Monday, 31 October 2016
Sunday, 30 October 2016
ترڪي جون عراق کي ڏنل ڌمڪيون
صاحب خان ڀٽي
بحرانن جي ور ڇڙهيل ترڪي عراق کي ڌمڪي ڏني آهي ته هو
خطري جي صورت ۾ عراق ۾ زميني آپريشن شروع ڪري سگهن ٿا، ترڪي طرفان اهو به چيو ويو
آهي ته هو داعش کي چٿڻ لاءِ سمورا وسيلا ڪتب آڻيندا، ٻي طرف وري عراقي حڪومت ترڪ
کي بشيقا بيس خالي ڪرڻ جي به درخواست ڪئي آهي جنهن کي به ترڪي رد ڪري ڇڏيو آهي، ترڪ صدر رجب طيب اردگان طرفان چيو ويو آهي
ته هو ڪنهن به صورت ۾ موصل جي بشيقه بيس کي خالي نه ڪندا ۽ هو پاڻ ڏانهن وڌندڙ هر
هڪ خطري کي منهن ڏيڻ لاءِ به تيار آهن. ترڪ صدر طيب اردگان پنهنجي بيان ۾ چيو آهي
ته هو موصل ۾ داعش کي ڪافي حد تائين مات ڏئي چڪا آهن، رجب طيب اردگان طرفان اهو به
چيو ويو ته هو عراق جي مقامي ڪرد تنظيم جي درخواست تي آيا هئا ۽ هو ڪنهن جي به
هدايت تي هلندا ۽ عراق کي خبردار به ڪيو ته هو پنهنجي حد ۾م رهي، جڏهن عراقي حڪومت
طرفان بشيقه بيس کي خالي ڪرڻ جي درخواست جون خبرون گردش ڪرڻ لڳيون ته ان وقت عراقي
حڪومت طرفان ان جي ترديد ڪئي وئي هئي ۽ چيو ويو هو ته هنن ترڪي کي ڪا به درخواست
نه ڪئي آهي. ترڪ صدر طرفان به چيو ويو ته ڪرد ورڪرز پارٽي ملڪ جي اترئين ضلعي
سنجير کي ٻيو وڳوڙي علائقو بڻائڻ چاهي ٿي پر ان جي اجازت نه ڏني ويندي ۽ اهڙن
ناپاڪ ارادن کي ناڪام بڻائڻ لاءِ ڀرپور مداخلت ڪئي ويندي. ترڪي جي پرڏيهي
ميلو ڪيسو گلو پنهنجي بيان ۾ چيو آهي ته هو پنهنجي ملڪ ڏانهن وڌندڙ ڪنهن به خطري
کي منهن ڏين لاءِ تيار آهن، جيڪڏهن ان لاءِ عراق م کين زميني آپريشن به ڪرڻنو پيو
ته هو ان لاءِ به تيار آهن. ترڪي پنهنجي
سيڪيورٽي لاءِ سنجيدا قدم کڻڻ کان پوئتي نه هٺندا ڇاڪاڻ ته شام ۾ هلندڙ ڪارروايون
ان جو مثال آهي،
ترڪي ۾ جڏهن فتح گولن جي تحريڪ سان واسطو رکندڙ فوجي ڌڙي
ترڪ صدر رجب طيب اردگان جي حڪومت جو تختو اونڌو ڪيو هو ته ان وقت اتان جي عوام بهادري
جو مظاهرو ڪندي فوجي ڌڙي جي سازش کي ناڪام بڻايو هو، جنهن جي ڏيهه توڙي پرڏيهه وڏي
واکاڻ ڪئي وئي، ملڪي سياستدان طرفان به
ترڪي جي عوام کي واڌايون ڏنيون ويون هيون ۽ آمريڪا، روس ۽ ٻين ملڪن طرفان رجب طيب
اردگان کي جمهوري حڪومت جي خاطري ڪرائي وئي آهي، جڏهن ته ان وقت جي فوجي ڪمانڊر
اهو اعتراف به ڪيو هو ته فوج ۾ ڀرتي ٿيل فتح گولن جي حمايت جمهوريت جو تختو اونڌو
ڪرڻ جي سازش ڪئي، ان وقت طيب اردگان به تمام گهڻو خوش نظر اچي رهيو ۽ کيس پنهنجي
ڪاميابي تي وڏو فخر محسوس ٿي رهيو هو، بغاوت جي ڪوشش کي ناڪام بڻائڻ بعد هر هڪ شخص
اهو ئي سوچي رهيو هو ته آخر هاڻ رجب طيب اردگان ڪهڙا قدم کڻندو ۽ ملوث ماڻهن کي
ڪهڙي سزا ملندي پر اها سڄي صورتحال ان وقت ظاهر ٿي جڏهن ترڪ صدر رجب طيب ارگان ۽
ترڪ وزيراعظم گادي واري شهر ۾ هڪ جلسي کي خطاب ڪندي چيو ته جيڪڏهن عوام چاهيو ته ملڪ اندر ڦاهي واري سزا
بحال ڪئي ويندي، سندس اهو به چوڻ هو ته ترڪ جي عوام کانئس مطالبو ڪري رهي آهي ته
ڦاهي واري سزا کي بحال ڪيو وڃي ۽ ان وقت ترڪ صدر ملڪ ۾ لڳايل ايمرجنسي واري مدي ۾
واڌ جو اعلان ڪيو هو ۽ ٻين ملڪن کي خبردار به ڪيو هو ته اهي سندس ملڪ ۾ مداخلت ڪرڻ
ڇڏي ڏين ۽ ايمرجنسي بابت ڪنهن به ملڪ کي نه ڳالهائڻ گهرجي ڇاڪاڻ ته اهو سندن
اندروني معاملو آهي، بهرحال ناڪام بغاوت کان پوءِ اهو سمجهيو پئي ويو ته هاڻ ترڪي
۾ امن ۽ خوشحالي اچي ويندي ۽ اتان جي معشيت به وڌيڪ مضبطو ٿي ويندي پر افسوس جو ائين
ن ٿيو، ڇاڪاڻ ته ناڪام بغاوت کانپوءِ ترڪي ۾ ڪرد ويڙهاڪ ۽ فتح الله گولن جي تحريڪ
سان واسطو رکندڙ ماڻهو طيب رجب اردگان جي حڪومت اٿي بيٺا، جنهن سبب ترڪي ۾ به
دهشتگردي جا واقعا معمول بڻجي ويا، جيڪي اڄ به جاري ۽ ساري آهن. جڏهن ته سارڪاري
ملازمن کي نوڪرين تان به برطرف ڪيو ويو آهي، صحافين کي به گرفتار ڪيو ويو آهي ۽ ڪجهه
تي ادارن تي پابندي به لڳائي وئي آهي. ڪڏهن انقره ۾ ڌماڪا ٿين ٿا ڪڏهن وري ترڪي جي
ٻين شهرن کي نشانو بڻايو وڇي ته ايتري قدر
جو ترڪ حڪومت فتح الله ولن جي حوالگي لاءِ آمريڪا سان رابطو ويو آهي پر ان تي به
ڪا خاص اڳڀرائي نه ٿي سگهي آهي. اڄ به
ترڪي ۾ فتح گولن جي حمايتن خلاف ڪريڪ ڊائون جاري آهي، استادن کي به نوڪرين تان
هٽايو ويو آهي،
ترڪي ۾ دهشتگردي بابت پڇا ڳاڇا جي سلسلي ۾ ٻن ميئرن کي
گرفتار ڪيو ويو .پرڏيهي ميڊيا مطابق ترڪي جي ڏکڻ اوڀر صوبي ديار باڪر جي ٻن ميئرن
گلتن ڪيسانڪ ۽ فرات انلي کي دهشتگرديءَ بابت جاچ جي سلسلي ۾ سوگهو ڪيو
ويو.سيڪيورٽي اهلڪارن جي وڏن اٽالن تائون هال ۾ سرڪاري آفيسن جي جهڙتي به ورتي ۽
اهم ڪاغذ پنهنجي قبضي ۾ وٺي ڇڏيا، بهرحال هن وقت تائين ترڪي به بحرانن کي منهن ڏئي
رهيو آهي، ڪرد ويڙهاڪن خلاف به ڪاررايون جاري آهن، ٻي طرف ترڪ حڪومت جيڪو آمريڪا
کان طيب اردگان جيڪو فتح الله گولن جي
حوالگي جو مطالبو ڪيو ان جو آمريڪا کيس ٺپ
جواب ڏئي ڇڏيو آهي. بهرحال هن وقت ترڪي
جون حالتون به سڀني جي سامهون آهن ته ٻي طرف وري عراق ۾ داعش کي ختم ڪرڻ لاءِ
آمريڪا ۽ ترڪي گڏجي ڪم به ڪري رهيا آهن ۽
عراق جي شهر موصل جو ڪنٽرول حاصل ڪرڻ جون ڪوششون ڪيون پيون وڇن. عراق جي شهر موصل تي داعش 2014ع ۾ قبضو ڪيو هو ۽ ان کان پوءَ
ان تنظيم پاران ابوبڪر البغداي جي خلافت جو اعلان پڻ ڪيو ويو هو. هاڻي عراقي ۽
اتحادي فوج کي موصل طرفن اڳڀرائي ٿي آهي ۽ ڪيترن ئي علائقن ۾ اتحادي فوج ۽ داعش جي
دهشتگردن ۾ ويڙهه جاري آهي، جڏهن ته موصل شهر ۾ هن وقت به داعش ماڻهن کي يرغمال
بڻائي رهي آهي، جنهن سبب موصل شهر مان
ماڻهو وڏي تعداد ۾ لڏ پلان ڪري رهيا آهن.
22 آڪٽوبر 2015 عراق ۾ فورسز جِي ڪارروائي دوران مارجي
ويل 365 داعش ويڙهاڪن جا 19 اجتماعي قبرن مان لاش هٿ ڪيا ويا هئا، عراقي اختيارين طرفان ٻڌايو ويو هو ته بغداد
جَي علائقي بيجي قصبا مان 365 داعش ويڙهاڪن جا لاش مليا. عراقي اختيارين جو چوڻ هو ته ڄاڻايل سمورا ويڙهاڪ فورسز
جي ڪارروائي ۾مارجي ويا هئا، جن کي 19 اجتماعي
قبرن ۾ دفنايو ويو هو، اختيارين طرفان اهو به چيو
ويو هو ته بيجي قصبا واري علائقي تي ڪجهه عرصو اڳ داعش جو قبضو هو، جيڪو عراقي ۽
آمريڪي فورسز گڏيل ڪارروائي ڪري ختم ڪرايو هو، داعش کي چٿڻ لاءِ 10 سيپٽمبر 2016ع ۾ آمريڪا عراق ۾ وڌيڪ 400
فوجي مقرر ڪيا هئا، 30 آگسٽ 2016ع ۾ عراق جي شهر التسر ۾ آپگهاتي ڌماڪي جي نتيجي ۾
18 کان وڌيڪ ماڻهو مارجي ويا هئا، جڏهن داعش عراق ۾ پنهنجا پير ڄمائڻ جي ڪوشش شروع
ڪئي هئي ته ان وقت آمريڪا ۽ سندس اتحادين طرفان ڪارروايون تيز ڪيون ويون هيون ٻي
طرف گڏيل قومن طرفان اهو بيان جاري ڪيو ويو ته دهشتگرد تنظيم داعش، عراق ۾ سوين ماڻهن
کي زبردستي موصل شهر ۾ وٺي وئي گڏيل قومن جي انساني حقن واري آفيس موجب عراق ۾ گهٽ ۾ گهٽ 200 خاندانن کي جبري
طور موصل ۾ موڪليو ويو جن کي دهشتگرد انساني ڍال بڻائي استعمال ڪري سگهن ٿا،
بهرحال هن وقت تائين عرا ق ۾ داعش کي چٿڻ
لاءِ ڪارروايون جاري آهن پر هاڻ وري جڏهن ترڪي عراق کي زميني جي ڪارروائي جي ڌمڪي
ڏني آهي ته ان مان ظاهر ٿي رهيو آهي ته هن
وقت به داعش عراق ۾ مضوبط آهي، ڇاڪاڻ ترڪي
جي اهڙي ڌمڪي مان ظاهر آهي ته ايتريون ڪارروايون ٿيڻ باوجود به ترڪي داعش کي پاڻ
وڏو خطرو سمجهي رهيو آهي.
فلمن کانپوءِ ڀارتي برآمدگي تي پابندي لڳندي
صاحب خان ڀٽي
چوندا آهن ته موسيقي روح جي غذا آهي پر اهو ڪڏهن نه ٻڌو
هو ته موسيقي جي سرحد به ٿيندي آهي پر جڏهن کان پاڪستان ڪشمير جي مسئلي کي عالمي
سطح تي اٿارڻ جي ڪوشش ڪئي آهي تنهن ڏينهن کان پاڪستان ۽ ڀارت وچ ۾ڇڪتاڻ به وڌي وئي
آهي، ٻنهي ملڪن جي سرحد تي به وقتن به وقتن فائرنگ جي ڏي وٺ جو سلسلو به هلندڙ
آهي، لاڳيتو ڀارت ايل او سي جي ڀڃڪڙي به ڪري رهيو آهي، هڪ طرف ڀارت ۾ پاڪستاني
فنڪارن کي ڌمڪيون ڏنيون پيون وڃن ته ٻي طرف وري انهن جي فلمن جي نمائش تي به
پابندي لڳائي وئي آهي، جڏهن ته ڀارتي گيت ۽ ڀارتي فنڪارن جا گانا نه هلائڻ جي
هدايت ڪئي وئي آهي، هڪ خانگي ٽي وي جي اينڪر جڏهن پيمرا جي چيئرمين کان سوال ڪيو
ته پاڪستاني ميڊيا اننهن گلوڪارن فنڪارن کي ڏيکاري سگهي ٿي جيڪي ڀارت ۾ پنهنجا گيت
رڪارڊ ڪرائي هئا، جهڙوڪ استاد نصرت فتح علي خان جنهن ڀارتي فلمن لاءِ ڪيترائي
مشهور گيت ڪلام ڳايا هئا ته ان بابت هن چيو هو ته اهي گيت تڏهن هلائي سگهجن ٿا
جڏهن اهي گيت انهن فنڪارن پاڪستان ۾ ڳايا هجن، بهرحال هاڻ هڪ ڀيرو ٻيهر پاڪستان
۾ڀارتي مواد کي ڏيکارڻ جو حڪم جاري ڪيو ويو
آهي ۽ ڪارروايون به جاري آهن، پر افسوس ان ڳالهه جو آهي ته صرف ڀارتي فلمن
۽ موسيقي تي پابندي لڳائي وئي آهي پر واپار تي ناهي لڳائي وئي ڀارت مان ٽماٽا ۽
آلو جي برآمدگي تي پابندي لڳائي ناهي وئي، جنهن جي ڪري صرف فلمن ۽ گانن تي پابندي
سان ڪو به فرق نه پوندو، ڇاڪاڻ تهه جن ماڻهن کي ڀارتي گانا يا فلمون ڏسڻيون
هونديون اهو هن جديد دور ۾ موبائل تي انٽرنيٽ ذريعي به ڏسي سگهندو رهي ڳالهه دشمن
جي مواد تي پابندي لڳائڻ جي ته اهو تڏهن ئي ممڪن ٿيندو جڏهن ڀارت جي هر پروڊڪٽ تي
پابندي لڳائي وڃي ۽ واپار به ختم ڪيو وڃي ته جئين هتان جي زراعت به مضبوط ٿي سگهي.
ڀارتي جارحيت کانپوءَ جڏهن کان ڀارتي انتهاپسندن
پاڪستاني گلوڪارن کي ملڪ ڇڏڻ جي ڌمڪي ڏني آهي تنهن ڏينهن کان ڀارتي فنڪار ۽ اداڪار
به ميدان تي لهي آيا آهن. جيڪو ڀارتي اداڪار ڪنهن پاڪستاني اداڪار جي حمايت به ڪري
رهيو آهي ته ان کي ڀارتي انتهاپسند غدار
چئي رهيا آهن ۽ انهن کي به بيان واپس وٺڻ جو چيو پيو وڃي، بهرحال ڀارت ۾ پاڪستاني اداڪارن خلاف ۽ حمايت ۾ بيان ڏيڻ وارو سلسلو هلي رهيو آهي،
جيڪو ڀارتي اداڪار پاڪستاني اداڪار جي
حمايت ۾ بيان ڏئي رهيو آهي، ان کي هتان جي ميڊيا تمام گهڻي ڪوريج به ڏئي رهي آهي،
پاڪستان ۾ به ڀارتي چينل ڏيکارڻ کان منع ڪيو ويو آهي ۽ ڊش تي به پابندي لڳائي وئي
آهي ۽ پيمرا 15 آڪٽوبر کان ڀارتي چينلن خلاف ڪريڪ
ڊائون ڪري ڇڏيو آهي، ڀارتي جارحيت کان
پوءِ سڄي ملڪ جي سينيمائن جي مالڪن به ڀارتي فلمن جي نمائش کي بند ڪري ڇڏيو آهي،
ايتري قدر جو اسٽيج ڊرامن ۾ به ڀارتي گانن کي نه هلائڻ جي هدايت ڪئي و ئي آهي،
سرڪار طرفان اهو حڪم به جاري ڪيو ويو آهي، جيڪو به اسٽيج ڊرامن ۾ڀارتي گانو
هلائيندو ان ٿيئٽر کي بند ڪيو ويندو. جڏهن کان پيمرا اهي ڪارروايون ڪيون آهن ته
ڪيبل آپريٽرز به دشمن جا چينل مڪمل طور بند ڪري ڇڏيا آهن، تنهن ڏينهن کان جگجيت
سنگهه، لتا منگيشڪر، ميڪا سنگهه، سونو نگم سميت ٻين ڪترن ئي دشمن ملڪ جي فنڪارن ۽
گلوڪارن کي ماڻهو ڏسڻ کان محروم ٿي ويا آهن، جنهن سبب هاڻ ڪو به هن ملڪ جو رهواسي
ڀارتي گانا نه ٻڌي رهيو آهي،
جڏهن کان ڪيبل آپريٽرز ڀارتي چينل بند ڪيا آهن
انهن ڏينهن کان جن ماڻهن گهرن ۾ کارا لڳرايا آهن انهن خلاف به وٺ پڪڙ شروع ٿي وئي
آهي جنهن بعد ماڻهن جي گهرن جي ڇتن تي نظر
ايندڙ کارا به غائب ٿيڻ شروع ٿي ويا آهن، جنهن بابت چيو پيو وڃي ته جنهن به ڀارتي
چينل ڏٺو ته انهن مٿان ڏنڊ وڍو ويندو، بهرحال هاڻ ڪجهه ڏينهن کان ڀارتي چينل مڪمل
بند ٿي ويا آهن ۽ ڪيبل تي صرف پنجاب اسٽيج ڊراما هلي رهياآهن جن ۾ صرف نصيبو لال جا گانا هلي رهيا آهن، ان سان
گڏ جيڪي فلمو هلايون پيون وڃن اهي به تمام
گهڻي پراڻي دور جون هلي رهيون آهن جن کي ڏسي پراڻو دور ياد اچي رهيو آهي، سلطان
راهي ۽ مصطفيٰ قريشي جون يادگار فلمون هڪ ڀيرو ٻيهر ڏسڻ لاءِ ملي رهيون آهن ته ٻي
طرف وري يار بادشاهه، مولا جٽ، منگا گجر، پتر همايو گجر دا ۽ ٻيون کوڙ پنجابي
فلمون به ڪيبل تي هلي رهيون آهن، جن کي ڏسڻ بعد ائين لڳندو آهي ته سڄو ملڪ مني
پنجاب ٿي ويو آهي، بهرحال ڀارتي چينل بند ٿيڻ سان هڪڙو ته مون کي به فائدو ٿيو آهي
جو اڳ گهر ويندو هيس ته ڪيبل تي هڪڙو ڀارتي ڊرامو ختم ئي نه ٿيندو ته مٿان وري ٻيو
ڊرامو شروع ٿي ويندو آهي، ٽي وي تي نه ته گهر ۾ ڪا فلم ڏسي سگهبي هئي ۽ نه ئي وري
ڪي خبرون ٻڌي سگهبيون هيون پر هاڻي پوگوچينل سان گڏ ڪارٽون ۽ خبرن وارا چينل به
آساني سان ڏسي سگهان ٿو، پر هڪڙي ڪمي به محسوس ٿي رهي آهي، اهي ڪمي لتا منگيشڪر،
جڳجيت سنگهه سميت ٻين مهان گلوڪارن جي آهي، جن کي ٻڌڻ سان سڪون ملندو هو پر هاڻ
جنهن ڏينهن کان موسيقي جي سرحد قائم ڪئي
وئي آهي تنهن ڏينهن کان انهن مهان گلوڪارن جا
ڳايل ڪلام ٻڌي ناهيان سگهيون ۽ اهي
خبرون به گردش ڪري رهيون آهن ته ڪنهن کي
به دشمن جا گانا هلائڻ جي به اجازت نه هوندي ۽ نه ڪو ماڻهو ڀارتي گلوڪارن جا گانا
هلائي سگهندو، جيڪڏهن هلائيندو ته ان شخص خلاف به ڪارروائي ڪئي ويندي، هاڻ ڳالهه ۾
ڪيتري صداقت آهي اهو ته وقت ئي ٻڌائندا،
ماضي ۾ جڏهن پاڪستاني سينيما گهر مڪمل طور تباهه ٿي ويا
هئا ۽ ماڻهن سينيما گهرن ڏانهن وڃڻ ڇڏي ڏنو هو تڏهن اهو چيو ويو هو ته پاڪستان ۾
معياري فلمون ن ٺهي رهيون آهن جنهن سبب پاڪستاني فلمي انڊسٽري زوال جو شڪار ٿي وئي
جنهن کي معياري بڻائڻ ڪوشش ڪئي ويندي پر ان کان اڳ ئي ڀارتي فلمن کي پاڪستان ۾
ڏيکارڻ جي اجازت ڏني وئي هئي، جنهن بعد ٻيهر
پاڪستان ۾ سينيما گهرن ۾ رونقون وڌي ويون هيون ۽ ڪراچي ۾ سينميا گهرن کي
جديد نموني ٺاهيو ويو هو ۽ ڪجهه فلمون پاڪستان ۾ ٺهيون جيڪو تمام گهڻو مشهور به
ٿيون، پر ڀارتي جارحيت کان پوءِ سينيما گهرن جي مالڪن ڀارتي نه ڏيکارڻ جو اعلان
ڪيو ته حڪومت به پاڪستاني فلمن ۽ گانن کي ڏيکارڻ جو حڪم جاري ڪيو، هاڻ ڏسڻو اهو
آهي ته سرڪار لتا، جگجيت سنگهه سميت ناليوارن ڀارتي گلوڪارن جي گانن کي هلائڻ تي
ڪيتري وقت تائين پابندي تي عمل ڪرائي سگهندي يا وري ان تي وقتي پابندي کانپوءِ
ماضي جيان ٻيهر پابندي ختم ڪري ڇڏيندي، هاڻ اهو ته وقت ئي ٻڌائندو، ماضي ۾ جڏهن
پابندي لڳائي وئي هئي ته ان وقت به پاڪستان ۾ ڀارتي فلمون ۽ اتان جي گلوڪارن جا
البم اچي رهيا هئا ۽ هر ڪو انهن ڀارتي فنڪارن جا ڪلام ٻڌندو هو، هاڻ اها سرڪار جو
ڪم آهي ته پنهنجي حڪم تي ڪيتري حد تائين عمل ڪرائي سگهندي.
روشنين جي شهر ۾ ٻيهر دهشتگردي
صاحب خان ڀٽي
ڪراچي شهر جنهن کي روشنين جو شهر سڏيو ويندو هو ان کي اڄ
دهشتگردن پنهنجي دهشت سان اونداهي ۾ ڌڪي ڇڏيو آهي، دهشتگردن جي روشنين جي شهر ۾
ٿيل قهري ڪاررواين کان پوءِ نه معشيت بهتر ٿي سگهي آهي ۽ نه ئي واپاري توڙي شهري
پاڻ کي محفوظ سمجهي رهيا آهن، اهو ئي سبب آهي جو دهشتگرد ڪجهه وقت لڪڻ بعد ٻرن
نڪري اچن ٿا ۽ پنهنجي ناپاڪ ارادن ۾ ڪامياب ٿي وري گم ٿي وڃن ٿا، سيڪيورٽي ادارا
به روز شهر جي مختلف علائقن ۾ ڪاروايون ڪري دهشتگردن کي مارڻ جي دعويٰ ڪري رهيا
آهن پر ان باوجود دهشتگردي ختم ٿيندي نظر ئي نه پئي اچي، ڪڏهن دهشتگرد سڪيورٽي
ادارن کي نشانو بڻائن ٿا ته ڪڏهن وري عام شهرين کي مارين ٿا ته ڪڏهن وري فرقيوارڻا
فسا پکيڙڻ جي سازش ڪن ٿا جنهن سبب هن شهر جو امن تباهه ٿي ويو آهي، ماضي ۾ جڏهن هڪ
سياسي جماعت طرفان سوڳ جو سڏ ڏنو ويندو هو ته هي روشنين جو شهر منٽن ۾ بند ٿي
ويندو هو ۽ روڊ ويران ٿي ويندا هئا پر جڏهن کان قانون لاڳو ڪندڙ ادارن لنڊن جو
رابطو ختم ڪرايو آهي تنهن ڏينهن کان هڙتالون ته ختم ٿي ويون پر دهشتگردي ڪارروايون
اڄ به جاري ۽ ساري آهن،
ڪجهه عرصو اڳ جڏهن روشنين جي شهرن ۾ دهشتگردن جو راڄ
قائم هو ان وقت پيپلزپارٽي ۽ ايم ڪيو ايم طرفان مطالبو ڪيو هو ته شهر کي دهشتگردن
کان پاڪ ڪيو وڃي جنهن لاءِ آپريشن کي لازمي قرار ڏنو ويو هو، جنهن جي ان وقت واکاڻ
به ڪئي وئي هئي ڇاڪاڻ ته هر هڪ شهري جي اها ئي خواهش هئي ته هن مورڙي جي شهر ۾ امن
امان جي صورتحال قائم ٿئي پر افسوس جو جڏهن آپريشن شروع ٿيو ته ان وقت مختلف
جماعتن طرفان اهي رڙيون ڪيون ويون ته انهن کي سياسي انتقام جو نشانو بڻايو پيو وڃي
۽ رينجرز صرف انهن جي ڪارڪنن کي گرفتار ڪري رهي آهي، اهڙي مخالفت بعد رينجرز طرفان
اهو بيان به جاري ڪيو ويو هو ته شهر ۾ ڪجهه سياسي پارٽين کي هٿياربند ونگز به آهن
جنهن کي ختم ڪرڻ تمام ضروري آهي جنهن تي سڀني سياسي جماعتن حامي به ڀري هئي، پر
جڏهن قانون لاڳو ڪندڙ ادارا انهن هٿياربند ونگز خلاف ڪريڪ ڊائون شروع ڪيو ته شهر
اندر ڪافي حد تائين امن امان جي صورتحال قائم به ٿي، سڪيورٽي ادارن طرفان اها
رپورٽ به جاري ڪئي وئي هئي ته ڪجهه هٿياربند ونگز شهر ۾ فرقيوارڻا فساد پکيڙڻ ۾
ملوث رهيا آهن جن خلاف به هو ڪارروائي ڪي رهيا آهن، جيڪڏهن ڏٺو وڃي ته جئين جئين
دهشتگردن خلاف ڪارروايون تيز ٿي رهيون آهن تئين تئين دهشتگرد به پنهنجي دهشت کي
قائم رکڻ لاءِ سرگرم نظر اچي رهيا آهن ۽ حڪومت جي رٽ کي چيلنج ڪري رهيا آهن، ڪڏهن
مسجدن ته ڪڏهن وري امام بارگاهن کي نشانو بڻائڻ جو به سلسلو به هلندڙ آهي،
هونءَ ته شايد ئي ملڪ جو ڪو اهڙو شهر بچو هجي جتي
دهشتگردن معصوم شهرين کي شهيد نه ڪيو هجي، گهوٽڪي هجي يا وري شڪارپور، دهشتگرد
پنهنجي وحشت جو عام ماڻهن کي نشانو بڻائيندا رهيا آهن، شڪارپور ۾ ٻن آپگهاتي
دهشتگردن عيد ڏهاڙي امام بارگاهه تي حملي جي ڪوشش ڪئي هئي جنهن کي هڪ بهادر سپاهي
پنهنجي جان جو نظرانو ڏئي ناڪام بڻايو هو، ان اهلڪار جي شهادت سبب ڪيترن ئي معصوم
ماڻهن جون جانيون بچي ويون هيون ۽ ان وقت هڪ دهشتگرد کي ماريو ويو هو جڏهن ته هڪ
دهشتگرد کي سوگهو ڪيو ويو هو، پر افسوس جو هن وقت تائين انهن دهشتگردن جي ماسٽر
مائينڊ خلاف ٿيل ڪارروائي ۾ ڪا خاص اڳڀرائي نه ٿي سگهي آهي، ڪجهه عرصو اڳ جيڪب
آباد ۾ دهشتگردن فرقيوراڻا فساد پکيڙڻ جي ڪوشش ڪئي هئي ان وقت ته ڪيترائي معصوم بي
گناهه ماڻهو شهيد ٿي ويا هئا، مطلب ته سنڌ جو راجڌاني شهر ڪراچي هجي يا ٻيو ڪو
شهر، دهشتگردن پنهنجي دهشت ۽ حڪومت جي رٽ کي چيلنج ۾ ڪا ڪسر نه ڇڏي آهي. نيشنل
ايڪشن پلان تي جڏهن کان عمل شروع ٿيو ته ان وقت سنڌ جي راجڌاني مان ڪيترن ئي
دهشتگردن کي حراست ۾ وٺڻ جي دعويٰ ڪئي هئي ۽ امن به قائم ٿيو هو، جنهن کي دهشتگردن
هڪ ڀيرو ٻيهر ڪراچي جي شهر ناظم آباد ۾ بي گناهه ماڻهن کي شهيد ڪرڻ بعد چيلنج ڪري
ڇڏيو آهي،
پيپلزپارٽي جي چيئرمين بلاول ڀٽو زرداري به ناظم آباد ۾ مجلس دوران حملي ۾ شهيد ٿيلن
ماڻهن واري واقعي تي ڏک جو اظهار ڪيو آهي ۽ مطالبو ڪيو آهي ته حملي ملوث جوابدارن
کي انجام تائين پهچايو ڃي، وڏي وزير سيد مراد علي شاهه به ناظم آباد حملي ۾ زخمي
ٿيلن جي عيادت ڪئي ۽ چيو ته هو شهر ۾ امن امان قائم ڪرائڻ ۾ ڪا به ڪسر نه ڇڏيندا. جڏهن
سياسي، سماجي ۽ سول سوسائيٽي طرفان ڪراچي ۾ آپريشن جو مطالبو ڪيو ويو هو ته ان وقت
قانون لاڳو ڪندڙ ادارن ڪرپشن ڪندڙن جي ڳچين ۾ به هٿ وڌا هئا جنهن تي ڪيترن ئي
سياسي جماعتن اعتراض به واريو هو ۽ چيو
ويو هو ته قانون لاڳو ڪندڙ ادارن جو ڪم
دهشتگردن کي گرفتار ڪرڻ جو آهي، باقي رهي ڳالهه ڪرپشن ڪندڙن کي گرفتار ڪرڻ جي ته
ان لاءِ ايف بي آءِ ۽ نيب آهي جيڪي انهن خلاف ڪارروائي سگهن ٿا، بهرحال ڪرپشن خلاف
قانون لاڳو ادارا ڪارروائي ڪن يا نه ڪن پر هڪ ڳالهه ته واضع آهي ته دهشتگرد حڪومت
جي رٽ کي چيلنج ڪري رهيا آهن جنهن جو مثال ڪراچي جي ناظم آباد واري علائقي ۾ مجلس
تي ٿيل حملي مان ملي ٿو، پوليس طرفان اهو بيان ڏنو ويو آهي ته ناظم آباد ۾ مجلس جو
کين اطلاع نه ڏنو ويو هو، جنهن سبب اهو سانحو پيش آيو آهي، روز حڪمران اهو بيان ڏئي رهيا آهن ته دهشتگرد
آخري ساهه کڻي رهيا آهن، جنهن سبب هو عام شهرين کي نشانو بڻائن پيا، پر هاڻ هر هڪ
اهو مطالبو ڪري رهيو آهي ته آخر اهو آخري ساهه دهشتگردن جو ڪڏهن نڪرندو جو ڪراچي
جا رهواسي سک جو ساهه کڻي سگهندا، اڳ ۾ ڀتي خورن جو راڄ هو ۽ هاڻ وري دهشتگرد
پنهنجين ڪاررواين ۾ معصوم ۽ بي گناهه ماڻهن کي نشانو بڻائي رهيا آهن، ڀتي خور ته
وڃي لڪي ويهي رهيا آهن پر پابندي مڙهيل تنظيم جا دهشتگرد ٻيهر سرگرم ٿي ويا آهن،
اڳوڻي وڏي وزير سيد قائم علي شاهه طرفان ڪجهه عرصو اڳ
بيان ڏنو ويو هو ته ڪراچي ۾ آبادي وڌي وئي آهي پر افسوس جو ان وقت وڏي وزير اهو نه
ٻڌايو ته هن شهر جي آبادي ڪهڙي ريت وڌي، ڌارين
جي لوڌ ڪهڙي ريت شهر ۾ آندي وئي، اڳوڻي وڏي وزير سيد قائم علي شاهه صرف اهو بيان
ڏئي پننهنجي جان آجي ڪئي هئي ته جيڪڏهن هو ڌارين جي لوڌ کي روڪين ٿا ته طاقتور
ڌريون مٿان دٻاءُ ٿيون وجهن ته انهن کي نه روڪيو، شايد هن اها به ٻڌائڻ جي زحمت نه
ڪئي هئي ته ڪراچي ۾ ڌرتي ڌڻين کي ته سنڌ حڪومت به بي دخل ڪرڻ جي ڪسر نه ڇڏي هئي ان
جو ثبوت سنڌ حڪومت جي کنيل قدمن مان ئي ملي ٿو، ڇاڪاڻ ته جيڪا پارٽي عوام کي لٽو ۽
اجهو ڏيڻ جو واعدو ڪندي هئي اها ئي پارٽي ڌرتي ڌڻين کي ڪراچي مان بي دخل ڪرڻ جا
قدم کڻي رهي هئي، مشرف دور ۾ مشرف کي به ايتري همت نه هئي جو هوڪراچي ۾ سنڌين جا
قديم ڳوٺ ڊاهي سگهي پر هن پيپلزپارٽي جي حڪومت اها همت ڏيکاري ڪراچي جا ڪيترائي
ڳوٺ ڊاهي سنڌين کي بي دخل ڪري ڏيکاريو ۽ هزاين سنڌين کان اجها کسي ڏيکاريا، بهرحال
پيپلزپارٽي ڪراچي جي سنڌي وسندين کي پڪو ڪري يا نه ڪري سندس مرضي آهي پر هن شهر ۾
امن امان لاءِ به قدم کڻي ته جئين ڪراچي جا شهري سک جو ساهه کڻي سگهن. ان ڳالهه ۾
ڪو به شڪ نه آهي جنهن ڏينهن کان نواز ليگ حڪومت ۾ آئي آهي ان ڏينهن کان ڪراچي ۾
ڪافي حد تائين بهتري آئي آهي، اسان کي اهي به ڏينهن ياد آهن جڏهن ڊاڪٽر ذوالفقار
مرزا هڪ سياسي جماعت خلاف بيان ڏيندو هو ته ڪراچي باهه جيان ٻري پوندي هئي هر طرف
گولين جو آواز هوندو هو ۽ شهر بند ٿي ويندو هو نه ته سڪيورٽي ادارا شهر کي کولرايا
سگهندا هئا ۽ نه ئي وري شهرين کي همت هوندي هئي ته هو ڪاروبار کولين پر هاڻ جنهن
ڏينهن کان ڪراچي ۾ آپريشن شروع ٿيو تنهن ڏينهن کان شهر بند ڪرائيندڙ عنصر پاڻي ئي
بند ٿي ويا، جيڪي مختلف وقتن تي پنهنجيون
ڀڀڪيون به ڏيندا رهن ٿا، پر هاڻ جڏهن وري هڪ ڀيرو ٻيهر دهشتگردن مورڙي جي شهر کي
رت سان وهنجارڻ جي ڪوشش ڪئي آهي ته شهر ۾
معصوم شهرين کي قتل ڪرڻ جو سلسلو شروع ٿي ويو آهي، روز شهر ۾ ڪٿي نه ڪٿي فائرنگ جا
واقعا معمول بڻجي ويا آهن، جيڪڏهن اخبارون پڙهنداسين ٿا ته اهو ڪو ڏينهن نه هوندو
جنهن ڏينهن ڪراچي ۾ فائرنگ جو واقعو پيش نه آيو هجي، هاڻ ڪراچي ۾ به اهڙي احتجاج ۽
ڌرڻي جي ضرورت آهي جئين عمران خان ڪرپشن خلاف ڪري رهيو آهي.
sahibalisindhi@gmail.com
Friday, 28 October 2016
لاڪ ڊائون کان اڳ پي ٽي آءِ خلاف ڪريڪ ڊائون
صاحب خان ڀٽي
گذريل ڪيتري ئي عرصي کان ٻڌندا پيا اچون ته ڪرپشن ملڪ کي اڏوهي جيان کائي رهي
آهي پر هن وقت تائين ڪرپشن خلاف ڪنهن ڪو اثرائتو قدم نه کنيوآهي جنهن سبب ملڪ جي
معشيت ۾ ڪا خاص بهتري نه اچي سگهي آهي ۽ نه ئي وري تعليم، صحت سميت ٻيون سهولتون عوام
کي فراهم ڪرڻ لاءِ قدم کنيا آهن، جيڪڏهن جمهوريت جي دعويدارن کان ان بابت پڇيو وڃي
ٿو ته اهي صرف اهو چئي پنهنجي جان آجي ڪرائي ڇڏين ٿا ته انهن کي ڪڏهن به جمهوريت
جو مدو پورو نه ڪرڻ ڏنو ويو ۽ سندن حڪمراني جو تختو اونڌو ڪيو ويو جنهن سبب
جمهوريت جو لاڀ عوام کي نه ملي سگهيو آهي، ٻي طرف وري ڪجهه نالي ماتر سياسي اڳواڻن
جو اهو به خيال آهي ته ڪرپشن سبب ملڪ ترقي نه پيو ڪري جنهن سبب عوام کي ڪو خاص
فائدو نه ملي سگهيو، انهن سياسي اڳواڻن جو اهو به خيال آهي ته حڪمران ڪرپٽ آهن،
جنهن سبب مداخلت ٿيندي رهندي آهي.
بهرحال ڪرپشن خلاف هن ڀيري پي ٽي آءِ سربراهه عمران خان سندرا ٻڌي ميدان ۾ لهي
چڪو آهي ۽ سندس چوڻ آهي ته هو ملڪ مان ڪرپشن کي ختم ڪري هڪ نئون پاڪستان تعمير
ڪندو، عمران خان اهو به چيو آهي ته هو ملڪ مان ڪرپشن جي پاڙ پٽي ڪرپشن ڪندڙن کي
انصاف جي ڪٽهڙي ۾ آڻيندو، جيڪڏهن ڏٺو وڃي ته عمران خان جي ڪرپشن خلاف شروع ڪيل
تحريڪ تي هر هڪ اتفاق ڪري رهيو آهي، ايتري قدر جو عمران خان جي هر هڪ سڏ کي لبيڪ
چئي عوام روڊن تي به نظر اچي رهيو آهي، ڪڏهن ڪڏهن ته مختلف سياسي جماعتن جي عمران
خان جي حمايت ڪرڻ مجبوري بڻجي ويندي آهي ڇاڪاڻ ته عمران خان جي ڪرپشن خلاف شروع
ڪيل مهم تي هر هڪ عمران سان ئي گڏ نظر اچي رهيو آهي ۽ ڪجهه پارٽين کي اها ڳڻتي به
آهي ته متان ايندڙ اليڪشن ۾ عوام عمران خان کي ووٽ نه ڏئي وجهي جنهن سبب پاناما
معاملي تي ڪجهه پارٽيون وزيراعظم کان جاچ جو به ظاهري طور مطالبو ڪري رهيون آهن ته
ڪجهه پارٽيون وري نواز شريف جو سرعام ساٿ به ڏئي رهيون آهن، انهن مان جي يو آءِ
سربراهه مولانا فضل الرحمان به هڪ آهي، جيڪڏهن ڏٺو وڃي ته عمران خان جيڪي به هن
وقت ڳالهيون تائين حڪمرانن جي ڪرپشن جون ڳالهيون ڪري چڪو آهي ان تي عوام مٿس
اعتماد به ڪري رهيو آهي پر ڪجهه ماڻهو اهو به چئي رهيا آهن ته عمران خان جون ڪرپشن
خلاف سموريون ڳالهيون سئو سيڪڙو درست آهن پر سندس احتجاج جو طريقو غلط آهي،
هن وقت تائين عمران خان جيڪي به ڌرڻن ۽ مظاهرن جا سڏ ڏنا آهن انهن ۾ عوام
ڀرپور نموني شرڪت ڪئي آهي ۽ انهن ڌرڻن ۽ احتجاجن ۾ عورتن جو وڏو انگ شريڪ ٿيو آهي
پر هن ڀيري تحريڪ انصاف سربراهه عمران خان جيڪو اسلام آباد کي بند ڪرڻ وارو سڏ ڏنو
آهي ان بابت حڪومت ۾ وڏو ٿرٿلو مچي ويو آهي جنهن سبب حڪومت پيپلزپارٽي سميت مختلف
پارٽين سان رابطا به ڪيا آهن پر پيپلزپارٽي اسلام آباد ڌرڻي کي ناڪام بڻائڻ واري
معاملي جي حمايت کي بلاول جي 4 مطالبن سان
مشروط ڪري ڇڏيو آهي. جنهن سبب هن وقت تائين پيپلزپارٽي تحريڪ انصاف جي 2 نومبر
واري ڌرڻي جي حمايت يا مخالفت ناهي ڪئي. عمران خان به پنهنجي هر خطاب ۾ 2 نومبر تي
ملڪ جي تقدير تبديل ڪرڻ جي دعويٰ ڪري رهيو
آهي، جئين ماضي ۾ چوندو رهيو آهي ته هو نئون پاڪستان تعمير ڪندا ، جڏهن کان عمران
خان 2 نومبر تي ڌرڻي جو اعلان ڪيو آهي ته حڪومت به مختلف پارٽين سان رابطي ۾ اچي
وئي آهي پر شايد نواز سرڪار کي اهو وقت ياد نه آيو آهي جڏهن نوازسرڪار به اهڙي
نموني ئي پيپلزپارٽي خلاف احتجاج ڪندي هئي، شايد نواز سرڪار کان اهي ڏينهن وسري
ويا آهن، جن ڏينهن ۾ پيپلزپارٽي جي حڪومت هوندي هئي ۽ وزيراعظم نوازشريف ۽ شهباز
شريف، آصف علي زرداري جي حڪومت خلاف روڊن تي لانگ مارچ ڪرڻ جو اعلان ڪندا هئا ۽
اسلام آباد طرف وڌڻ جي ڪوشش ڪندا هئا،
بهرحال اهو آصف علي زرداري هو جنهن ان صورتحال کي منهن ڏنو هو پر نواز سرڪار ۾ جڏهن به ڪنهن احتجاج يا ڌرڻي جو
اعلان ٿيو ته ان وقت نوازشريف تمام گهڻو پريشان ٿي ويندو آهي ۽ پيپلزپارٽي سميت ٻين پارٽين کان مدد وٺڻ شروع ڪندو آهي پر
افسوس جو 2 نومبري واري ڌرڻي تي
پيپلزپارٽي نواز ليگ کان ٿورو پري
پري نظر اچي رهي آهي، شايد پيپلزپارٽي کي هاڻ پڪ ٿي وئي آهي ته عمران خان،
نوازشريف کي پاناماليڪس معاملي تي انصاف جي ڪٽهڙي ۾ بيهاريندو يا پيپلزپارٽي اهو
سوچي رهي آهي ته جيڪڏهن عمران خان نوازشريف کي ڪرپشن جي ڪيس ۾ ڦاسائي ويو ته عمران
خان ايندڙ چونڊن ۾ ملڪ وزيراعظم نه بڻجي وڃي، بهرحال پيپلزپارٽي جي ڪهڙي سوچ آهي
جو هن وقت تائين نوازشريف جو ساٿ ڏيڻ جي حمايت ناهي ڪئي ان بابت هاڻ پيپلزپارٽي جا
اڳواڻ ئي ٻڌائي سگهن ٿا پر جي يو آءِ سربراهه ته نوازشريف جي سرعام حمايت جو اعلان
ڪري چڪو آهي ۽ مختلف هنڌن تي عمران خان خلاف بيان به جاري ڪري چڪو آهي، ايتري قدر
جو مولانا فضل الرحمان عمران خان کان اهو
سوال به ڪيو آهي ته آخر هو ڪنهن جي چوڻ تي هلي رهيو آهي، بهرحال گذريل ڏينهن اسلام
آباد ۾ تهريڪ انصاف جي يوٿ ڪنوينشن تي پوليس جيڪي چڙهائي ڪئي ان کانپوءِ پي ٽي آءِ
جي ملڪ اندر مقبوليت وڌي وئي آهي، ڇاڪاڻ ته پوليس يوٿ ڪنوينشن تي چڙهائي ڪري پي
ٽي آءِ جي صدر علي عباس بخاري ۽ ميڊيا سيل انچارج افتخار دراني سميت ڪيترن ئي
ڪارڪنن کي گرفتار ڪيو، جنهن سبب سڄي ملڪ ۾ پي ٽي آءِ ڪارڪن روڊن تي نڪري آيا هئا ۽
احتجاجي مظاهرا ڪري ڌرڻا هنيا ويا، جنهن دوران حڪومت کان ڪارڪنن کي بازياب ڪرائڻ
جو مطالبو ڪيو ويو.
جڏهن پوليس ڪنوينشن تي چڙهائي ڪئي ته ان وقت هڪ عورت پوليس اهلڪار هڪ پي ٽي
آءِ جي عورت ڪارڪن کي حراست ۾ وٺڻ جي ڪوشش ڪئي ته ٻنهي هڪ ٻئي جي ڳلي ۾ هٿ وڌو،
جنهن کي ميڊيا به ڏيکاريو، جنهن کي ڏسي اهو محسوس ڪري سگهجي پيو ته پي ٽي آءِ جا
مرد توڙي عورت ڪارڪن بنا ڪنهن خوف جي احتجاج ڪري رهيون هيون ۽ کين گرفتار ٿيڻ جو
به ڪو خوف نه هو، جنهن ريت هڪ عورت ڪارڪن عورت پوليس اهلڪار کي ڍڪا ڏئي رهي هئي ان
مان اهو صاف ظاهر پيو ٿئي ته هتي قانون جو ٻٽو معيار آهي، سنڌ ۾ احتجاج ڪرڻ تي
عورتن تي شيلنگ ۽ واٽر ڪينن جو استعمال ڪيو ويندو آهي ۽ انهن تي لٺبازي ڪئي ويندي
آهي پر ڏاڍن کي پوليس ته ڇا هتان جا حڪمران به ڪجهه نه ڪري سگهندا آهن، جيڪي سنڌ ۾
ڪا عورت ائين پوليس اهلڪار سان پيش اچي ها ته ان تي ڊيوٽي اٽڪاءُ جو ڪيس داخل ڪري
جيل ۾ وڌو وڃي ها، بهرحال عمران خان هونءَ به اهي سوال ٿي رهيا آهن ته آخر سندس
پٺيان ڪنهن جا هٿ آهن ۽ هو ڪنهن جي چوڻ تي اهو سڀ ڪجهه ڪري رهيو آهي. بهرحال پي ٽي
آءِ طرفان اها دعويٰ ڪئي وئي آهي ته ڪنوينشن تي پوليس چڙهائي ڪري 200 کان وڌيڪ
ڪارڪنن کي گرفتار ڪيو ويو آهي، ٻي طرف
بلاول ڀٽو زرداري طرفان به اسلام آباد ۾ پي ٽي آءِ جي ڪنوينشن تي پوليس چڙهائي جي
مذمت ڪئي آهي ۽ چيو آهي ته حڪومت پنهنجي
پيرن تي پاڻ ڪهاڙو هنيو آهي، بلاول ڀٽي زرداري اهو به چيو آهي ته عورتن سان بدتميزي
ڪرڻ حڪومت جي وائڙائپ جو ثبوت آهي.
جڏهن اسلام آباد ۾ 2 نومبر کان اڳ پي ٽي آءِ خلاف ڪريڪ ڊائون شروع ٿيو ته ائين لڳي رهيو هو ته هاڻ شايد حڪومت ۽ پي ٽي
آءِ وچ ۾ ڳالهين جا سمورا دروازا بند ٿي ويا آهن، ڇاڪاڻ ته عمران خان اڳ به اهو
بيان جاري ڪري چڪو آهي ته هو هاڻ 2 نومبر تي حڪومت سان ڳالهيون ڪندا. گذريل ڏينهن
حڪومت طرفان لال حويلي ۽ بني گالا تي به
ڪڙو چاڙهيو ويو۽ ڪنٽينر به رکي ايندڙ ويندڙ رستن کي سيل ڪيو ويو هو، جنهن سبب پي
ٽي آءِ سربراهه عمران خان سمورن ڪارڪنن کي
بني گالا پهچڻ جي هدايت ڏني هئي، بهرحال هاڻ هاڻ ڏسڻو اهو آهي ته نواز ليگ سرڪار 2 نومبر واري ڌرڻي
کي ڪهڙي ريت ناڪام بڻائيندي، ان بابت ته هاڻ صرف نواز ليگ اڳواڻ ئي ٻڌائي سگهن ٿا،
ڇاڪاڻ ته پي ٽي آءِ جي ڪنوينشن تي چڙهائي بعد ٿيل گرفتارين کان پوءِ سڄي ملڪ جهڙي
ريت احتجاج شروع ٿي ويا آهن ۽ اهو چيو پيو وڃي ته عمران خان جو اسلام آباد کي بند
ڪرائڻ واري اعلان کان اڳ ئي حڪومت پي ٽي
آءِ خلاف ڪريڪ ڊائون شروع ڪري ڇڏيو آهي، ان مان اهو اندازو لڳائي سگهجي ٿو حڪومت
گرفتاريون ڪري عمران خان کي وڌيڪ مضبوط ڪري ڇڏيو آهي ۽ لال حويلي واري جلسي
کان ويندي 2 نومبر ڌرڻي تائين هو آساني
سان ماڻهن کي گڏ ڪرڻ ۾ ڪامياب ٿي ويندو.جيتوڻيڪ هاءِ ڪورٽ اسلام آباد کي بند نه
ڪرڻ جو حڪم ڏئي چڪو آهي پر ان باوجود عمران خان اسلام آباد کي بند ڪرڻ واري فيصلي
کي ڪامياب بڻائڻ لاءِ وڏو پرعزم نظر اچي رهيو آهي.
Thursday, 27 October 2016
داعش خلاف ڪارروايون ۽ اجڙي ويل شهر
صاحب خان ڀٽي
گذريل ڪجهه عرصي کان دنيا جا ڪيترائي ملڪ دهستگردي جي لپيٽ ۾ اچي چڪا آهن، ان
جو سڀ کان وڏو سبب معدني وسيلن تي قبضو، دنيا تي حاڪميت ڪرڻ وارو خواب ۽ پاڻ کي
ٻئي کان وڌيڪ طاقتور ثابت ڪرڻ آهي. اهو سبب آهي جو اڄ دنيا جا ڪيترائي ملڪ
دهشتگردي کي منهن ڏئي رهيا آهن، شام، عراق، يمن ۽ ٻين ملڪن ۾ دهشتگردن جي حملن سبب
ٻارڙن ۽ عورتن سميت ڪيترائي ماڻهو اجل جو شڪار ٿي چڪا آهن، افغانستان کان ويندي
افغستان تائين به دهشتگردن پنهنجي قهري ڪاررواين ۾ ڪيترن ئي معصوم شهرين کي نشانو
بڻايو آهي، آفريقي ملڪن ۾ به دهشتگرد تنظيمن جي حملن ۾ ڪيترائي خاندان اجڙي چڪا
آهن، جڏهن ته عراق ۽ يمن ۾ به داعش قهري ڪاررواين ۾ ڪيترن ئي ماڻهن کي نشانو بڻايو
آهي، جنهن سبب ڪيترن ئي ملڪن ۾ امن امان
جي صورتحال انتهائي خراب ٿي چڪي آهي، جيتوڻيڪ آمريڪا ۽ سندس اتحادين طرفان دهشتگرد
تنظيمن کي چٿڻ لاءِ ڪارروايون جاري آهن پر افسوس انهن ڪاررواين سان دهشتگرد تنظيم
تي به ڪو به اثر نه پيو آهي پر رهندو انهن ملڪن جا عام شهري ويتر ٻٽي عذاب ۾ مبتلا
ٿي ويا آهن. شام، يمن ۽ عراق ۾ جڏهن دهشتگرد تنظيمن خلاف آمريڪا ۽ سندس اتحادين
ڪارروائي شروع ڪرڻ جو اعلان ڪيو هو ته سڀ
اهو ئي سمجهي رهيا هئا ته شايد انهن ملڪن ۾ امن قائم ٿي ويندو پر افسوس جو انهن
ملڪن ۾ هن وقت تائين امن امان جي صورتحال بحال نه ٿي سگهي آهي.
آمريڪا طرفان هر ڀيري اهو بيان جاري ڪيو ويندو آهي ته دهشتگرد دنيا لاءِ وڏو خطرو آهن، ڪڏهن
آمريڪا، طالبان کي خطرو قرار ڏيندو آهي ته
ڪڏهن وري القاعده کي وڏو خطرو قرار ڏنو آهي پر ڪجهه سالن کان آمريڪا داعش کي دنيا لاءِ
خطرو قرار ڏنو آهي، آمريڪا طرفان اهو به چيو ويو آهي ته داعش ڪيترن ئي ماڻهن کي
قتل ڪيو آهي ۽ داعش طالبان، القاعده کان به وڌيڪ خطرناڪ آهي، جنهن کي ختم ڪرڻ لاءِ
سڀني کي گڏجي ڪم ڪرڻو پوندو، بهرحال هن وقت تائين شام، يمن ۽ عراق ۾ آمريڪا ۽ سندس
اتحادين کي ڪا خاص اڳڀرائي حاصل نه ٿي سگهي آهي. 26 آڪٽوبر 2016ع تي به شام جي شهر ادليب ۾ اسڪول تي هوائي حملو ڪيو ويو هو
جنهن ۾ شاگدن سميت 22 ڄڻا مارجي ويا هئا، ٻي طرف وري يمن ۾ به 9 آڪٽوبر 2016 تي هڪ
شادي جي تقريب ۾ اتحادي فوج طرفان بمباري ڪئي وئي هئي جنهن ۾ 160 ڄڻا فوت ۽ 500
کان وڌيڪ زخمي ٿي پيا هئا. 1990ع ڌاري جڏهن عراق ڪويت تي قبضو ڪرڻ لاءِ حملو ڪيو
هو ته ان وقت گڏيل قومن جي سلامتي ڪائونسل عراق تي حملي ڪرڻ جو فيصلو ڪيو هو، 16
جنوري 1991ع تي اتحادي فوج عراق جي خلاف آپريشن شروع ڪيو هو، جنهن دوران اتحادي
فوج هوائي حملا ڪيا هئا، جڏهن ته 23 فيبروري 1991ع سعودي عرب جي سرحد وٽان عراق تي زميني حملو ڪيو
ويو هو، جنهن بعد ڪويت تان عراقي قبضو ڇڏايو ويو هو. ڪويت تي قبضي بابت اهي خبرون
گردش ڪري رهيون هيون ته عراق تيل تي قبضو ڪرڻ لاءِ ڪويت تي حملو ڪيو هو، جنهن سبب
سعودي عرب کي به اڳتي وڌڻو پيو هو ۽ ڪويت تان عراق جو قبضو ڇڏرائڻ لاءِ اتحادين جو
ساٿ ڏنو هو، ڇاڪاڻ ته جيڪڏهن سعودي عرب ڪويت تان عراق جو قبضو نه ختم ڪرائي ها
ته عراق جو ڪويت جي سمورن معدني وسيلن تي
قبضو ٿي وڃي ها،جنهن سان عراق مضبوط ٿي
وڃي ها، جنهن سبب سعودي عرب ڪويت تان عراق جو قبضو ختم ڪرائڻ لاءِ ڪارروائي ۾ ساٿ
ڏنو هو، جنهن سبب ڪويت تان عراقي فوج جو ختم ڪرايو ويو هو، بهرحال هن وقت ڪويت
اندر ته امن امان جون حالتون بهتر آهن پر عراق
۾ هن وقت به جهيڙو هلندڙ آهي، ان جو سڀ کان وڏو سبب اهو آهي ته اتي ٻه ڌڙا ٿي
چڪا آهن جيڪي پاڻ ۾ وڙهي رهيا آهن، جنهن
سبب اتان جون حالتون تمام گهڻيون خراب آهن
ته ٻي طرف وري داعش به جنم ورتو آهي، فرانس کان ويندي آمريڪا تائين ڪنهن به ملڪ ڪا
دهشتگرد ڪارروائي ٿيندي آهي ته ان جي ذميواري داعش قبول ڪري وٺندي آهي، جئين ماضي
۾ طالبان ۽ القاعده تنظيمون قبول ڪري وٺنديون هيون، هاڻ به ائين ئي ٿي رهيو آهي،
بس فرق ايترو آهي جو ماضي ۾ طالبان ۽ القاعده کي
خطرو چيو ويندو هو پر هاڻ داعش کي دنيا لاءِ وڏو خطرو قرار ڏنو وڃي ٿو. 1 سيپٽمبر
2014 ۾ گڏيل قومن طرفان رپورٽ جاري ڪئي وئي ته عراق ۾ فرقيوراڻي تشدد جي ڪاررواين
۾ هڪ مهيني اندر 1420 ماڻهو مارجي ويا،جڏهن ته اهو به چيو ويو هو ته داعش ( اءِ
ايس آءِ ايس ) جي ويڙهاڪن طرفان ڪيترن ئي علائقن تي قبضو به ڪيو ويو، جنهن سبب
ماڻهو لڏ پلاڻ تي مجبور ٿي ويا هئا. گڏيل قومن طرفان اهو به چيو ويو هو ته جولاءِ
2014 ۾ عراق اندر تشدد جي واقعن ۾ 1737 ماڻهو مارجي ويا، جڏهن ته جون 2014
اندر 2400 ماڻهو مارجي ويا هئا. گڏيل قومن
طرفان اهو ٻڌايو ويو ته داعش اقليتن خلاف جنگ جو اعلان ڪيو هو، جنهن سبب لکين
ماڻهو ڪردستان ڏانهن لڏ پلاڻ ڪري ويا هئا. ٻي طرف آمريڪا طرفان چيو ويو هو ته عراق ۽ شام ۾ زمينون حقيقتون تبديل ٿي رهيون
آهن ۽ داعش جي فنڊنگ ۽ غيرملڪي ويڙهاڪن جي آمد سبب جنگ جو ميدان نظر اچي رهيو آهي.
آمريڪي عملدارن طرفان اهو به چيو ويو ته داعش عراق ۾ القاعده کان اڀرندڙ ۽ اڳوڻي
عراقي ڊڪٽيٽر صدام حسين جي دور جي فوجي آفيسرن تي ٻڌل آهي، جڏهن ته ان تنظيم جا
سليپر سيل به آهن، جيڪي ڌماڪا ڪندا، ڪجهه عرصو اڳ عراقي سيڪيورٽي فورسز طرفان
ڪرڪوڪ شهر تي داعش جي حملي کي مڪمل طور ناڪام بڻائي ڇڏيو هو، جڏهن ته اها دعويٰ به ڪئي وئي هئي ته داعش جي 74 دهشتگردن کي ماريو ويو، جڏهن ته
عراقي سيڪيورٽي فورسز اهو اعتراف به ڪيو هو ته شدتپسندن جي حملي ۾ 46 ڄڻا مارجي
ويا هئا. عراق جي علائقي سنجار ۾ به داعش جي 15 دهشتگردن کي مارڻ جي دعويٰ ڪئي وئي
هئي، جڏهن ته داعش به اها دعويٰ ڪئي هئي ته هنن سڪيورٽي فورسز جي ٻن گاڏين کي تباهه ڪيو هو.
21 آڪٽوبر 2016 ع
تي عراقي فوجي موصل جي هڪ عمارت تي پنهنجو جهنڊو ڦڙڪايو هو، جڏهن عراقي فوج داعش
خلاف ڪارروايون شروع ڪيون هيون ته ان وقت اتحادين طرفان به داعش کي ختم ڪرڻ لاءِ
عراق تي حملا ڪيا ويا هئا، جنهن سبب
ڪيترائي شهر کنڊرات جو ڏيک ڏيڻ لڳا هئا، بهرحال هن وقت به عراق جا ڪيترائي شهر
کنڊرات جو ڏيک ڏئي رهيا آهن ۽ ان جو سڀ کان وڏو سبب به اهو ئي آهي ته اتي دهشتگرد
تنظيمون پنهنجو ڪنٽرول حاصل ڪرڻ لاءِ اتحادي فوج سميت عام شهرين کي نشانو بڻائي
رهي آهي، جيتوڻيڪ هن وقت تائين داعش خلاف اتحادي فوج کي ڪا به اڳڀرائي حاصل نه ٿي
سگهي آهي پر ان باوجود عراقي حڪومت داعش خلاف به ڪا اڳڀرائي حاصل نه ٿي سگهي آهي. جنهن
سبب عراقي شهر موصل ۾ وڏي پئماني تي لڏپلاڻ ٿي آهي، جڏهن ته گڏيل قومن طرفان به
اها ئي رپورٽ جاري ڪئي وئي آهي ته موصل ۾ ڪيترائي ماڻهو متاثر ٿيا آهن، جن جي هن وقت تائين سار سنڀال ناهي لڌي وئي. ٻي
طرف وري آمريڪي عملدار طرفان اهو بيان
جاري ڪيو ويو ته عراقي شهر ڪرڪوڪ ۾ داعش
جي حملي سبب موصل جي جنگ ۾ تمام گهٽ اثر پيو، هوڏانهن ترڪ صدر رجب طيب اردگان به
عراقي حڪومت جي مطالبي کي رد ڪندي چيو ته هو ڪنهن به صورت ۾ عراقي بيس بعشيقه کي
نه ڇڏيندا ڇاڪاڻ ته هو عراقي حڪومت جي ڪنهن به حڪم کي نه مڃيندا، رجب طيب اردگان
طرفان اهو به بيان جاري ڪيو ويو ته هو عراقي حڪومت جي درخواست تي بعشيقه بيس جو ڪنٽرول سنڀاليو هو ۽ هو هن وقت واپس
ڪنهن به صورت ۾ واپس نه ويندا، جيستائين جهنن داعش کي ختم نه ڪندا. جڏهن ته عراقي حڪومت طرفان اهو بيان جاري ڪيو ته
هنن ڪا به اهڙي درخواست ترڪي کي نه ڪئي هئي.
پناهگيرن بابت عالمي اداري آءِ او ايم چيو هو ته 17 آڪٽوبر تائين هن وقت تائين
8940 افراد ماڻههو بي گهار ٿي ويا. گڏيل قومن طرفان چيو ويو ت جنگ سبب ٻه لک
کان وڌيڪ بي گهر ٿي سگهن ٿا.بهرحال هاڻ
ڏسڻو اهو آهي ته اتحادين طرفان شروع ڪيل
ڪارروايون داعش کي ڪنهن حد تائين ٻنجو ڏئي سگهنديون يا وري صرف هوائي حمل ڪري غريب ماڻهن کي وڌيڪ نقصان لاءِ نشانو بڻايو ويندو. ڇاڪاڻ ته گذريل ڪيتري
ئي عرصي کان دنيا اندار دهشتگردن خلاف
ڪاروايون جاري ۽ ساري آهن پر انهن
ڪاررواين ۾ به پاڪستان کي ڪا خاص اڳڀرائي حاصل نه ٿي سگهي آهي. ۽ هاڻ افغانستان ۾ به داعش جي
موجودگي ظاهر ڪئي پئي وڃي، جنهن سبب سڀني ملڪن کي گڏجي داعش جهڙي خطرناڪ تننظيم کي
منهن ڏيڻ گهرجي.
Wednesday, 26 October 2016
Tuesday, 25 October 2016
Subscribe to:
Posts (Atom)