ٽي آءِ سرڪار ۽ اپوزيشن جي ڪشمير ڪاز تي گڏ نه ويهڻ ۽ سنجيدگي نه وٺڻ سبب اهو سڀ ڪجهه ٿي رهيو آهي، جيڪڏهن ايوان ۾ به ڪشمير تي بحث ٿيندو آهي ته ان وقت به اپوزيشن خلاف واويلا ڪئي ويندي آهي ۽ جواب به حڪومت کي ساڳيو ملندو آهي، تنهن جي ڪري اهو ته ٿيڻو ئي هو.

هن وقت سنڌ ۽ بلوچستان جي سامونڊي پٽي وارن علائقن ۾ طوفان جو خطرو آهي ۽ سنڌ جي گادي واري شهر ڪراچي ۽ ٺٽي جي سامونڊي پٽي وارن علائقن ۾ سامونڊي پاڻي داخل ٿي چڪو آهي، ڪيترائي ڳوٺ به پاڻي هيٺ اچي چڪا آهن، جيئن جيئن طوفان ويجهو اچي رهيو آهي، طوفان ۾ به تيزي اچي رهي آهي ۽ سامونڊي طوفان سبب عوام ۾ خوف به پکڙيل آهي، اڳتي هلي ڇا ٿيندو، ايئن پي ٽي آءِ  سرڪار جيڪا پاڻ کي سونامي سڏرائيندي هئي، اها به جي يو آءِ  جي آزادي مارچ واري طوفان کان ڊنل نظر اچي رهي آهي، جيئن جي يو آءِ جو آزادي مارچ اسلام آباد ڏانهن وک وڌائي رهيو آهي، تيئن تيئن پي ٽي آءِ سرڪار لاءِ آزمائش جي گهڙي وڌندي پئي وڃي، سمورا حربا اڳ ئي استعمال ٿي چڪا آهن، دهشتگردي جو خدشو به ظاهر ڪيو ويو آهي، جيڪڏهن ملڪ ۾ دهشتگردي جو خطرو آهي ته اتي اهو سوال پيدا ٿئي ٿو ته اسان جا سيڪيورٽي ادارا ڇا پيا ڪن؟ ڇا انهن جو ڪم سيڪيورٽي کي بهتر ڪرڻ نه آهي؟ جيڪڏهن پي ٽي آءِ جي ڌرڻي تي ڪا به دهشتگردي جو خطرو نه ٿيو هو ته پوءِ آخر مولانا جي حڪومت تي اهڙا حربا ڇو پيا استعمال ڪيا پيا وڃن، پي ٽي آءِ سرڪار پاران دهشتگردي جو خدشو ظاهر ڪرڻ هڪ چينل کي ڌر بڻائي  جي يو آءِ کي ٽارگيٽ ڪرڻ  مان  لڳي ٿو ته  دال ۾ ڪجهه ڪارو ضرور آهي.

هڪ طرف سامونڊي طوفان ته ٻئي طرف وري جي يو آءِ جو آزادي مارچ سڄي ملڪ جي عوام جو ڌيان ڇڪائي ڇڏيو آهي، هر هڪ ماڻهو رڳو اهو ئي سوچي رهيو آهي ته آخر طوفان ۽ جي يو آءِ   جي آزادي مارچ  مان ڪهڙو نقصان ٿيندو؟ جيئن ته سامونڊي طوفان ڪنهن به وقت ٺاپر اچي سگهي ٿي، جيڪڏهن نه آئي ته ڪيترائي علائقا پاڻي هيٺ اچي ويندا، ايئن جي يو آءِ جي آزادي مارچ  کي روڪڻ لاءِ حڪومت مداخلت بند نه ڪئي ته ڪو به اهڙو واقعو پيش اچي سگهي ٿو، جنهن سان پي ٽي آءِ سرڪار جو هلڻ تمام ڏکيو ٿي ويندو، جيئن ته پي ٽي آءِ سرڪار  کي ڏيڍ سال کان وڌيڪ عرصو ٿي چڪو آهي ۽ اڍائي سال کان پوءِ مڊٽرم اليڪشن بابت بحث ڪجهه ڏينهن کان سوشل ميڊيا تي هلي رهيو  آهي ۽ چونڊن جو ذڪر ان ڪري ٿي رهيو آهي جو مولانا فضل الرحمان حڪومت کان استعيعفيٰ جو مطالبو ڪيو آهي ۽ پنهنجي انهيءَ فيصلي تي ثابت قدم به آهي پر وزيراعظم عمران خان جو چوڻ آهي ته هو ڪنهن به بليڪ ميلنگ ۾ نه ايندو ۽ هو استعيفيٰ نه ڏيندو؟  پر جيئن ته مولانا جو آزادي مارچ پنهنجي منزل ڏانهن روان دوان آهي، تيئن حڪومت جي حمت عملي ۾ هن وقت تائين ڪا به تبديلي نظر نه آئي آهي، هڪ ٽي وي چينل نئون بحث شروع ڪري ڇڏيو آهي ته ماڻهو آخر ڪيترا مولانا سان گڏ آهي، سمجهه ۾ نه ٿو اچي ته پي ٽي آءِ جڏهن ڌرڻو هنيو ته ان وقت ڪيترا ماڻهو گڏ هئا، ان تي بحث نه ٿيو هو پر جڏهن نوازليگ، پيپلزپارٽي ۽ هڪ عام ماڻهو پنهنجي مرضي سان مولانا فضل الرحمان سان گڏ هلڻ لاءِ تيار ٿي ويو آهي ته اتي بدديانتي  واري صحافت ڪندڙ چينل پاران اهو بحث شروع ڪرائڻ جو ڪهڙو مقصد هو، جنهن ته جي يو آءِ اڳواڻ راشد سومري چيو ته اسان کي هڪ خانگي ٽي وي چينل ( اي آر واءِ ) جي ناڪاري ۽ هاڪاري ڪوريج جي ڪا به ضرورت نه آهي، اهو چينل سندن خلاف پروپيگنڊا ڪري رهيو آهي.

بهرحال حڪومت پاران  جي يو آءِ جي تنظيم انصارالاسلام تي پابندي جو نوٽفڪيشن جاري ڪرڻ خلاف اسلام آباد هاءِ ڪورٽ ۾ ٻڌڻي ٿي، جنهن دوران جمعيت علماءِ اسلام جي تنظيم انصارالاسلام جي وڪيل ڪامران مرتضيٰ چيو ته اها تنظيم پرائيوٽ مليشيا نه آهي، اها اسان جي تنظيم جمعيت علماءِ اسلام جو  حصو آهي. جنهن تي جسٽس اطهر من الله ريمارڪس ڏيندي چيو ته  اها خانگي مليشيا ناهي  پر انهن وٽ ڏنڊا ته آهن، جنهن تي وڪيل ڪامران مرتضيٰ چيو ته جهنڊن سان گڏ ڏنڊا ته هوندا آهن، جمعيت علماءِ اسلام هڪ سياسي  جماعت آهي، جيڪا اليڪشن ڪميشن وٽ رجسٽرڊ ٿيل آهي، جسٽس اطهر من الله چيو ته جيڪڏهن اهي سياسي جماعت جا ميمبر آهن ته اهو نوٽيفڪيشن غير اثرائتو آهي آهي. جڏهن انهيءَ ڪيس ۾ ڏنڊن جو ذڪر ٿيو ته مون کي پڪ ٿي وئي آهي ته پي ٽي  آءِ سرڪار جي يو آءِ جي جهنڊن ۾ لڳل ڏنڊن کان ئي ڊنل آهي، جيڪڏهن ايئن نه هجي ها ته مليشا تي پابندي لڳائڻ جو نوٽيفڪيشن جاري ڪرڻ جي حڪومت کي ڪا به ضرورت نه پئي ها، جيئن ته هاڻ هڪ ڀيرو ٻيهر پي ٽي آءِ سرڪار عدالتن جو در کڙڪايوڳ آهي پر هن ڀيري ٿورو فرق ضرور  آهي، ڇاڪاڻ حڪومت چاهي به ته آزادي مارچ کي روڪي نه ٿي سگهي، ڇاڪاڻ ته پي ٽي آءِ سرڪار هڪ ٻه ڏينهن نه پر 126 ڏينهن اسلام آباد ۾ ڌرڻو هنيو هو جيئن ته ته مولانا فضل الرحمان اهو واضح چئي ڇڏيو آهي ته سندن آزادي مارچ ڪجهه ڏينهن لاءِ آهي، پي ٽي آءِ وانگر 126 ڏينهن جو نه هوندو، هڪ طرف حڪومت ڏننڊن کان ڊنل آهي ته ٻي طرف وري واپاري طبقو به هن حڪومت خلاف ميدان تي اچي ويو آهي ۽ هڙتال جو اعلان ڪيو ويو آهي، هڙتال جو  اعلان سمجهه ۾ نه ٿو اچي ته آخر اوچتو ڇو ڪيو ويو، هن ڌرڻي کان به اڳ به اهو اعلان ڪري سگهجي پيو پر جڏهن مولانا فضل الرحمان جي آزادي مارچ وقت هڙتال جو اعلان ڪرڻ سمجهه کان ٻاهر آهي. اهو سوال واپاري تنظيمن کان ٿيڻ گهرجي ته اوچتو هڙتال جو سڏ ڪنهن جي چرچ تي ڏنو ويو آهي. جيئن ته آزادي مارچ کانپوءِ ملڪ ۾ هڪ ڀيرو ٻيهر چونڊن جي خوشبو اچي رهي آهي ۽ عام ماڻهو کي به پڪ ٿي وئي آهي ته ملڪ ۾ هڪ ڀيرو ٻيهر چونڊون ٿيڻ واريون آهن پر جيڪڏهن چونڊون ٿيون ته ملڪ جو وزيراعظم ڪير ٿيندو؟  ان تي به ڪيترن ئي صحافين۾ بحث شروع ٿي ويو آهي، ڪجهه صحافين جو خيال آهي ته جيئن عمران خان ڌرڻو هڻي وزيراعظم ٿيو، ايئن مولانا فضل الرحمان به ملڪ جو وزيراعظم ٿي ويندو. ڪجهه جو چوڻ آهي ته ملڪ جو ايندڙ وزيراعظم بلاول ڀٽو زرداري ٿيندو، هاڻ اهو وقت ئي ٻڌائيندو، هن وقت ته رڳو آزادي مارچ شروع ٿيو آهي، جڏهن اهو اسلام آباد پهچندو، پوءِ وڃي صورتحال واضح ٿيندي ته هي حڪومت گهر ويندي يا وري ڳالهيون ڪرڻ ۾ ڪاميابي حاصل ڪري وٺندي، ان لاءِ اسان کي ٿورو  انتظار ڪرڻو  پوندو، ڇاڪاڻ ته سياستدان پاڻ ئي چئي رهيا آهن ته عمران خان سليڪٽيڊ وزيراعظم آهي، جيڪڏهن اهو سليڪٽيڊ آهي ته پوءِ سليڪٽر کيس ايترو جلدي گهر وڃڻ ٿوري ڏيندو

dailykalyan.com Best Sindhi Articles by Sahib Khan Bhatti

Daily sindh Best Sindhi Articles by Sahib Khan Bhatti

Daily Pak Best Sindhi Articles by Sahib Khan Bhatti

Daily Pak Best Sindhi Articles by Sahib Khan Bhatti

Daily Wafa-e-Sindh Karachi, Sahib khan bhatti article

Daily Sukkar Best Sindhi Articles by Sahib Khan Bhatti

Daily Hilal e Pakistan Sahib khan bhatti article

Daily Hilal e Pakistan Sahib khan bhatti article

Daily Jeejal karachi article by sahib khan bhatti

dailykalyan.com Best Sindhi Articles by Sahib Khan Bhatti

dailykalyan.com Best Sindhi Articles by Sahib Khan Bhatti

Daily Hilal e Pakistan Sahib khan bhatti article

Daily Hilal e Pakistan Sahib khan bhatti article

Daily Awami Awaz article by Sahib khan bhatti

Daily Awami Awaz article by Sahib khan bhatti

مولانا جو مارچ، جهاز تيار بيٺو آهي ؟

صاحب خان ڀٽي

پنجاب جي صحت واري صوبائي وزير ياسمين راشد چيو آهي ته جهاز تيار بيٺو آهي، ميان محمد نوازشريف علاج لاءِ جٿان چاهي  ڊاڪٽرز گهرائي سگهي ٿو، جنهن کانپوءِ هڪ سوال جو جواب ته سڀني ماڻهن کي ملي ويو آهي، جيڪي پڇي رهيا هئا ته آخر  جي يو آءِ ف  جي سربراهه مولانا فضل الرحمان جي ڌرڻي کان حڪومت کي ڇا ٿيندو؟ جيئن ها حڪومت کي ڪجهه  ٿئي يا نه ٿئي، اهو ته وقت ئي ٻڌائندو پر هڪ ڳالهه ته صاف ظاهر ٿي وئي آهي ته حڪومت جون ننڊون  حرام ٿي ويون آهن ۽ حڪومت کي گوڏا کوڙڻ پئجي ويا آهن، جنهن جو مثال رهبر ڪميٽي سان ملاقات مان به ملي ٿو، جيڪڏهن حڪومت مولانا جي مارچ کان ڊنل نه هجي  ها ته  وزيراعظم عمران خان اپوزيشن سان ڳالهائڻ تيار ئي نه  ٿئي ها پر   ڳالهين واري صورتحال باوجود مولانا فضل الرحمان پنهنجي آزادي مارچ واري بيان تان   عمران خان جيان يوٽرن نه ورتو آهي ۽ پنهنجي بيان تي ثابت قدم آهي، وزيراعظم عمران خان چيو آهي ته هو هر حال ۾ حڪومت جي رٽ قائم رکندا پر جڏهن پي ٽي آءِ سرڪار کان صحافي برادري سندن اسلام  آباد ۾ لڳايل 126 ڏينهن جي ڌرڻي بابت پڇي ٿي ته ان تي عمران خان جي سرڪار ناراض ٿي وڃي ٿي، ايتري قدر جو هڪ ڀيرو ٻيهر اليڪٽرانڪ ميڊيا ۽ پرنٽ ميڊيا کي استعمال ڪيو پيو وڃي، اليڪشن کان اڳ نواز ليگ جي اقتدار واري دور ۾ ميڊيا تي  اشتهار هلندا هئا ته  نوازشريف چور آهي، جيڪڏهن ڏٺو وڃي ته اها به قانون جي ڀڃڪڙي آهي پر ان وقت ڪنهن به اهو سوال نه ڪيو ته آخر ميڊيا تي اهڙي قسم جا اشتار ڇو هلي رهيا آهن، آخر انهن ٽي وي چينلز جي چيلهه ان وقت چٻي ٿي، جڏهن عمران خان جي حڪومت قائم ٿي ۽ صحافتي ادارن جو ڏيوالو نڪرڻ شروع ٿي ويو، جيئن ته ان وقت تبديلي جو نشور هر هڪ تي ڇانيل هو ۽ ملڪ جو عوام به چاهي پيو ته هاڻ تبديلي اچڻ گهرجي، ڇاڪاڻ ته ان وقت عوام کي وڏا وڏا خواب ڏيکاريا ويا هئا، پيٽرول جيڪو 70 روپين ۾ وڪرو ٿي رهيو هو، اهو عوام کي مهانگو لڳي رهيو هو، ڊالر لڳ ڀڳ 100 روپيا  هو، ان تي به تبديلي جي خواهش رکندڙن کي مهانگو نظر اچي رهيو  هو پر جڏهن تبديلي آئي ته سڀني جا آنڊا ٻاهر نڪري آيا ۽ عوام توڙي صحافتي ادارن کي حقيقت ۾ تبديلي نظر اچي وئي ته آخر تبديلي ڪيئن ٿيندي آهي، هاڻ جڏهن ڪو به تبديلي جو لفظ ٻڌي ٿو ته کيس گار لڳي ٿي ۽ عوام تبديلي جو لفظ ٻڌڻ به پسند نه ٿو ڪري، ان جو مثال سوشل ميڊيا تي وائرل ٿيندڙ ويڊيو ۽ عام ماڻهن سان ڳالهيون ڪرڻ مان ئي ملي ٿو، رڳو هڪ طبقو آهي، جيڪو اڃا به تبديلي کي گهڻو پسند ڪري ٿو، اهو جيڪو پي ٽي آءِ جو سپورٽر آهي پر جلد ان طبقي جون به اکيون کلڻ واريون آهن، ڇاڪاڻ ته سرڪاري نوڪري رکندڙ ماڻهن کي تبديلي تمام گهڻي پسند هئي هاڻ ٻڌڻ ۾ اچي رهيو آهي ته کوڙ سارا ادارا خانگائڻ جون تياريون ٿي رهيون آهن ۽ سرڪاري ادارن مان به ماڻهن کي برطرف ٿيڻ جو خدشو آهي، جيڪڏهن سرڪاري ملازم برطرف ٿيا ته شايد ڪافي حد تائين تبديلي جا سپورٽرز به يوٽرن وٺي ويندا؟

بهرحال اهو سڀ ڪجهه ته مهانگائي جي ڪري ٿي رهيو آهي پر عام ماڻهو به سوال ڪري رهيو آهي ته جيڪڏهن  پي ٽي آءِ جي نظر ۾ نوازشريف ۽ آصف علي زرداري چور هئا ته انهن جي دور ۾ ايتري مهانگائي ڇو نه هئي ۽ ماڻهو بيروزگار گهٽ ڇو هئا ۽ ڊالر جو اگهه گهٽ ڇو هو، اوچتو پي ٽي آءِ جي سرڪار ۾ ڊالر مهانگو ڇو ٿي ويو؟ آخر  ادارا ڇو بند ٿي ويا ۽ مهانگائي ايتري ڇو  وڌي وئي؟ واپاري ۽ سيڙپڪار تنگ ٿي وزيراعظم سان ملاقات ڪرڻ بدران آرمي چيف سان ملاقات ڇو ڪئي؟ پر هن وقت تائين انهن سوالن جو جواب نه ملي سگهيو آهي پر هن وقت حقيقي تبديلي ضرور نظر اچي رهي آهي، جيڪڏهن جي يو آءِ سربراهه مولانا فضل الرحمان اسلام آباد ۾ ڌرڻو هڻڻ ۾ ڪامياب ٿي وڃي ٿو ته شايد حڪومت کي ٽف ٽائيم ملي سگهي ٿو، جيئن ته مون نه عمران خان جي ڌرڻي جي حمايت ڪئي هئي ۽ نه ئي وري مولانا فضل الرحمان جي ڌرڻي جي حمايت ڪيان ٿو پر زميني حقيتون اهي ئي آهن ته هن ملڪ ۾ مهانگائي ۽ بيروزگار موجوده حڪومت جي کنيل قدمن جي ڪري ٿي آهي، جيڪڏهن مولانا حڪومت کي ٽف ٽائيم  ڏنو ته هن ملڪ جو معشيت تباهه ٿي ويندي، جيڪا ڪافي حد تائين تباهه به ٿي چڪي آهي ۽ اڳتي هلي اڃا وڌيڪ ماڻهو بيروزگار ٿي ويندا.  جيڪڏهن مولانا جي سياست تي هڪ نظر ڦيرجي ته هن وقت نوازشريف ۽ آصف علي زرداري کان وڌيڪ مولانا فضل الرحمان  هڪ  وڏو سياستدان ٿي اڀري رهيو آهي، ڇاڪاڻ ته سندس ٽڪراءُ اهڙن ادارن سان ٿي رهيو آهي،  جن بابت نوازشريف ۽ آصف زرداري کي ڳالهائڻ جي جرئت به نه هجي  پر مولانا فضل الرحمان  هر وقت اهو ئي چئي رهيو آهي ته هو  ڪنهن اداري سان ڇڪتاڻ نه ٿو چاهي، سندس مقابلو عمران خان جي سرڪار سان آهي، جنهن جي ڪري ڪنهن ٽي قوت کي وچ ۾ نه اچڻ گهرجي، جيڪڏهن ٽي قوت مداخلت ڪئي ته ڌرڻو ڊي چوڪ بدران جي ايڇ ڪيو هوندو.

هڪ طرف حڪومت جي يو آءِ فضل الرحمان  سان ڳالهيون ڪرڻ جي ڪوشش ڪري رهي آهي ته ٻي طرف مٿس پابنديون لڳائي رهي آهي، اليڪٽرانڪ ميڊيا توڙي پرنٽ ميڊيا جيڪا اڳ عمران خان  جي گارين واريون ويڊيو به آڌي رات جو به ڏيکاريندي هئي اها ميڊيا اڄ مولانا فضل الرحمان جا بيان  ايڊٽ ڪري ڏيکاري رهي آهي، ڇا اها صحافت جو ٻٽو معيار نه آهي،  حڪومت چئي رهي آهي ته مولانا فضل الرحمان  جي ميڊيا ڪوريج تي پابندي نه آهي ته پوءِ آخر مولانا جو ساڳئي پريس ڪانفرنس ميڊيا تي ڪجهه ٻي آهي ته وري سوشل ميڊيا تي ان جو رنگ ٻيو ڇو آهي؟ جيڪڏهن عمران خان  طرفان ٻين سياستدانن کي چور چوڻ واريون پريس ڪانفرنسون نشر ٿي سگهن ٿيون ته مولانا فضل الرحمان جي  پريس ڪانفرنس تي ايڏي سختي ڇو ڪئي وئي آهي؟

بهرحال  مولانا فضل الرحمان جي ڪوريج بابت حڪومت ئي  بهتر جواب ڏئي سگهي ٿي، ڇاڪاڻ ته هن وقت ميڊيا تي خبرون نشر ٿي رهيون آهن مولانا جي مارچ مدرسن جي شاگردن کي شرڪت نه ڪرڻ گهرجي، ڇاڪاڻ ته دهشتگردي جو خطرو آهي پر ان وقت جڏهن دهشگردي عروج تي هئي،  روز ڌماڪا ٿيندا هئا پر 126 ڏينهن ڌرڻن باوجود پي ٽي آءِ  جي ڌرڻن تي ڪو به حملو نه ٿيو، سوات ۾ آپريشن به هلي رهيو هو،  آمريڪا طرفان سرحد ويجهو ڊرون حملا به ڪيا ويندا هئا، ڪراچي ۾ به دهشتگردي ٿيندي هئي ، بلوچستان ۾ ڌماڪا ٿيندا هئا پر ان باوجود ڌرڻي ۾ ڪو به اڻ وڻندڙ واقعو پيش نه آيو پر اهو ضرور ٿيو ته سيڪيورٽي ادارن تي ڌرڻي ۾ شريڪ ماڻهن پاران حملو ڪيو ويو ۽ اهلڪار زخمي به ٿيا هئا پر ان باوجود ان وقت جي حڪومت ڪنهن به دهشتگردي جو خدشو ظاهر نه ڪيو هو ۽ نه ئي عمران خان جي ميڊيا ڪوريج تي پابندي لڳائ هئي هر وقت ميڊيا تي رڳو عمران خان ئي ڇانيل رهندو هو، جيئن  اڳ ۾ لنڊن جو هڪ شخص ڇانيل هوندو هو؟

بهرحال پي ٽي آءِ سرڪار  ۾ خدشو ظاهر ڪيو ويو آهي ته دهشتگردي ٿي سگهي ٿي، ان سان گڏ جي يو آءِ جي هڪ ذيلي تنظيم تي به پابندي لڳائي وئي آهي ۽ ان جو باقاعدي نوٽيفڪيشن جاري ڪيو ويو آهي، جي يو آءِ سربراهه مولانا فضل الرحمان جو چوڻ آهي ته حڪومت طرفان ڳالهيون گهٽ ۽ڌمڪيون وڌيڪ ڏنيون پيون وڃن. هڪ طرف ميڊيا ذريعي مولانا کي خبردار ڪيو پيو وڃي ته دهشتگردي جو خطرو آهي ٻئي طرف وري آزادي مارچ کي روڪڻ لاءِ هر هڪ حربو استعمال ڪيو پيو وڃي.  جيئن ته مولانا جي مارچ کان پوءِ حڪومت وائڙائپ جو شڪار ٿي وئي آهي، جنهن سبب مولانا سوشل ميڊيا توڙي عوام تمام گهڻي مقبوليت حاصل ڪري ورتي آهي، جنهن مان اهو ظاهر ٿي رهيو آهي ته واقعي هن وقت مولانا مذهبي سياستدان کي هٽي ڪري هڪ اهم سياستدان ٿي ويو آهي، جنهن جي پٺيان عوام نڪرڻ لاءِ تيار ٿي ويو آهي، ان جو سڀ کان وڏو سبب اهو  ئي آهي ته  پي ٽي آءِ سرڪار جيڪي ٽيڪس مٿان ٽيڪس لڳايا آهن، ان سان  امير توڙي غريب جي زندگي تمام گهڻي متاثر ٿي  آهي ۽ ماڻهو بيروزگار ٿي رهيا آهن.  جيڪڏهن پي ٽي آءِ سرڪار مهانگائي  کي نه وڌائي ها ته اڄ عوام پي ٽي آءِ خلاف نه هجي ها.

جيڪڏهن ڏٺو وڃي ته مولانا فضل الرحمان جي ڌرڻي جي ڪري حڪومت جو ڌيان نوازشريف ۽ آصف زرداري تان هٽي ويو آهي ۽ انهن سان نرمي اختيار ڪئي وئي آهي، نوازشريف ۽ آصف زرداري کي ساڳي ئي بيماري آهي پر ريلوي وارو وفاقي وزير شيخ رشيد چئي رهيو آهي ته نوازشريف کان وڌيڪ بيماري آصف علي زرداري آهي پر  زرداري نواز ليگ وانگر رڙيون نه پيو ڪري، هن اهو به چيو ته نوازشريف جي خاندان وٽان ڪجهه نه نڪرندو باقي آصف علي زرداري ڪجهه ڏئي سگهي ٿو. ان مان ئي مطلب نڪتو ته حڪومت جو  انهن سياستدانن کي گرفتار ڪرڻ جو مقصد ئي پئسا ڪڍڻ هو. بهرحال هن وقت نوازشريف کي طبي بنيادن تي ضمانت ملي و ئي آهي ۽ مٿان مولانا فضل الرحمان جو آزادي مارچ به آهي ۽ ان حوالي سان عدالتن ۾ درخواست به داخل ڪرائي وئي ته مولانا  کي ڌرڻي کان روڪيو وڃي پر عدالتن اها درخواست رد ڪري ڇڏي ڇاڪاڻ ته  انهن عدالتن ته عمران خان کي ڌرڻي کان نه روڪيو هو ۽ عمران خان جي ڌرڻي دوران ججن کي سپريم ڪورٽ وڃڻ ۾ به ڏکيائون به پيش آيون هيون پر ان وقت ڪنهن جي زبان مان هڪ لفظ به نه نڪتو هو. پر جيئن ته درخواست رد ٿي وئي آهي، جنهن مان لڳي ٿو ته عدالتي جنگ واري ڦوڪڻي مان به هوا نڪري وئي آهي، رهي ڳالهه هاڻ وڃي حڪومت ڏاڍ جي ته اهو وقت ئي ٻڌائيندو ته حڪومت  آزادي مارچ کي روڪڻ لاءِ ڪيتري طاقت جو استعمال ڪري ٿي، جيئن ته عمران خان  واضح چئي ڇڏيو آهي، ته ڪجهه به ٿي پئي پر هو استعيفيٰ نه ڏيندو ۽ فوج سندس پٺيان آهي. پر ان ڳالهه کي ماڻهن سنجيدگي سان ناهي ورتو ڇاڪاڻ ته عمران خان پاڻ ئي چوندو آهي ته  جيڪو سياستدان يوٽرن نه ٿو وٺي اهو وڏو سياستدان نه آهي، متان هو وڏو سياستدان ٿيڻ لاءِ استعيفيٰ ڏئي ڇڏي؟ اهو به ڪجهه ڏينهن ۾ ئي خبر پئجي ويندي پر  حالتن کي ڏسندي لڳي ٿو ته اپوزيشن به مڊٽرم اليڪشن جو انتظار ڪندي ، انهيءَ حڪمتي عملي تحت ئي موجوده حالتن کان ڇٽڪارو حاصل ٿي سگهي ٿو؟ رهي ڳالهه جهاز تيار بيٺو آهي ته ان جو اشارو نوازشريف ڏانهن گهٽ پر  پي ٽي آءِ ڏانهن تمام گهڻو وڌيڪ وڃي ٿو، ڇاڪاڻ ته جهانگير ترين جو جهاز هر وقت تيار ئي بيٺو هوندو  آهي، ڀلي اها وقت سينيٽ جي چونڊ جو هجي يا وري قومي اسيمبلي جي چونڊ جو هجي، جهاز جي اڏڻ سان  تبديلي اچي ويندي آهي، هاڻ ڏسون ٿا ته جهانگير ترين جو اهو جهاز ڪڏهن ٿو اڏام ڀري؟

سنڌاسيمبلي، ڌارين جي آبادڪاري خلاف بل پيش ڇو نه ٿيو؟

صاحب خان ڀٽي

سنڌ ۾ ڌارين جي آبادڪاري جي سلسلو جاري آهي، نوان  نوان منصوبا به تيار ٿي رهيا آهن، جن مان ڪجهه کي ته  سياسي سخصيتن جا نالا ڏئي سنڌ جي عوام کي خاموش ڪيو ويو آهي پر اهو سلسلو رڪجڻ  جو نالو نه ٿو وٺي ملڪ ٺهڻ کان اڳ سنڌ جي گادي واري شهر ڪراچي جي آبادي تمام گهٽ هئي ۽ اهو واحد شهر هو، جنهن ڪو  ملڪ جي ٻين شهرن کان ترقي يافته هو ۽ هن شهر خوبصورت عمارتون  به هيون، جن مان اڄ به ڪجهه قائم آهن پر حڪومتي بي ڌياني سبب اهي قديم عمارتون تباهه ٿي رهيون آهن، انهن جي جاءِ تي وڏا وڏا پلازه  ٺهي رهيا آهن، هاڻي ڪراچي ۾ ڪجهه قديم عمارتون اڃا به موجود آهن، جتي ماڻهو رهن ٿا پر جيڪڏهن اهي ئي عمارتون  ملڪ جي ٻين شهرن ۾ هجن ها ته اتي ماڻهو نه رهن پر انهن کي ڏسڻ لاءِ دنيا جا ماڻهو اچن ها، جيئن پنجاب ۾ تاريخي عمارتن کي محفوظ ڪيو ويو آهي پر هتي ته حيدرآباد جي قديمي قلعي ۾ به  ماڻهو   آباد آهن ۽ قلعي کي بچائڻ لاءِ صوبائي توڙي وفاقي سرڪار ڪي به قدم نه کڻي رهي آهي، جيڪڏهن حڪومت پڪي قلعي کي محفوظ ڪرڻ لاءِ اتي آباد ماڻهن کي متبادل جڳهه ڏئي محفوظ ڪري ها ته اهو قلعي بچي سگهي ٿو پر  حڪمران رڳو ڪتا خصي ڪرڻ ۾ لڳا پيا آهن ۽  سنڌ جا قديمي ماڳ تباهه ٿي رهيا آهن، ايتري قدر جو سنڌ جي آبادي به ملڪ جي ڀيٽ ۾ تيزي سان وڌي رهي آهي، ان جو سڀ کان وڏو سبب اهو آهي جو آمريڪا جي جنگ وڙهڻ دوران افغانستان مان آيل افغاني مهاجرن کي به سنڌ ۾ آباد ڪرڻ جو منصوبو رٿيو ۽ اڄ پاڪستان جي ڀيٽ ۾ سنڌ اندر وڏي انگ ۾ افغاني مهاجر رهن ٿا، جن کي واپس پنهنجي وطن موڪلڻ لاءِ حڪومت ڪي به قدم نه کڻي رهي آهي، هن وقت سنڌ اندر رڳو افغاني مهاجر نه آهن پر ، برمي، بنگالي، بهاري ۽ ٻيون کوڙ ساريون قومون سنڌ ۾ آباد آهن، جنهن سبب سنڌ جي وسيلن تي سندن قبضو به ٿي رهيو آهي ۽ سنڌ خلاف اهي ماڻهو شازش به ڪري رهيا آهن پر افسوس سنڌ جي عوام جن سياستدانن کي ووٽ ڏئي اقتدار ۾ آندو، اهي اڄ سنڌ اسيمبلي ۾ ويهي سنڌ کي ٽوڙڻ جي ڳالهه ڪندڙ سان رڳو بيان بازي کان ڪم وٺي رهيا آهن، جيڪڏهن اهي ماڻهو کين گاريون ڏين ته انهن سياستدانن کي غيرت اچي ويندي پر افسوس جو سنڌ خلاف ڳالهائيندڙن کي ڪو به اثرائتو جواب نه ڏئي رهيا آهن.

بهرحال سنڌ اسيمبلي ۽ قومي اسيمبلي ۾ ويٺل سنڌ جي چونڊيل نمائندن ڪڏهن به سنڌ ۾ آباد ڪيل ڌارين جي لوڌ کي ڪڍڻ لاءِ ڪا به ڳالهه نه ڪئي آهي، جڏهن سنڌ جو وڏو وزير قائم علي شاهه هو، هن افغاني مهاجرن کي آباد ڪرڻ واري عمل تي چيو هو ته جيڪڏهن اسان افغان مهاجرن کي سنڌ ۾ داخل ٿيڻ کان روڪيون ٿا ته مٿان حڪم ٿئي ٿو ته انهن کي نه روڪيو، انهيءَ بيان مان اهو صاف ظاهر ٿي وڃي ٿو ته سنڌ ۾ ڌارين کي آباد ڪرڻ جو سلسلو هڪ سازش تحت ئي ٿي رهيو آهي، جيئن سنڌين کي اقليت ۾ تبديل ڪري سنڌ جي وسيلن تي قبضو ڪيو وڃي ۽ ڪافي حد تائين سنڌ جي وسيلن تي ڌارين جو ئي قبضو آهي، سنڌ جي سرڪاري نوڪرين ۾ به ڌارين جي لوڌ ڀرتي ٿيل آهي ۽ سنڌ جا نوجوان يونيورسٽين مان ڊگريون حاصل ڪرڻ باوجود در بدر ڀٽڪي رهيا آهن پر انهن جي ڪو ٻڌڻ لاءِ تيار نه آهي، پرائيوٽ سيڪٽر جو به اهو حال آهي، جتي ڌاريا ڀرتي ٿيل آهن، رهي ڳالهه انهن علائقن جي جتان تيل، گئس ۽ پيٽرول نڪري رهيو آهي، اتي به نالي ماتر هڪ ٻن سنڌين کي نوڪريون ڏئي سنڌ جي عوام کي خاموش ڪرايو ويو آهي، مطلب ته هر هنڌ ناانصافي ٿي رهي آهي، افغاني به پاڪستان خاص طور سنڌ ۾  سولائي سان ملڪيت خريد ڪري سگهن ٿا ۽ بدمعاشي به ڪري سگهن ٿا، هن وقت به ڪراچي ۾ جيڪي اڪثر اسٽريٽ ڪرائيم ۾ ماڻهو حياتيون وڃائي چڪا آهن، انهن جا پيرا به افغانين ڏانهن ويا آهن، ڪجهه ڏينهن اڳ هڪ شاگردياڻي کي ڦر دوران قتل ڪيو ويو، جيڪو پڻ اسٽريٽ ڪرائيم جو وڏو واقعو هو. هن وقت سنڌ جي زمين تي قبضو ان ڪري ٿي رهيو آهي، جو ڌارين کي آباد ڪرڻ لاءِ وڏيون وڏيون سوسائيٽيون ٺاهڻيون آهن، هڪ وڏو پروجيڪٽ جڏهن ڪراچي ۾ شروع ٿيو ته ان بلڊر کي سستي اگهه ۾ زمين وڪرو ڪئي وئي پر جڏهن اهو معاملو سپريم ڪورٽ ۾ ويو ته ان بلڊر کان پئسا ورتا ويا ۽ اها رقم سپريم ڪورٽ ۾ جمع ڪرائي وئي ۽ سنڌ حڪومت خاموش رهي، ڇاڪاڻ ته سنڌ جي حڪمرانن ئي اها زمين سستي اگهه ۾ وڪرو ڪئي هئي.

بهرحال سنڌ ۾ افغاني، برمي، بنگالي، بيهاري ۽ ٻِي ڌاري لوڌ آباد آهي ۽ انهن کي هن ملڪ جا سڃاڻپ ڪارڊ به ٺهرائي ڏنا ويا آهن، جيڪڏهن اهو اختيار صوبن وٽ هجي ها ته شايد ڪنهن کي ايتري همت نه ٿئي ها ته سنڌ ۾  رهندڙ پرڏيهين کي ڪو سڃاڻپ ڪارڊ ٺهي ملي ها. هن وقت ڪيترائي افغاني آهن، جيڪي هتي آباد آهن، جيئن ته انهن جي ٻولي سرحد وارن واري آهي، تنهن جي ڪري انهن کي سڃاڻڻ  ايترو سولو به نه آهي پر هو پاڻ ئي انهيءَ جو اعتراف ڪندا رهندا آهن ته هو افغاني آهن پر ان باوجود  انهن کي سڃاڻپ ڪارڊ ٺهي ملڻ به  اسان جي ادارن تي  سوال اٿاري ڇڏيا آهن. جيڪڏهن اسان جاچونڊيل نمائندا ٿوري به همت ڪن ها  ته انهن کي ڪارڊ ٺهي نه ملي سگهي پر جيئن ته سياستدان پنهنجو ووٽ بيڪ مضبوط ڪرڻ لاءِ به ڌارين کي ڪارڊ ٺهرائي ڏيندا آهن،  جيئن پيپلزپارٽي جي  هڪ اڳواڻ چيو هو ته هو   ڌارين کي ڪارڊ ٺاهي ڏيندا، ڀلي ڪنهن کي اها ڳالهه پسند اچي يا نه ؟ هاڻ جڏهن اهڙا سياستدانن سنڌ جا هوندا ته پوءِ   سنڌ جو عوام ڪيئن سنڌ ۾ وڌندڙ ڌارين جي آبادي کي روڪي سگهندا، اسان پاڻ ئي اهڙن ماڻهن کي اقتدار ۾ آڻي رهيا آهيون، جيڪي  سنڌ جي وحدت خلاف فيصلا ڪري رهيا آهن،  جيڪڏهن انهن کي انسانيت ڏيکارڻي آهي ته سعودي ۾ وڃي ڏيکارين ته کين خبر پئجي ويندي ته هڪ پرڏيهي کي رهائيندڙ سان به ڪهڙو حشر ٿيندو آهي؟ پر هتي ته انڌير نگري چرٻٽ راجا وارو ئي مثال آهي.

هونئن ته سنڌ اسيمبلي ۾ روز نوان نوان بل ۽ رٿون پيش ڪيون وينديون آهن ۽ انهن کي  اتفاق راءِ سان منظور به ڪيو ويندو آهي پر اڄ ڏينهن تائين ڪنهن به  چونڊيل نمائندي ڌارين جي آبادي کي روڪڻ ۽ انهن کي سڃاڻپ ڪارڊ  ٺاهي ڏيڻ واري عمل خلاف مذمتي ٺهراءُ يا بل پيش نه ڪيو آهي، ان جا ڪهڙا ڪارڻ آهن، اهي وڌيڪ ٻڌائي سگهن ٿا پر  اڃا به وقت نه ويو آهي، هن وقت به جيڪڏهن عوامي چونڊيل نمائندا چاهين ته سنڌ اسيمبلي ۾ ڌارين جي آبادڪاري کي روڪڻ، پرڏيهين کي واپس پنهنجي وطن موڪلڻ، افغانين کي ملڪيتون خريد ڪرڻ کان ورڪڻ، غير سنڌين کي صوبائي سرڪاري ادارن ۾ ڀرتي نه ڪرڻ، تعليمي ادارن ۾ پهرين سنڌين کي ترجيح ڏيڻ، نوڪرين تي پهرين سنڌين جو حق، ڌارين کي سڃاڻپ ڪارڊ ٺاهي نه ڏيڻ بابت بل پيش ڪري سگهن ٿا ۽ ان کي  اتفاق راءِ سان منظور به ڪرائي سگهن، جيڪڏهن ان تي  ڪو  احتجاج ڪري ته پوءِ  به هڪ ڳالهه واضح ٿي ويندي ته آخر سنڌ دشمن ڪير آهن، جيڪي سنڌين کي اقليت ۾ تبديل ڪرڻ ۾ رڌل آهن، جيڪڏهن اهڙي بل تي ايوان ۾ ويٺل ڪو سنڌي چونڊيل نمائندو به احتجاج ڪري ته اهو به سنڌ دشمن قوتن سان مليل هوندو. جنهن جو ڪم سنڌ سان دشمني ڪرڻ ئي هوندو. ڇاڪاڻ ته جيڪڏهن هن وقت به اهو بل پيش نه ٿيو ته سنڌ ۾ ڌاري آبادڪاري وڌي ويندي ۽ سنڌي اقليت ۾ تبديل ٿي ويندا .

Daily sindh Best Sindhi Articles by Sahib Khan Bhatti

Daily sindh Best Sindhi Articles by Sahib Khan Bhatti

DAily Sarwan Best Sindhi Articles by Sahib Khan Bhatti

dailykalyan.com Best Sindhi Articles by Sahib Khan Bhatti

dailykalyan.com Best Sindhi Articles by Sahib Khan Bhatti

dailykalyan.com Best Sindhi Articles by Sahib Khan Bhatti

dailykalyan.com Best Sindhi Articles by Sahib Khan Bhatti

Daily Sukkar Best Sindhi Articles by Sahib Khan Bhatti

Daily Sukkar Best Sindhi Articles by Sahib Khan Bhatti

Daily Pak Best Sindhi Articles by Sahib Khan Bhatti

dailykalyan.com Best Sindhi Articles by Sahib Khan Bhatti

Daily Dharti Sahib khan bhatti article

Daily pak sindh Sahib khan bhatti article

Daily Hilal e Pakistan Sahib khan bhatti article

Daily Hilal e Pakistan Sahib khan bhatti article

Daily ibrat Sahib khan bhatti

Daily Dharti Sahib khan bhatti article

Daily Awami forum, Article by Sahib khan bhatti

Daily Halchal Sahib khan bhatti article

Daily Sindh Sahib khan bhatti article

Daily Sukaar Sahib khan bhatti article

Daily Sindh Best Sindhi Articles by Sahib Khan Bhatti

dailykalyan.com Best Sindhi Articles by Sahib Khan Bhatti

Daily Hilal-e-pakistan article Sahib khan bhatti

ساهيوال سانحو ۽ انصاف لاءِ ڀٽڪندڙ عوام

صاحب خان ڀٽي

ملڪ ۾ دهشتگردن هٿان عام ماڻهن جي مارجڻ وارا واقعا ته هن ملڪ ٿيندا رهندا آهن پر سيڪيورٽي ادارن هٿان به ڪجهه اهڙا واقعا پيش اچي چڪا آهن، جيڪي ڪئميرا جي اکين ۾ قيد ٿي چڪا آهن، اهي ويڊيو سڄي دنيا ۾ وائرل به ٿيون آهن پر افسوس جو اهڙن واقعن ۾گهٽتائي نه اچي رهي آهي، اسان جي ملڪ ۾ حفاظت ڪندڙ اهلڪارن پاران عام شهرين کي تذليل ڪرڻ وارا واقعا به معمول بڻيل آهن ۽ اهي ويڊيو به وائرل ٿي رهيون آهن، ڪڏهن اسلام آباد ته ڪڏهن وري مري، مطلب ته اهو ڪو شهر نه بچيو آهي، جتي عام شهري کي تذليل جو نشانو نه بڻايو هجي، ڪڏهن اهلڪار روڊن تي روڪي  عام شهرين جي تذليل ڪن ٿا ته ڪڏهن آپريشن جي نالي تي گهرن ۾ داخل ٿي چوديواري جو تقدس پائمال ڪيو وڃي ٿو، اهو سڀ ڪجهه ان ڪري ٿي رهيو آهي ته هتي ڏاڍي جي لٺ کي ٻه مٿا آهن ۽ پڇڻ وارو ڪو به نه آهي پر اها ڳالهه هاڻ چوديواري جي تقدس ۽ شهرين جي تذليل کان وڌي وئي آهي، 19 جنوري تي جڏهن نيوز چينل جي آفيس ۾ ويٺو هئس ته اوچتو مختلف چينلز تي خبر هلي ته ساهيوال ۾ سي ٽي ڊي جو مقابلو ٿيو آهي  ۽ هڪ عورت سميت ڪجهه دهشتگرد مارجي ويا آهن، جڏهن  اسان جي رپورٽر اها خبر موڪلي ۽ هن چيو ته سوشل ميڊيا ۽ پرڏيهي ميڊيا تي خبر مختلف آهي پر  وڌيڪ آئون پوليس اهلڪارن کان پڇي اوهان کي ٻڌايان ٿو، جڏهن مون ڪجهه پرڏيهي چينلز تي ساهيوال سانحي جي خبر ڏٺي ته اتي اهي خبرون نشر ٿي رهيون هيون ته سيڪيورٽي ادارن گاڏي نه روڪڻ تان فائرنگ ڪري زال ۽ مڙس ۽ ڊرائيور کي گوليون هڻي قتل ڪيو آهي، جڏهن اسان اهي ويڊيون ڏٺيون سين ته اسان کي به خبر ٿوري مختلف لڳي پر اسان جي قومي ميڊيا تي اهي خبرون هيون ته سي ٽي ڊي ڪامياب ڪارروائي ڪري دهشتگردي جو وڏو منصوبو ناڪام بڻائي ڇڏيو آهي ۽ ٻن ٻارڙن کي بازياب ڪرائي ورتو آهي، پوليس پاران بيان جاري ڪيو ويو ته سي ٽي ڊي مٿان گاڏي ۾ ويٺل جوابدارن فائرنگ ڪئي ۽ جوابي فائرنگ ۾  خليل، سندس زال، ڌيءُ ۽ پاڙيسري  ڊرائيور ذيشان گوليون لڳڻ سبب مارجي ويو آهي، جڏهن ته ٻه ٻارڙا به زخمي ٿيا آهن، پوليس ان کان اڳ به هڪ ٻيو موقف جاري ڪري چڪي هئي، ان ۾ چيو ويو هو ته دهشتگرد عورت سميت چار ڄڻا مارجي ويا آهن، پر جيئن جيئن وقت گذري رهيو هو، تيئن تيئن پوليس پنهنجو موقف تبديل ڪري رهي هئي، اهو ٿيڻو به هو، ڇاڪاڻ ته اهو مقابلو پوليس نه پر سي ٽي ڊي ڪيو هو ۽ بيان به سي ٽي ڊي کي ڏيڻ گهرجي ها پر جيئن ته پوليس ذريعي اها خبر وائرل ڪرائي وئي، تنهن جي ڪري اصل حقيتون اچڻ ۾ ڪجهه وقت لڳي ويو پر سوشل ميڊيا ۽ عالمي ميڊيا تي ٻڙڌڪ متل هو، جڏهن جاچ ٿي ته سي ٽي ڊي به پنهنجو موقف تبديل ڪيو، جنهن کانپوءِ هڪ کي دهشتگرد قرار ڏنو ويو. جڏهن ته سياسي سماجي تنظيمن پاران واقعي جي جاچ جو مطالبو ڪيو ويو هو، تنهن کانپوءِ وزيراعظم عمران خان واقعي جو نوٽِس ورتو ۽ سي ٽي ڊي اهلڪارن کي حراست ۾ ورتو ويو. جيڪا جاچ ٽيم جوڙي وئي، ان جو به وڏو ڪمال هو، ويڊيو ۾ اهي سمورا اهلڪار نظر به اچي رهيا هئا پر ان باوجود مقتولن جي وارثن کي گهرائي نشاندهي ڪرائڻ لاءِ چيو ويو، سمجهه ۾ نه پيو اچي ته جاچ  ٽيم وارثن کان ڇو پئي نشاندهي ڪرائي، جيڪڏهن ويڊيو موجود آهي ته پوءِ  نشاندهي ڪرائڻ جي ڪهڙِي ضرورت هئي پر ان باوجود معاملي کي لئه مٽي ڪرڻ لاءِ تاريخ مٿان تاريخ هلندي رهي پر ڪو کڙ تيل نه نڪتو ۽ سياسي، سماجي تنظيمون خاموش ٿي ويهي رهيون ان جو ٻيو سبب اهو به هو، ته هن ملڪ ۾ هي ڪو اهو پهريون واقعو نه هو، جنهن ۾ محافظن هٿان ڪو عام شهري ماريو ويو هجي، هن ملڪ ته ڇا ته سڄي دنيا جو قانون آهي ته ڪنهن کي به مارڻ جو اختيار نه آهي، جيڪڏهن اوهان ڪنهن تي الزام آهي ته اوهان ان کي گرفتار ڪري عدالتن ۾ پيش ڪيو وڃي، ان کان اڳ ڪوئيٽا ۾  هڪ اهڙي ويڊيو وائرل ٿي هئي، ڪراچي ۾ به ۾ رينجرز اهلڪارن هٿان نوجوان سرفراز شاهه کي گوليون هڻي قتل ڪرڻ واري ويڊيو وائرل ٿي هئي، جنهن ٽي وي چينل اها ويڊيو ڏيکاري، ان جو  ته ڏيوالو نڪري چڪو آهي، نوجوان جي موت تي پاڪستاني ميڊيا سان گڏ انٽرنيشنل ميديا به مذمت ڪئي هئي. اهو معاملو اتي نه ٿو رڪجي ڪجهه ڏينهن اڳ ڪراچي ۾ ايف ڊبليو او جي اهلڪارن ۽ ڊرائيورن وچ ۾ منهن ماري ٿي پئي ۽ ڳالهين دوران هڪ اهلڪار جو اوچتو دماغ خراب ٿي ويو ۽ ٿيڻو به هو، ڇاڪاڻ ته هي نئون پاڪستان آهي، هڪ اهلڪار کيس روڪيندي رهيو پر هو نه مڙيو ۽ سڌي فائرنگ ڪري ڏني، جنهن جي نتيجي ۾ ڪيترائي ماڻهو زخمي ٿي پيا ۽ ٽي ڄڻا پنهنجون حياتيون وڃائي ويٺا. ڪاٺوڙ لنڪ روڊ تي ٽرانسپورٽرن ۽ ٽول پلازه تي ويٺل سيڪيورٽي عملي وچ ۾ جهيڙي بعد فائرنگ جي نتيجي ۾ مارجي ويل ٽن درائيورن جي قتل جي ايف آءِ آر صوبائي وزير مرتضيٰ بلوچ، ايم اين اي آغا رفيع الله، ڊي آءِ جي ايسٽ عامر فاروقي، پي ٽي آءِ ايم پي اي ربستان خان، ٽرانسپورٽر اڳواڻ ۽ ايم پي اي شهباز پاران ٽرانسپورٽرن سان ڊگهين ڳالهين بعد ٽرانسپورٽر شير ايوب خان پٽ مزمل خان جي مدعيت ۾ ميمڻ ڳوٺ ٿاڻي تي ايف آءِ آر نمبر 232/19 قلم 363،324/34 تحت داخل ڪئي وئي، اسٽيڊنگ ڪميٽِ پاران چيو ويو ته شهرين جا شناختي ڪارڊ ڏسڻ ايف ڊبليو او جو اختيار ناهي.

بهرحال ڪاٺوڙ ۾ به مارجي ويل ڊرائيورن جي ويڊيو وائرل ٿي، جنهن ۾ اهلڪار کي سڌي ريت فائرنگ ڪندي ڏسي سگهجي ٿو، ان کان اڳ ڪراچي ۾ رحيم شاهه نالي هڪ پنج وقت نمازي شخص هڪ سنڌي نوجوان کي گوليون هڻي قتل ڪيو ۽ کيس ڪيترائي ڪلاڪ روڊ تي تڙپائيندو رهيو پوليس به  سنڌي نوجوان کي گاڏي ۾ ويهاري مٿس ٽوڪون ڪندي رهي، جڏهن اها ويڊِيو وائرل ٿي ته هر هڪ ماڻهو ان عمل کي تمام گهڻو غلط سمجهيو، ايتري قدر جو هڪ صحافي جڏهن ان معاملي کي اٿارڻ ۽ رحيم شاهه جو اصل چهرو، جيڪو سندس ڏاڙهي پٺيان لڪيل هو بي نقاب ڪرڻ جي ڪوشش ڪئي ته مٿس دهشتگردي جا ڪيس داخل ڪري کيس حراست ۾ ورتو ويو ، جڏهن  ان صحافي جي سڏ تي شاهراهه فيصل تي ڌرڻي جو اعلان ڪيو ته سڄي سنڌ سندس ان سڏ کي لبيڪ ڪيو ۽ شاهراهه فيصل پهتي، ايتري قدر جو  انهيءَ بهادر صحافي کي حراست ۾ وٺڻ کانپوءِ  ڪجهه دهشتگردن سندس گهر تي به قبضي جي ڪوشش ڪئي، جنهن  جي ويڊيو به سوشل ميڊيا تي وائرل ٿي هئي، جتي هڪ شخص  گهر ۾ قبضو ڪري ويٺل هو، جنهن کي دروازو ٽوڙي ٻاهر ڪڍيو ويو، ايتري قدر جو کيس عدالت ۾ به پيش ڪيو ويو، جيئن ٿورو معاملو ٺريو ته کيس آزاد ڪيو ويو.  دهشتگردي ٽوڙ عدالت ۾ هلندڙ ارشاد رانجهاڻي قتل ڪيس ۾ اهم انڪشاف ٿيو هو، ايمبولينس ڊرائيور جي بيان موجب، ارشاد رانجهاڻي جو قتل ايمبولينس ۾ ٿيو هو. ايموبلينس ڊرائيور بيان ڏنو هو ته هو پوليس انسپيڪٽر علي گوهر سميت ارشاد رانجهاڻي کي اسپتال ڏانهن روانو ٿيو ته ملزم رحيم شاهه موٽرسائيڪل تي آيو ۽ ايمبولينس کي روڪرايو، هو موٽرسائيڪل تان لٿو ته هن جي هٿ ۾ پستول هو، جنهن چيو ته سڀ اڳيان ڏسو ۽ پوءِ ايمبولينس جو دروازو کليو ۽ گولي جي آواز آئي ۽ ارشاد رانجهاڻي جون رڙيون ٻڌڻ ۾ آيون، جنهن بعد اسپتال پهچڻ تي ارشاد فوت ٿي ويو هو. ڊرائيور چيو ته رحيم شاهه جي خوف کان هو خاموش هيو. اها خبر سڄي ميڊيا تي به نشر ٿي پر ان باجود رحيم شاهه قاتل کي ايئن عدالت ۾ پيش ڪيو ويو جو هو ڪو ادارن جو مهمان هجي، نه ته کيس هٿڪڙيون لڳايون ويون ۽ نه ئي وري کيس ڳچي ۾ هٿ وجهي عدالت ۾ پيش ڪيو ويو، کيس عزت سان عدالت ۾ آندو ويو، ٻئي طرف صحافي مشتاق سرڪي کي هٿڪڙيون هڻي عدالت ۾ پيش ڪيو ويو، ايتري قدر جو سندس ڪپڙن تي رت لڳل واريون  تصويرون به سوشل ميڊيا تي شيئر ڪيون ويون ۽ مطالبو ڪيو ويو هو ته کيس آزاد ڪيو وڃي، مطلب ڳالهه جي ته هتي طاقتورن لاءِ الڳ قانون آهي ۽ غريبن لاءِ هڪ ڌار قانون ٺاهيو ويو آهي،  

بهرحال ڳالهه هلي رهي آهي، ساهيوال سانحي جي ته لاهور جي دهشتگردي جي خاص عدالت ۾ ساهيوال سانحي ڪيس جي ٻڌڻي ٿي جنهن ۾ ڪيس جي جوابدارن صفدر حسين، احسن خان، رمضان، سيف الله، حسنين ۽ ناصر نواز شريف پيش ٿيا، ان کان اڳ ساهيوال سانحي ۾ عدالت مقتول ذيشان جي ڀاءُ جي ڀاءُ احتشام سميت گڏيل طور تي 49 شاهدن جا بيان قلمبند ڪيا هئا، مقتول خليل جي ٻارن عمير، منيبا ۽ ڀاءُ جليل سميت ٻين به پنهنجا بيان قلمبند ڪرايا هئا.جوابدارن جي وڪيلن سرڪاري شاهدن جي بيانن تي آڏي پڇا مڪمل ڪئي، جنهن کانپوءِ عدالت ڪيس ۾ ملوث سمورن جوابدارن کي شڪ جو فائدو ڏيندي آزاد ڪرڻ جو حڪم ڏئي ڇڏيو آهي، هاڻ بچيو آهي رحيم شاهه، ڏسون ٿا ان جو فيصلو ڪهڙو ٿو اچي، ڇاڪاڻ ته رحيم شاهه کي عزت سان عدالت ۾ پيش ڪيو ويندو آهي، جيتوڻيڪ عدالت سندس ضمانت رد ڪري چڪي آهي پر سنڌ جو عوام اڄ به ارشاد رانجهاڻي جي خون جي انصاف لاءِ روڊن تي اچڻ لاءِ تيار آهي،  ايتري قدر جو ڪجهه سنڌي رحيم شاهه جي حمايت به ڪري رهيا  آهن پر سندس ڪٽنب اڄ به انصاف لاءِ ڀٽڪي رهيو آهي، اميد آهي ته هي ڪيس ساهيوال سانحي وانگر نه ويندو ۽ ارشاد رانجهاڻي جي خون سان انصاف ٿيندو.

آصف زرداري، نوازشريف جي خراب طبيعت ۽ ڇڪتاڻ

صاحب خان ڀٽي

ملڪ ۾ هڪ دفعوٻيهر سياسي ڇڪتاڻ ۾ اضافو ٿي ويو آهي ۽ حڪومت مخالف احتجاجن جو سلسلو شروع ٿي ويو آهي، نوازشريف جي حڪومت ۾ پي ٽي آءِ  ڪيترائي ڏينهن اسلام آباد ۾ ڌرڻو هنيو ۽ حڪومت کي ٽف ٽائيم ڏيڻ جي ڪوشش ڪئي پر حڪومت کي ڪجهه به نه ٿيو هو پر اوچتو پاناما جو  روڊ رولر آيو ۽ نواز ليگ کي ٻهاري ويو ۽ ڌرڻا هڻندڙ پارٽي جو وجود آيو، جنهن اقتدار سنڀالڻ کانپوءِ اهي سڀ واعدا پورا ڪرڻ جي ڪوشش ڪئي پر سڀ ڪجهه الٽو ئي ٿي ويو، ملڪي معشيت تباهه ٿي وئي، ماڻهو بيروزگار ٿي ويا، فيڪٽريون بند ٿي ويون، ايتري قدر جو 24 ڪلاڪ پي ٽي آءِ کي ڪوريج ڏيندڙ ميڊيائي ادارن جو ڏيوالو نڪري ويو، ڪيتريون ئي چينلز  ۽ اخباري ادارن مان ماڻهن کي فارغ ڪيو ويو پر حڪومت پنهنجي ناڪامي تسليم ڪرڻ بدران سمورو الزام آصف علي زرداري ۽ نوازشريف تي مڙهي ڇڏيو، پي ٽي آءِ سرڪار چيو ته ملڪ جي تباهه ٿيل معشت جي ذميوار ماضي جون حڪومتون آهن، جن قرض ورتو ۽ اهو قرض ادا ڪرڻ لاءِ کين وڌيڪ قرض کڻڻو پئجي رهيو آهي، جيڪڏهن عام ماڻهو وياج تي پئسا کڻندو آهي ۽ ادا ناهي ڪري سگهندو ته ان کي  ٻيو  ڪير به قرض نه ڏيندو آهي پر اسان جو ملڪ دنيا جو واحد ملڪ آهي، جنهن کي قرض مٿان قرض ملي رهيو آهي، هڪ قرض  لهي ئي نه ٿو ته مٿان ٻيو قرض کنيو ويندو آهي، حڪمران ايندا آهن ۽ پنهنجا خرچ ڪڍي هليا ويندا آهن پر عوام کي انهيءَ قرض جي ڪري سخت ڏکيائن کي منهن ڏيڻو پوندو آهي، هر شيءِ مهانگي ٿي ويندي آهي پر  سياستدانن کي ڪو به فرق نه پوندو آهي، ڇاڪاڻ ته انهن سياستدان جا گهر هن ملڪ گهٽ پرڏيهه ۾ گهڻا هوندا آهن، اڪثر سياستدانن جا ٻار به پرڏيهه ۾ ئي رهندا آهن ۽ انهن  جو ڪاروبار به پرڏيهه ۾ هوندو آهي، تنهن ڪري ملڪ جي معشيت تباهه ٿي وڃي يا بهتر انهن سياستدانن کي ڪو به فرق نه پوندو آهي. هن وقت به ملڪ جي معشيت تباهي ڪناري پهتل آهي، فيڪٽريون بند ٿي رهيون آهن، ماڻهو بيروزگار ٿي رهيا آهن، حڪومت رڳو لنگر خانا کولي عوام کي دلاسو ڏيڻ ۾ پوري آهي ته هاڻ بهتري اچي ويندي، ايتري قدر جو وزيراعظم عمران خان کي اهو بيان به ڏيڻو پئجي ويو ته ماڻهن کي صبر نه آهي، 13 مهينن ۾ تبديلي جو ٿا پڇن؟ اهو سوال پنهنجي جاءِ تي صحيح به آهي ته 13 مهينن ۾ ڪارڪردگي ڏيکارڻ ڏکو هوندو آهي. پر منهنجي سوچ موجب، اهو سوال تڏهن وزيراعظم کي ڪرڻ گهرجي ها جڏهن ملڪ ۾ ساڳي صورتحال هجي ها جيڪي صورتحال نوازشريف جي دور ۾ هئي، ڀلي پي ٽي آءِ سرڪار ڪارڪردگي ڏيکارڻ ۾ دير ڪري ها پر ملڪ ۾ ادارا ته بند نه ڪري ها، معشيت تباهه ته نڪري ها، ملڪ کي قرضن جي دٻڻ ۾ ته نه ڦاسائي ها، هن وقت چيو پيو وڃي ته تاريخ ۾ پهريون تمام گهڻو قرض ورتو ويو آهي، جيڪو ماضي جي حڪومتن به نه ورتو آهي. آخر اهو قرض ڇو کنيو ويو، عوام کي ته روزگار ته مليو پر جيڪي نوڪرين ته هئا، انهن کي برطرف ڪرڻ جو سلسلو آخر ڇو شروع ٿيو، آخر حڪومت اهڙا ڪهڙا قدم کنيا جو ملڪ ۾ معشيت تباهه ٿي وئي ۽ فيڪٽريون بند ٿي ويون، ان جو هڪ جواب آهي جو موجوده کنيل قرض جي قسط ادا ڪرڻ لا  آءِ ايم ايف جا شرط منظور ڪيا ويا ۽ عوام تي ٽيڪسن جو ايترو ته بار وڌو ويو جو واپاري طبقو به ان کي برداشت نه ڪري سگهيو، جيڪي خواب پي ٽي آءِ ڏيکاريا، اهي پورا ته نه ڪيا ويا پر جيڪي ماڻهو سڪون سان پنهنجي زندگي گهاري رهيا هئا، انهن جو جيئڻ به جنجال ٿي ويو آهي.

هن وقت هر طرف حڪومت خلاف آواز اٿي رهيو آهي ۽ تبديلي جو لفظ ٻڌندو عوام ڪاوڙ ۾ اچي وڃي ٿو، ايتري قدر جو هاڻ حڪومتي وزير به تبديلي جو نالو کڻڻ کان لنوائي رهيا آهن. ان جو  هڪ ئي سبب آهي جو هاڻ عوام حڪومت خلاف روڊن تي اچڻ لاءِ تيار ٿي ويوآهي،  جنهن کي حقيقي معنيٰ ۾ تبديلي به چئي سگهجي ٿو پر حڪومت اڃا به پنهنجي موقف تي قائم آهي ته هنن ملڪ کي سنواري ڇڏيو آهي پر وزيراعظم  عمران خان   چئي رهيو آهي ته کيس بهتر ٽِيم نه ملي آهي. هڪ شخص صحافي کان سوال ڪيو ته جيڪڏهن سرفراز احمد کي ٽيم جي خراب ڪارڪردگي تي هٽائي سگهجي ٿو ته پوءِ ڇا عمرن خان جيڪا غلطي تسليم ڪئي آهي ته کيس ٽيم سٺي نه ملي آهي، هاڻ کيس  برطرف ڪيو ويندو ته ان تي صحافي چيو ته ڪرڪيٽ ۽ سياست ۾ وڏو فرق آهي؟  جيڪڏهن ڏٺو وڃي ته هن وقت فنڪار توڙي اداڪار به سياست ۾ لهي پيا آهن، جن فنڪارن ۽ اداڪارن هڪ وقت نماز به نه پڙهي هوندي، اهي به مولانا فضل الرحمان کي درس  ڏئي رهيا آهن ته اوهان اسلام جي خدمت ڪيو، آزادي مارچ نه ڪيو، لڳي ايئن ٿو ته هر ماڻهو  پنهنجو ڪم ڇڏي ٻين جو ڪم ڪرڻ  لاءِ تمام گهڻو ميدان تي لٿل آهي. جيڪڏهن هر ماڻهو پنهنجو ڪم ڪري ته بهتر ٿيندو، هونئن به اسان جي ملڪ جي فلم انڊسٽري توڙِي ڊراما انڊسٽري زوال پزير آهي، ان تي فنڪارن کي ڳالهائڻ گهرجي پر جيئن ته سياستدانن خلاف ڳالهائڻ سولو ڪم آهي ۽ ان تي فنڪارن ۽ اداڪارن کي ڳالهائڻ کان ڪير روڪي به نه ٿو سگهي ته اهي به ميدان تي لهي پون ٿا، جيئن اڳ ۾ ميڊيا تي رڳو اهو ئي ٻڌندا هئاسين ته  نوازشريف ۽ آصف زرداري ملڪ کي لٽيو آهي ۽ اهي چور آهن پر هاڻ  ملڪ جو عوام چئي رهيو آهي ته موجوده حڪمرانن کان اهي چور ئي  لک ڀيرا بهتر هئا، جن جي حڪومتن ۾ روزگار هو، ماڻهو خوشحال هئا، هن حڪومت ته غريب عوام جي چيلهه ئي چٻي ڪري ڇڏي آهي.

بهرحال هي حڪومت تاريخ جي پهرين حڪومت نه آهي، جنهن ۾ سياستدانن کي جيلن ۾ قيد ڪيو ويو هجي، ان کان اڳ به ڪيترائي سياستدان جيل ڪاٽي چڪا آهن، ايتري قدر جو عدالتن ذريعي هڪ چونڊيل وزيراعظم کي ڦاهي تي به چاڙهيو ويو ، بينظير ڀٽو کي عدالتن کي منهن ڏيڻو پيو، نوازشريف ۽ آصف علي زرداري به جيل ڪاٽي چڪا آهن، هاڻ به موجوده حڪومت ۾ جيل اندر آهي پر انهن ٻنهي جي حڪومتن ۾ ڪو به سياسي قيدي نه هو پر هيءَ واحد جمهوري حڪومت آهي، جنهن کي اپوزيشن سليڪٽيڊ چئي رهي آهي ۽ حڪومت سليڪٽيڊ لفظ تي پابندي لڳائڻ جي ڪوشش به ڪئي، ان جو مثال قومي اسيمبلي مان ملي ٿو، جتي سليڪٽيڊ لفظ تي پابندي لڳائي وئي هئي پر ان باوجود اپوزيشن عمران خان کي سليڪٽيڊ چئي رهي آهي. جيئن ته موجوده صورتحال ۾ هڪ طرف عوام ۾ڪاوڙ جي لهر ڇانيل آهي ته مٿان وري مولانا فضل الرحمان اسلام آباد جو رخ ڪيو آهي، جيئن جيئن  آزادي مارچ جي تاريخ ويجهو اچي رهي  آهي، تيئن تيئن عوام ۾ هڪ جوش ۽ ولولو پيدا ٿي رهيو آهي، سخت پابندين باوجود جي يو آءِ ف سربراهه مولانا فضل الرحمان جو ذڪر ٿي رهيو آهي، ميڊيا تي سندس تقريرون لائيو هلائڻ تي بندش باوجود سوشل ميڊيا تي جي يو آءِ ڪارڪن توڙي عام ماڻهو فضل الرحمان جي تقريرن کي شيئر ڪرڻ ۾ لڳو پيو آهي. جيڪي شيون اليڪٽرانڪ ۽ پرنٽ ميڊيا تي نشر نه ٿيون ٿين، اهي سوشل ميڊيا تي وائرل ٿي رهيون آهن، حڪومت سمجهي ٿي ته مولانا کي ڪير به نه ٿو ٻڌي پر هن وقت مولانا فضل الرحمان پاڻ کي مڃرائڻ ۾ مڪمل طور ڪامياب ٿي ويو آهي. ايتري قدر جو ملڪ جون ٻه وڏيون پارٽيون به سندس پٺيان هلڻ تي مجبور ٿي ويون آهن. نوازشريف ۽ آصف زرداري به اخلاقي طور آزادي مارچ جي حمايت ڪري چڪا آهن پر سياسي ڇڪتان جتي حڪومت جون ننڊون حرام ڪيون آهن، اتي اڳوڻي صدر آصف علي زرداري ۽ نوازشريف جي طبيعت به خراب ٿي وئي آهي، هڪ طرف ٻنهي پارٽين جي ڪارڪنن کي پنهنجي اڳواڻن جي طبيعت جي خراب هجڻ تي ڳڻتي آهي ته مٿان وري آزادي مارچ جون تياريون به ڪرڻيون آهن هاڻ ڏسڻو اهو آهي ته آخر مولانا فضل الرحمان حڪومت سان ٺاهه ٿو ڪري يا وري اسلام آباد ۾ آزادي مارچ ڪرڻ ۾ ڪامياب ٿي وڃي ٿو؟

سوشل ميڊيا تي هڪ ناليواري صحافي هڪ ويڊيو شيئر ڪئي آهي، جنهن ۾ ريلوي واري وفاقي وزير شيخ رشيد کي ٿانو خريد ڪندي ڏسي سگهجي ٿو ۽ دڪاندار شيخ رشيد کي ٿانو ڏيکاري رهيو آهي پر ان دڪان ۾ شيخ رشيد کانسواءِ ٻيو ڪو گراهڪ موجود نه آهي، صحافي جو چوڻ آهي ته شيخ رشيد جي خريداري سان سمورو سامان وڪرو نه ٿيندو ، ڇاڪاڻ ته جيئن شيخ رشيد دڪان ۾ اڪيلي گراهڪ طور نظر اچي رهيو آهي، ايئن ملڪ جي ٻين دڪاندارن جو حال آهي، دڪانن ۾ گراهڪ نه آهن ۽ دڪاندار ۽ واپاري پريشان آهن. جيڪڏهن ڏٺو وڃي ته ان ڳالهه ۾ ڪو به شڪ نه آهي ته ملڪ اندر مهانگائي چوٽ چڙهيل آهي ۽ ٽيڪسن جي رڪارڊ اضافي کانپوءِ عام ماڻهو  جي خريداري واري سهپ ختم ٿي چڪي آهي ۽ ٻن ويلن جي ماني کائڻ لاءِ به  عام ماڻهو پريشان ٿي ويو  آهي پر حڪومت کي ڪو به فرق نه ٿو پئي، جيڪڏهن حڪومت  رڳو هلندڙ ادارا ئي سنڀالي ها ته عوام تبديلي جو پڇاڻو نه ڪري ها؟ بهرحال هن وقت اڳوڻي صدر آصف علي زرداري ۽ مسلم ليگ ن جي قائد نوازشريف جي طبيعت انتهائي خراب آهي، آئين ۽ قانون موجب  ٻنهي جو حق آهي ته کين بهتر طبي سهولتون فراهم ڪيون وڃن، ڇاڪاڻ ته اهي ٻئي عام قيدي نه آهن، هڪ هن ملڪ جو صدر رهي چڪو آهي ته ٻيو وري ملڪ جو وزيراعظم  رهيو آهي. جيڪڏهن اهڙن شخصيتن سان به اهڙو ورتاءُ ڪيو ويو ته آخر عام ماڻهو تي ان جو ڪهڙو اثر پوندو. گهٽ ۾ گهٽ انهن کي  پنهنجي مرضي موجب علاج ڪرائڻ جي اجازت ڏني وڃي، جيڪڏهن حڪومت  وٽ علاج لاءِ پئسا نه آهن ته آصف زرداري ۽ نوازشريف پنهنجي خرچي تي به علاج ڪرائي سگهن ٿا، حڪومت  واضح طور ٻنهي کي ٻڌائي ته وٽن ايترا وسيلا نه آهن، جو انهن جو علاج ڪري سگهي، شهباز شريف اڳ ئي چئي چڪو آهي ته جيڪڏهن نوازشريف کي ڪجهه به ٿيو ته ان جو ذميوار عمران خان ئي هوندو. هن وقت  ملڪ جا ٻئي وڏا سياستدان جيل جي اندر آهن ۽ ٻنهي جي طبيعت به خراب  ٿي وئي آهي، جنهن سبب حڪومت کي آئين ۽ قانون تحت  ٻنهي کي علاج جون سهولتون فراهم ڪرڻ گهرجي.