Tuesday, 28 February 2017
Monday, 27 February 2017
Sunday, 26 February 2017
Friday, 24 February 2017
عوامي حقن لاءِ جاکوڙيندڙ دهشتگرد ناهن...!!
صاحب خان ڀٽي
صوفين جي هن سرزمين کي انسانيت جي دشمنن رت سان
وهنجاري امن امان تباهه ڪري ڇڏيو آهي، جنهن سبب صوفين جي هي سرزمين سڄي دنيا ۾
دهشتگردن جي موجودگي سبب غير محفوظ نظر اچي رهي آهي، ان جو سڀ کان وڏو سبب اهو آهي
ته سنڌ جي حڪمرانن سنڌ کي لاوارث بڻائي سڄي قوم کي ننڌڻڪو ڪري ڇڏيو آهي، جيڪڏهن
سنڌ جا ڪامورا ڌارين جي لوڌ کي سنڌ ۾ داخل ٿيڻ کان روڪين ها ته نه اڄ هتي
بيروزگاري هجي ها ۽ نه ئي وري امن امان جي صورتحال ايتري خراب ٿي وڃي ها، ڪراچي
کان ويندي سکر تائين غيرقانوني طور هزارين
پرڏيهي ماڻهو ترسيل آهن، اهي ڪهڙي ريت هن
ملڪ ۾ داخل ٿيا ۽ انهن کي ڪنهن آندو، شايد ان جو جواب ڪير به ڏيڻ نه پسند نه ڪندو،
خبر ئي نه ٿي پئي ته افغانستان مان ايندڙ
ڌارين جي لوڌ هتي ڪئين آباد ٿي ۽ انهن جا سهولتڪار ڪير هئا ۽ آهن جيڪي انهن جي مدد
ڪري رهيا آهن، جڏهن کان سيوهڻ سانحو پيش آيو آهي، ان ڏينهن کان روايتي طور تي
افغان شهرين جي وٺ پڪڙ وارو عمل شروع ڪيو ويو آهي پر انهن کي عزت سان پنهنجي ملڪ
موڪلڻ لاءِ حڪومت ڪهڙا قدم کنيا آهن، ان بابت نه ته صوبائي حڪومت ٻڌائي رهي آهي ۽
نه ئي وفاقي حڪومت ٻڌائڻ پسند ڪري رهي آهي، بهرحال جڏهن افغان پناهگيرن کي وفاقي حڪومت ملڪ
اندر ترسائڻ جو فيصلو ڪيو هو ته ان وقت سنڌ جا قومپرست ئي هئا، جيڪي روڊن تي نڪتا
هئا پر حڪومت ويٺل سنڌ جي ڪامورن خاموشي اختيار ڪئي هئي صرف اڳوڻي وڏي وزير سيد
قائم علي شاهه ميڊيا سان ڳالهائيندي اهو
اعتراف ڪيو هو ته جيڪڏهن هو سنڌ ۾ داخل ٿيندڙ ڌارين جي لوڌ کي روڪين ٿا ته مٿان
وڏي طاقت انهن کي نه روڪڻ جو حڪم ڏئي ٿي، جيڪڏهن صوبي جو وڏو وزير بيوس بڻيل هجي
ته پوءِ آخر صوبا ڪهڙي ريت خودمختيار آهن، ڪهڙي ريت سنڌ جي حڪمران جماعت سنڌ کي خودمختيار هجڻ بابت دعويٰ ڪري رهي آهي،
آدمشماري جو مامرو هجي يا وري سنڌ ۾ پاڻي جي کوٽ،
انهن سمورن معاملن تي جهڙي ريت قومپرستن آواز اٿاريو هوندو، شايد سنڌ جي ڪامورن
ڪڏهن به نه اٿاريو آهي، سنڌ ۾ ٻٽو نظام هجي يا وري ڪالا باغ ڊيم، صرف سنڌ جا
ساڃاهه وند ۽ قومپرست ئي هوندا آهن جيڪي روڊن تي نڪري ايندا آهن ۽ پنهنجي
ڌرتي ۽ پنهنجي قوم جي حقن لاءِ آواز
اٿاريندا آهن، پر افسوس جو انهن قومپرستن جي نه ته ڪو سار لهندو آهي ۽ نه انهن جي
پٺڀرائي ڪندو آهي، سنڌ جي حڪمران جماعت به جڏهن اقتدار کان ٻاهر هوندي آهي ته ان
کي به صرف قومپرست اڳواڻ ئي ياد ايندا آهن ڇاڪاڻ ته انهن ڪامورن کي خبر هوندي آهي
ته اهي ئي قومپرست آهن جيڪي سنڌ جي عشق ۾ پنهنجي به قربان ڪرڻ کان نه لنوائيندا
آهن تنهن جي ڪري ڪالا باغ ڊيم جو مسئلو هجي يا وري ٻي ڪا تحريڪ، سياسي اڳواڻ صرف
ئي صرف قومپرستن وٽ وڃي ئي گڏجي احتجاج ڪرڻ جي دعوت ڏيندا يا وري اي پي سي جي نالي
تي قومپرستن کان مدد ورتي ويندي آهي، پر افسوس جو جڏهن به اهي ڪامورا اقتدار ۾
ايندا آهن ته انهن کان اهي قومپرست اڳواڻ وسري ويندا آهن ۽ اهي قومپرست انهن کي
خراب لڳڻ شروع ٿي ويندا آهن ۽ اهي ڪامورا انهن قومپرست ڪارڪنن خلاف ڳالهائڻ شروع
ڪندا آهن، ان جو سڀ کان وڏو سبب اهو هوندو آهي جو ڪجهه قومپرست انهن جي ناانصافين
خلاف احتجاج ڪندا آهن ته ڪجهه وري انهن جي
ڪرپشن آڏو ديوار بڻجي ويندا آهن تنهن جي ڪري اهي قومپرست انهن لاءِ زهر بڻجي ويندا
آهن،
جڏهن سنڌ
جي دشمنن سنڌ جي ورهاڱي جي ڳالهه ڪئي هئي
ته ان وقت به انهن ڪامورن کي ايتري همت نه ٿي هئي جو انهن دشمنن خلاف ڳالهائي، ان
وقت به بهادري جو مظاهرو سنڌ سان عشق ڪندڙن ئي ڏيکاريو هو، جيڪڏهن ڏٺو وڃي ته هن
وقت سنڌ دهشتگردي جي باهه ۾ ٻري رهي آهي، ان جو سڀ کان وڏو سبب ڌارين جي لوڌ ئي
آهي ۽ جيڪي به دهشتگردي جون ڪارروايون ٿي رهيون آهن انهن جا پيرا به افغانستان
ڏانهن وڃن ٿا، اسان جا حڪمران چئي رهيا آهن ته افغان دهشتگردن کي هتان جي ڪجهه
مقامي ماڻهن جي سهولتڪاري حاصل آهي، پر افسوس جو حڪومت انهن خلاف هن وقت تائين ڪا
خاص ڪارروائي نه ڪري سگهي آهي، جنهن سبب اهي دهشتگرد ڪڏهن امام بارگاهن تي حملا ڪن
ٿا ته ڪڏهن وري مسجدن ۾ بم ڌماڪا ڪن ٿا، جيتوڻيڪ هن وقت ملڪ ۾ ضرب عضب ۽ ردالفساد آپريشن به هلي رهيو
آهي پر ان سان گڏ ڌارين جي لوڌ کي ملڪ مان ڪڍڻ جي لاءِ ڪو به حتمي فيصلو نه ڪيو
ويو آهي،
جيڪڏهن اهي ٻئي آپريشن هلن به پر هن ملڪ رهندڙ
افغانين جي ذميواري ڪير کڻندو، هن وقت افغانستان به دهشتگردي خلاف جنگ وڙهي رهيو
آهي ۽ اهو الزام وري پاڪستان تي لڳائڻ ۾ دير به نه ڪندو آهي ته پوءِ آخر اسان جو
ملڪ انهن افغانين کي ڪهڙي قانون تحت ڪيمپن
۾ رهائڻ بدران هر شهر ۾ رهڻ جي اجازت ڏئي
رهيو آهي، جيڪڏهن هن وقت افغان پناهگيرن بابت حڪومت فيصلو نه ڪيو ته سيوهڻ،
ڪوئيٽا، جيڪب آباد، شڪارپور ۽ پشاور جهڙا
سانحا پيش ايندا رهندا ۽ ان جو ذميوار به اسان پاڻ ئي آهيون، ڇاڪاڻ ته اسان حڪومت
کي ڌارين جي لوڌ کي بي دخل ڪرڻ لاءِ مجبور نه ڪري رهيا آهيون. ڪجهه عرصو اڳ سرتاج
عزيز اهو پاڻ ئي اعتراف ڪري چڪو آهي ته هنن لکين پناهگيرن کي نوڪريون ڏنيون آهن ۽
انهن کي سموريون سهولتون فراهم ڪيون پيون وڃن، تمام گهڻو افسوس سان چوڻو پئجي رهيو
آهي ته هڪ طرف سنڌ ۾ نوجوان بيروزگاري سبب آپگهات ڪري رهيا آهن ته ٻي طرف وري
نوڪريون پناهگيرن کي ڏئي ۽ وڏي فخر سان اعلان ڪيا وڃن ٿا، جيڪڏهن اهي ئي نوڪريون
هن ملڪ جي نوجوانن کي ڏنيون وڃن ها ته شايد سنڌ ۾ ماڻهو پنهنجا ٻچا وڪرو نه ڪن ها
۽ نه ئي ڪراچي، حيدرآباد ۽ سکر جهڙن شهرن ۾ نوڪرين لاءِ احتجاج ڪيا وڃن ها، جن سنڌي
نوجوانن کي نوڪريون ڏنيون به ويون آهن ته انهن کي وري حڪومت وٽ پگهاورن ڏيڻ لاءِ
پيسا به نه آهن، ته پوءِ آخر انهن لکين پناهگيرن کي ڪهڙي نموني سان نوڪريون ڏنيون
ويون.
بهرحال
سيوهڻ سانحي بعد قانون لاڳو ڪندڙ ادارا حرڪت ۾ ته آيا آهن ۽ ڪيتريون ئي گرفتاريون
به ڪيون ويون آهن، ان سان گڏوگڏ انهن ماڻهن خلاف ڪارروايون ڪيون پيون وڃن جيڪي
عوامي حقن لاءِ جدوجهد ڪندڙ آهن، مطلب ته قومپرست ڪارڪنن خلاف هڪ ڀيرو ٻيهر ڪريڪ
ڊائون شروع ڪيو ويو آهي، جئين ماضي ۾ جيئي
سنڌ چوڻ ڏوهه هوندو هو ۽ جيئي سنڌ نعرو هڻڻ تي پابندي هوندي هئي اهڙي ريت هاڻ
قومپرست سڏرائيندڙ کي به دهشتگرد قرار ڏنو پيو وڃي ۽ اهو سڀ ان ڪري ٿي رهيو آهي جو
اهي قومپرست آهن جيڪي گوڙاڻوڊيم، ڪالاباغ ڊيم، سنڌ دشمن منصوبن آڏو ديوار بڻيل آهن
۽ ان ڀت کي ڀڃڻ لاءِ قومي ڪارڪنن خلاف ڪريڪ ڊائون شروع ڪيو ويو آهي، عدم تشدد جي
سياست ڪندڙن کي به دهشتگرد قرار ڏنو پيو وڃي، انهن خلاف ڪيس به داخل ڪيا پيا وڃن ۽
اهو ڪم صوبائي حڪومت به مختلف وقتن تي ڪندي رهندي آهي، ڇاڪاڻ ته جڏهن سنڌ جي
حڪمرانن سنڌ اندر ٻٽو نظام لاڳو ڪيو هو ته ان وقت به اهي قومپرست اڳواڻ هئا جن هڪ
طاقت ٿي حڪومت کي گوڏا کوڙڻ تي مجبور ڪيو هو پر هاڻ ته قومپرستن کي ڀت سان لڳائي
حڪمرانن پنهنجا سمورا رستا صاف ڪري ڇڏيا آهن، مون کي ته وفاقي گهرو وزير جا اهي
لفظ بار بار ياد ايندا آهن، جيڪو هو پنهنجي پريس ڪانفرنسز ۾ بار بار ورجائيندو رهندو آهي ته آزادي لاءِ ڪشميري دهشتگرد ناهن، جيڪو ٻڌي تمام
سٺو به لڳندو آهي پر افسوس تڏهن ٿيندو آهي
جڏهن سنڌ جي وسيلن جي ڦرلٽ ۽ سازشن خلاف آواز اٿاريو ويندو آهي ته انهن کي
دهشتگرد ڪوٺيو ويندو آهي، جيڪو تمام گهڻو مذمت جوڳو آهي، ڇاڪاڻ ته عوام جي حقن
لاءِ جاکوڙيندڙ ڪڏهن به دهشتگرد ناهن ٿيندا پر اهي مسيحا هوندا آهن.
Thursday, 23 February 2017
Wednesday, 22 February 2017
ٽرمپ انتظاميه جون جاري ڪيل نيون هدايتون
صاحب
خان ڀٽي
آمريڪي
صدر ڊونلڊ ٽرمپ خلاف سڄي دنيا ۾ احتجاجن جو سلسلو هلندڙ آهي، هڪ طرف آمريڪي صدر
مختلف اڳواڻن سان رابطو ڪري رهيو آهي ته ٻي طرف وري ڪجهه ملڪن خلاف سخت جملا به
استعمال ڪري رهيو آهي، جن ۾ ايران ۽ اترڪوريا به شامل آهي، ڪجهه ڏينهن اڳ آمريڪي
صدر ڊونلڊ ٽرمپ چيو هو ته کيس پنهنجي ملڪ کي محفوظ بڻائڻ لاءِ جيڪي قدم کڻڻا پيا
اهي ضرور کڻندو، ان حوالي سان هن سرحدن کي محفوظ بڻائڻ لاءِ ميڪسيڪو سرحد وٽ ڀت
تعمير ڪرڻ جو به اعلان ڪيو هو ۽ ان جي تعمير جو خرچ ميڪسيڪو کان وٺڻ جو فيصلو ڪيو
هو پر ميڪسيڪو ڊونلڊ ٽرمپ کي ڀت جي اڏاوت لاءِ پيسا ڏيڻ کان انڪار ڪري ڇڏيو هو،
جنهن تي آمريڪي صدر ڪاوڙجي به پيو هو پر
ان باوجود هن همت نه هاري هئي ۽ ٽرمپ ميڪسيڪو کان ايندڙ سمورين شين تي ٽيڪس لڳائڻ
جو فيصلو ڪيو هو ۽ چيو هو ته ان ٽيڪس مان ئي هو ميڪسيڪو سرحد وٽ ڀت تعمير
ڪرائيندو، هن وقت به ڊونلڊ ٽرمپ آمريڪا ۾ ميڊيا کي تنقيد جو نشانو بڻائي رهيو آهي،
جڏهن
ڊونلڊ ٽرمپ صدارتي عهدي جو حلف
کنيو هو ته ان وقت هن ميڊيا بابت گٿا لفظ ڳالهايا هئا اهو سلسلو هو هن وقت جاري
رکندو پيو اچي، آمريڪي صدر ويجهڙ ۾ ٻيهر صحافين بابت غلط لفظ ڳالهايا هئا،جنهن تي
صحافين کيس تنقيد جو نشانو به بڻايو هو. بهرحال ڊونلڊ ٽرمپ ڪهڙن سببن جي ڪري
صحافين کان ڪاوڙيل آهي، ان بابت کيس وڌيڪ خبر هوندي، پر دونلڊ ٽرمپ صرف صحافين تي
نه پر هاڻ آمريڪا جي ججن تي به ڪاوڙيل نظر اچي رهيو آهي، جن ججن سندس تڪراري
اميگريشن پاليسي کي معطل ڪري ڇڏيو هو، ان بابت
به هن گهٽ وڌ ڳالهايو هو. جيڪڏهن ڏٺو وڃي ته هن وقت آمريڪا ۾ تڪراري
اميگريشن پاليسي تي تمام گهڻا احتجاج به ٿي رهيا آهن ۽ هن وقت تائين ڪنهن به آمريڪا جي شهر ۾ احتجاج
ڪندڙن تي ڪو به ادارن طرفان تشدد ناهي ڪيو ويو ۽ نه ئي وري انهن کي احتجاج کان
روڪڻ جي لاءِ طاقت جو استعمال ڪيو ويو آهي، جڏهن آمريڪي صدر حلف کڻي رهيو هو ته ان
وقت آمريڪي شهرين پر امن احتجاج ڪيو هو ۽ انهن خلاف سڪيورٽي ادارن ڪا به ڪارروائي
نه ڪئي هئي پر جيڪي ڀڃ ڊاهه ڪري رهيا هئا انهن کي حراست ۾ ورتو ويو هو، هن وقت به
جيڪي پر امن احتجاج ٿي رهيا آهن، انهن کي روڪڻ لاءِ ڊونلڊ ٽرمپ ڪي به حڪم جاري نه
ڪيا آهن ۽ نه ئي وري هن وقت تائين ڊونلڊ ٽرمپ طاقت جو استعمال ڪيو آهي، جهڙي ريت اسان جي ملڪ ۾ استعمال ڪيو ويندو
آهي،
هن وقت جيڪي به ماڻهو آمريڪا ۾ احتجاج ڪري رهيا
آهن، انهن جو صرف هڪ ئي مطالبو آهي ته تڪراري اميگريشن پاليسي ختم ڪئي وڃي،
جيتوڻيڪ ڊونلڊٽرمپ جي اميگريش کي آمريڪي ججن معطل ڪري ڇڏيو هو پر ان باوجود ڊونلڊ
ٽرمپ نظرثاني واري اميگريشن پاليسي آندي آهي، جنهن بابت سندس چوڻ آهي ته هو ان تي
هر حال ۾ عمل ڪرائيندو، هن نظرثاني اميگريشن ۾ اهي سمورا 7 ئي ملڪ شامل آهن جن تي
ڪجهه ڏينهن اڳ پابندي لڳائي وئي هئي ۽ هاڻ به انهن ست ئي ملڪن جي شهرين تي آمريڪا
۾ داخلا ٿيڻ تي پابندي لاڳو هوندي.آمريڪي صدر ڊونلڊ ٽرمپ انتظاميه کي نيون هدايتون
به جاري ڪري ڇڏيون آهن، آمريڪي صدر ڊونلڊ ٽرمپ جيڪي نيون هدايتون جاري ڪيون آهن،
انهن هدايت تحت جن غيرقانوني طور ترسيل ماڻهن ۽ پناهگيرن وٽ دستاويز نه هوندا ۽
انهن جو ڏوهي رڪارڊ به هوندو، انهن خلاف به ساڳيو ورتاءُ ڪيو ويندو، جڏهن ته گهٽ
عمر وارا نوجوان جن کي آمريڪا غيرقانوني طور آندو ويو، انهن کي آمريڪا ۾ رهڻ جي
اجازت ڏني ويندي،
آمريڪي
صدر جي غيرقانوني طور آندل نوجوانن کي نه ڪڍڻ واري کي ساراهيو پيو وڃي ۽ چيو پيو
وڃي ته اهڙي فيصلي سان هزارين نوجوانن کي فائدو ٿيندو، وائيٽ هائوس ترجمان شون
اسپائسر به پنهنجي جاري ڪيل بيان ۾ چيو آهي ته آمريڪي صدر کين نيون هدايتون جاري
ڪيون آهن ۽ هو نظرثاني واري اميگريشن پاليسي تي هر حال ۾ عملدرآمد ڪرائيندا. آمريڪي
صدر ڊونلڊ ٽرمپ جي تڪراري اميگريشن کي جن ججن معطل ڪيو هو انهن جي به سڪيورٽي
وڌائي وئي آهي، هن وقت آمريڪي صدر جهڙي ريت ميڊيا تي ڪاوڙ ڏيکاري رهيو آهي، جنهن
مان لڳي پيو ته هو پنهنجي پاليسي تي عمل ڪرائڻ لاءِ سمورا وسيلا ڪتب آڻيندو، پوءِ
ڀلي کيس تڪرار ڇو نه بڻڻو پئي، ڪجهه ڏينهن آمريڪي صدر قومي سلامتي بابت صلاحڪار تي
الزام به لڳايا هئا، جنهن کي عهدي تان هٽايو به ويو هو پر هاڻ قومي سلامتي بابت صلاحڪار جي نامزدگي جو به
اعلان ڪيو ويو آهي، پر ان باوجود آمريڪي پنهنجي بيانن ۾ هن وقت تائين تبديلي نه
آڻي سگهي ٿو، جنهن سبب آمريڪا ۾ هزارين ماڻهو پر امن احتجاج ڪري رهيا آهن، آمريڪي صدر ڊونلڊ ٽرمپ جن به
ملڪن تي پابندي لڳائي آهي، انهن تي هن وقت به هن پنهنجي نين هدايتن تحت پابندي
لڳائڻ جو فيصلو برقرار رکيو آهي، جيتوڻيڪ هن وقت آمريڪا صدرآمريڪا سميت سڄي دنيا ۾
تڪراري بڻجي چڪو آهي پر ان باوجود هو مسلمانن خلاف بيان ڏيڻ کان پاسو نه ڪري رهيو
آهي،
جڏهن اڳوڻو صدر بارڪ اوباما هوندو هو ته ان وقت
به آمريڪا ۾ ڪو خاص امن نه هوندو، جنهن سبب ڪڏهن معذورن جي سينٽرن تي حملا ٿيندا
هئا ته ڪڏهن وري پوليس اهلڪارن کي ماريو ويندو هو، هن وقت آمريڪا ۾ ته اهڙو ڪو وڏو
سانحو پيش نه آيو آهي پر آمريڪي صدر ڊونلڊ جي بيانن سان هزارين مسلمانن جي دل آزاري ٿي
آهي، بهرحال آمريڪي صدر ڊونلڊ ٽرمپ جي تڪراري اميگريشن پاليسي ڪينيڊين جي وزيراعظم
جسٽن ٽروڊو به مڪمل اعتماد جو اظهار ڪيو آهي، سندس چوڻ آهي ته هو آمريڪا مان بي
دخل ٿيندڙ پناهگيرن کي ڪينيڊا ۾ داخل ٿيڻ کان نه روڪيندا. بهرحال هن وقت آمريڪا ۾ پرڏيهين
۽ غيرقانوني طور ترسيل ماڻهن خلاف وٺ پڪڙ جو سلسلو تيز ڪيو ويوآهي، جنهن جا حڪم به
آمريڪي صدر ڊونلڊ ٽرمپ پنهنجي نين هدايتن ۾ جاري ڪيا آهن، هاڻ ڏسڻو اهو آهي ته
آمريڪي صدر ڊونلڊ ٽرمپ خلاف آمريڪا ۾ احتجاجن جي سلسلي ۾ ڪيتري شدت اچي ٿي يا وري
اهي احتجاج بنا ڪنهن نتيجي جي ختم ٿي ويندا، هڪ طرف آمريڪي صدر جي اميگريشن پاليسي
خلاف جيڪي احتجاج ٿي رهيا آهن، اهي به ختم ٿيڻ جو نالو نه وٺي رهيا ته ٻي طرف وري
گرفتارين سبب آمريڪا ۾ خوف واري لهر به
پکڙيل آهي، آمريڪا ۾ جيڪي اميگريشن پاليسي خلاف احتجاج ڪري رهيا آهن، انهن
۾ اڪثريت به انهن ماڻهن جي ئي آهي جيڪي اتان جا رهواسي نه آهن، جن کي اهو خدشو آهي
ته سندن به شهريت رد نه ڪئي وڃي، ڇاڪاڻ ته ڊونلڊ ٽرمپ ڪڏهن ڪڏهن صرف مذهب کي به
نشانو بڻائندو آهي، هاڻ ڏسڻو آهي ته ڊونلڊ ٽرمپ ڪهڙي ريت پنهنجي نين جاري ڪيل هدايتن
تي عمل ٿو ڪرائي ۽ سندس رستي آڏو ڪير ٿو اچو.
Tuesday, 21 February 2017
Monday, 20 February 2017
دهشتگردي بعد آدمشماري بابت پيدا ٿيل ڳڻتي
صاحب خان ڀٽي
سيوهڻ ۾ حضرت لعل شهباز قلندر جي درگاهه تي ٿيل
آپگهاتي حملي بعد سڄي ملڪ ۾ دهشتگردن خلاف
آپريشن تيز ڪيو ويو آهي، آپريشن صرف سنڌ نه پر پنجاب، خيبرپختونخواهه ۽ بلوچستان ۾
به ڪيو ويو آهي ۽ ڪيترن ئي دهشتگردن کي ماريو ويو آهي، جڏهن ته پوليس به ڪيترن ئي
شڪي ماڻهن کي گرفتار ڪري ورتو آهي، سنڌ ۾ ته قانون لاڳو ڪندڙ ادارن يونيورسٽين ۾
آپريشن ڪيو آهي، سيوهڻ سانحي بعد طورخم
سرحد کي به سيل ڪرڻ جو فيصلو ڪيو ويو هو،
جيڪو هن وقت تائين برقرار آهي، ايتري قدر جو سرحد وٽ دهشتگردن جي ٺڪاڻن تي بمباري
به ڪئي وئي آهي، جيتوڻيڪ لعل شهباز قلندر جي مبينا سهولتڪار جي ويڊو به جاري ڪئي
وئي آهي پر هن وقت تائين سندس نالي سان سڃاڻپ نه ٿي سگهي آهي، سيوهڻ ڌماڪي کانپوءِ
جهڙي ريت قانون لاڳو ڪندڙ حرڪت ۾ آيا آهن، شايد اهڙو آپريشن سيوهڻ سانحي کان اڳ نه
ڪيو ويو هو. هڪ طرف قلندر جي نگري ۾ بنياديون سهولتون نه آهن ته مٿان دهشتگردن
ڪهري ڪارروائي ڪري انسانيت جو ڪنڌ شرم وچان جهڪائي ڇڏيو آهي، سيوهڻ ڌماڪي کان پوءِ
آمريڪا ۽ گڏيل قومن سميت ٻيا ڪيترائي ملڪ مذمت به ڪري چڪا آهن،
جيڪڏهن ڏٺو وڃي ته قانون لاڳو ڪندڙ ادارا حرڪت ۾ اچي
دهشتگردن جون ننڊون ئي ڦٽائي ڇڏيون آهن ۽ ڪيترن ئي دهشتگردن کي ماريو به ويو آهي
پر هن وقت به سڄي ملڪ جي عوام ۾ خوف واري لهر پکڙيل آهي، ڇاڪاڻ ته وحشي صفت
دهشتگردن سيوهڻ ۾ ڌماڪي ۾ پنهنجي وحشيت جو چٽو مثال ڏئي چڪا آهن. ڇاڪاڻ ته انهن
دهشتگردن جي ڪهري ڪارروائي ۾ لڳ ڀڳ 90 ڄڻن شهادت جو جام پاتو، تحريڪ انصاف سربراهه
عمران خان به وفاقي حڪومت کان دهشتگردن خلاف ڪارروائي جو مطالبو ڪندو رهيو آهي پر
هن ڀيري تحريڪ انصاف سربراهه عمران خان پنجاب ۾ رينجرز کي اختيار ڏيڻ وارو مطالبو
ڪري رهيو آهي ۽ چئي رهيو آهي ته رينجرز کي به سنڌ جيان پنجاب ۾ ڪارروائي جو اختيار ڏنو وڃي، بهرحال هڪ
ٻه ڏينهن اڳ پنجاب ۾ ايپيڪس ڪاميٽي جو اجلاس ٿيو، جنهن دوران سڄي ملڪ ۾ آپريشن جو
دائرو وڌائڻ جو فيصلو ڪيو ويو ۽ پابندي مڙهيل تنظيمن جا معاشي ذريعا به بند ڪرڻ جو اعلان ڪيو ويو.بهرحال هاڻ ڏسڻو
اهو آهي ته وفاقي حڪومت ڪهڙي ريت پابندي مڙهيل تنظيمن خلاف پنجاب ۾ آپريشن ٿئي
ڪري، ڇاڪاڻ ته گذريل ڪيتري ئي عرصي کان پيپلزپارٽي ۽ ٻيون تنظيمون اهو مطالبو
ڪنديون رهيون آهن ته پنجاب ۾ به دهشتگردن خلاف بنا فرق جي آپريشن ڪيو وڃي پر انهن
جي بيانن ڏانهن ڪنهن به ڌيان ڏنو، هن وقت جڏهن سڄي ملڪ ۾ دهشتگردن کي نشانو بڻايو
پيو وڃي ته اتي پنجاب ۾ به دهشتگردن خلاف ڪارروائي جو فيصلو ڪرڻ سٺو فيصلو آهي،
جيڪڏهن پنجاب ۾
دهشتگردن جي محفوظ ٺڪاڻن کي نشانو بڻايو ويو ۽ سهولتڪارن جي ڳچي ۾ هٿ وڌو ويو ته
پوءِ شايد سڄي ملڪ ۾ امن امان جي صورتحال بحال ٿي ويندي، ڪجهه ساڃاهه وند چئي رهيا
آهن ته ڪرپشن ۽ دهشتگردي هڪ سڪي جا ٻه پاسا آهن. جتيوڻيڪ وڏو وزير سيد مراد علي
شاهه ۽ ٻيا سنڌ جا سياستدان دهشتگردن خلاف ڪارروائي لاءِ عزم ڏيکاري رهيا آهن پر
عملي طور ڪٿي به قدم کڏندي ڏسڻ ۾ نه اچي رهيو
آهي ۽ نه پوليس ۽ ٻين ادارن هن وقت تائين ڪراچي، حيدرآباد، سکر ۽ ٻين شهرن
۾ افغان شهرين خلاف ڪريڪ ڊائون شروع ڪيو آهي ۽ نه ئي وري ڪنهن غيرملڪي کي غيرقانون
طور ترسڻ جي الزام هيٺ گرفتار ڪيو ويو آهي، پر هڪڙو ڪم تمام تيزي سان ٿي رهيو آهي،
سنڌ جي يونيورسٽين ۾ سرچ آپريشن به ڪيو پيو وڃي ۽ سنڌ جي مختلف شهرن مان شڪي ماڻهن
کي به حراست ۾ ورتو ويوآ هي، جنهن ۾ قومي ڪارڪنن به شامل آهن، لڳي ائين رهيو آهي
ته سيوهڻ ڌماڪو مبينا افغان دهشتگرد نه پر سنڌين ڪيو آهي،
بهرحال جهڙي ريت سنڌ جي يونيورسٽين ۾ سرچ آپريشن ڪيو پيو
وڃي، اهڙي ريت جيڪڏهن پنجاب ۾ ڪيو وڃي ها ته تمام بهتر هجي ها، ڇاڪاڻ ته ڪيتري ئي
عرصي کان نه ته پنجاب ۾ انتهاپسندن خلاف ڪا ڪارروائي ڪئي وئي آهي ۽ نه ئي وري ڪا خاص ڪارروائي پرڏيهين خلاف ڪئي
پئي وڃي، جنهن جو مطالبو سياسي جماعتون ڪنديون رهيون آهن. هن وقت پنجاب ۾ هڪ وڏي
آپريشن جي ضرورت آهي، ڇاڪاڻ ته جيڪڏهن پنجاب ۾ رينجرز کي پوليس وارا اختيار ڏئي
دهشتگردن خلاف ڪريڪ ڊائون ڪيو وڃي ۽ مذهبي دهشتگردي پکڙيندڙن خلاف اثرائتي
ڪارروائي ڪئي و ڃي ته شايد هن ملڪ ۾ ڪنهن به دهشتگرد تنظيم کي ڪاررواين جي جرئت نه
ٿي ها، ڇاڪاڻ ته جيڪي به ڪجهه عرصي کان اڳ افغان طالبان ٻڌندا هئاسين بعد ۾ پنجاب
طالبان به بابت به ٻڌو، بهرحال سڄي ملڪ ۾ دهشتگردن کي ڳولي ڳولي ماريو وڃي ۽ انهن
جي سهولتڪارن کي به حراست ۾ ورتو وڃي پر ان سان گڏ دهشتگردي ۾ رڪاوٽ بڻجندڙن کي به
عبرت جو نشان بڻايو وڃي ته جئين امن امان جي صورتحال قائم ٿي سگهي،
جڏهن کان ملڪ ۾ آدمشماري جو اعلان ٿيو آهي تڏهن کان دهشتگرد
تمام گهڻو سرگرم ٿي ويا آهن، مارچ ۾ اڃا ڪجهه ڏينهن باقي هئا جو دهشتگردن سيوهڻ کي
رت سان وهنجاري ڇڏيو، ايتري قدر جو لاهور ۾ ڌماڪو ڪري ڪيترن ئي ماڻهن کي
ماريو ويو، پر جهڙي ريت موت جو ننگو ناچ
سيوهڻ ۾ٿيو شايد ملڪ جي ڪنهن به ڪنڊ ڪڙڇ ۾ ٿيو هو. سيوهڻ سانحي بعد ائين محسوس ٿي
رهيو آهي ته دهشتگرد هڪ منظم سازش تحت صوفين جي سرزمين کي نشانو بڻايو رهيا آهن، ڪڏهن اهي دهشتگرد پوليو ٽيمن کي
نشانو بڻائيندا آهن ته ڪڏهن وري اهي ئي دهشتگرد صوفي اوليائن تي حملا ڪندا آهن، ڪجهه
عرصو ڪراچي ۾ حضرت عبدالله شاهه غازي جي
مزار جي اڱڻ ۾ ڌماڪو ڪيو ويو هو ۽ ان کان پوءِ سنڌ جي ٻين شهرن ۾ دهشتگردن
پنهنجيون ڪهريون ڪارروايون ڪيون پر افسوس
جو انهن حملن ۾ ملوث دهشتگردن خلاف ڪا خاص ڪارروائي نه ڪئي وئي، پر جڏهن شڪارپور ۾
عيد جي نماز دوران رهواسين همت ڪري هڪ آپگهاتي بمبار کي سوگهو ڪيو هو ته ان وقت به
انهن دهشتگردن جي سهولتڪارن خلاف ڪا خاص ڪارروائي نه ڪئي وئي ۽ نه ان دهشتگرد وٽان
مليل وڌيڪ ڄاڻ ميڊيا سان شيئر ڪئي وئي هئي.
سيوهڻ سانحي بعد هڪ طرف سڄي سنڌ سوڳ ۾ ورتل آهي ته ٻي طرف
سنڌ جا ساڃاهه وند سنڌ اندر دهشتگردن جي موجودگي تي ڳڻتي ۾ آهن ته آخر جن افغان
پناهگيرن کي آندو ويو هو انهن کي واپس ڇو نه پيو اماڻيو وڃي، ٻين ملڪن ۾ جڏهن ڪا
دهشتگردي ٿيندي آهي ته غيرقانوني طور ترسيل ماڻهن خلاف آپريشن شروع ڪيو ويندو آهي
پر افسوس جو هن وقت تائين نه ته هتان جي سڪيورٽي ادارن غير ملڪين کي ڪڍڻ جو بيان
ڏنو آهي ۽ نه ئي انهن خلاف ڪريڪ ڊائون شروع ڪيو ويو آهي، جيتوڻيڪ افغانستان جي
آرمي چيف جنرل قدم خان پاڪستان سان سهڪار ڪرڻ بابت بيان ڏنو آهي پر ان جو مطلب اهو
ناهي ته ملڪ جو امن امان داءُ تي لڳايو وڃي، هن وقت افغان پناهگيرن بابت عسڪري
قيادت ۽ سياسي قيادت کي فيصلو ڪرڻو پوندو، دهشتگردن ان وقت ملڪ اندر ڪهري
ڪارروايون شروع ڪيون آهن جڏهن آدمشماري شروع ٿيڻ ۾ ڪجهه وقت ئي بچيو هو، جيڪڏهن
آدمشماري ٿي ته اهو ضرور پتو پئجي ويندو ته هن ملڪ ۾ خاص طور تي سنڌ ۾ ڪهڙن غير
ملڪين جا گهر آهن ۽ ڪهڙي گهر ۾ ڪير رهي ٿو پر اهو عمل ان وقت صاف شفاف بڻجي سگهي
ٿو، جڏهن پاڪ فوج واندي هجي ها، پر هن وقت دهشتگردن قهري ڪارروايون ڪري فوج جو سڄو
ڌيان آپريشن طرف لڳائي ڇڏيو آهي، سنڌ ۾ به جيڪا آدمشماري بابت جاڳرتا مهم هلي رهي
هئي اها به سيوهڻ بم ڌماڪي بعد رڪجي وئي آهي، هاڻ سنڌ حڪومت کي گهرجي ته سنڌ ۾
رهندڙ غير ملڪين خلاف همت وارو فيصلو ڪري ۽ وفاق جو انتظار ڪرڻ بدران جيڪي به
غيرملڪي اسان جي ڌرتي تي ترسيل آهن ۽ سنڌ جي لاءِ نقصانڪار آهن انهن کي ڪيمپئن ۾
رهائن ته جئين صوفين جي سرزمين ۾ امن ۽ شانتي قائم ٿي سگهي.
Sunday, 19 February 2017
Subscribe to:
Posts (Atom)