خدائي خدمتگار۽ ڪالا باغ ڊيم خلاف سنڌين جي جدوجهد

صاحب خان ڀٽي

آخرڪار خدائي خدمتگارن ڪالا باغ ڊيم کي ٺاهڻ لاءِ وڃي عدالتي در کڙڪايو ۽ عدالت به ڪالا باغ ڊيم دير ٺهڻ تي نوٽيس جاري ڪري ڇڏيا پر افسوس جو  اڄ به سنڌ مان ووٽ وٺي ڪامياب ٿيندڙ پارٽي خاموش  ۽ مفاهمت وارو دڳ اختيار ڪري ويٺي آهي. جيڪڏهن هن وقت به سنجيدگي وارو مظاهرو نه ڪيو ويو ته خدائي خدمتگار پنهنجي مقصدن ۾ ڪامياب ٿي ويندا، هڪ طرف  ملڪ ۾ جوڊيشل مارشل لا جون ڳالهيون ٿي رهيون آهن ته ٻئي طرف وري خدائي خدمتگار به پنهنجا مطالبا مڃرائڻ لاءِ تمام گهڻو سرگرم ٿي ويا آهن، هونئن ته اسان کي اڃا تائين اها خبر ئي نه آهي ته ڪالا باغ ڊيم جي اڏاوت وارو ڪم رڪيل آهي يا وري جاري ۽ ساري آهي، ڇاڪاڻ ته خدائي خدمتگارن ڪالا باغ ڊيم ٺاهڻ لاءِ ڪڏهن ايوان ۾ هنگامو ڪيو ته ڪڏهن وري آمريتي  دور ۾ ڏاڍ  وارو اختيار ڪيو ويو ته جيئن ڊيم تي اختلاف رکندڙ قومن  جي آواز کي دٻايو وڃي پر افسوس جو اهي خدائي خدمتگار ناڪام ويا پر هاڻ وري انهن خدائي خدمتگارن پنهنجو رويو تبديل ڪيو آهي، ڇاڪاڻ ته هو ڏسي رهيا آهن ته عدليا خلاف ڪير  ڪو نه ڳالهائيندو ۽ جيڪڏهن ڪو احتجاج به ڪندو  يا لکندو ته  اهو توهين عدالت جي زمري ۾ ايندو، جنهن سبب هنن ڪالا باغ ڊيم خلاف عدالت سان رابطو ڪيو ۽  پهرين وک سندن ڪامياب وئي ۽ اهي نوٽيس جاري ڪرائڻ ۾ ڪامياب ويا پر  شايد انهن خدائي خدمتگارن کي اها خبر نه آهي ته سنڌ دشمن منصوبي کي ڪنهن به ريت  سنڌي قوم قبول نه ڪندي  ۽ نه ئي ڪڏهن اهڙي ڪڌي عمل جو حصو  بڻجندي. سنڌي قوم  ملڪ جي ٺهڻ کانپوءِ رڳو پنهنجي بقا جي جنگ وڙهي رهي آهي، ڪڏهن سنڌ جي وسيلن تي ٿيل قوتن  سان مهاڏو اٽڪايو آهي ته ڪڏهن وري سنڌ جي پاڻي جي حصي لاءِ جدوجهد ڪئي آهي.

بهرحال ان کان اڳ به خدائي خدمتگار ڪالا باغ ٺاهڻ لاءِ مختلف حربا استعمال ڪيا آهن، ڪڏهن فلمون ٺاهي ڪالا باغ ڊيم جي مخالفت ڪندڙن کي غدار قرار ڏيڻ جي ڪوشش ڪئي وئي ته ڪڏهن وزيرن  پاران اعليٰ ايوان ۾ اهڙا بيان ڏنا ويا  جو انسانيت جو ڪنڌ شرم وچان جهڪي  ٿو وڃي، ڪجهه عرصو اڳ هڪ وزير ايوان ۾ چيو هو ته جيڪڏهن هڪ ٻه ماڻهو مارجڻ سان ڪالا باغ ڊيم ٺهي ٿو ته پوءِ ڀلي ٺاهيو وڃي، ان سان  ڪو به فرق نٿو پوي. افسوس جو ان وزير کي  ايترو به شرم نه آيو ته  هُن انسانيت جي قتل عام کي برو نه سمجهيو پر پنجاب کي خوشحال ڪرڻ لاءِ ڊيم ٺاهڻ کي اوليت ڏني، افسوس جو اهڙي بيان تي ڪنهن به پارٽي پاران ڪوخاص رد عمل نظر نه آيو هو ۽ نه سنڌ جي حڪمران جماعت پاران  اهڙي بيان تي ڪو سخت رد عمل ڏنو ويو هو.  بهرحال ڪيترائي ڀيرا پاڻي  جي ورهاڱي ۽ نوان ڊيم ٺاهڻ بابت گڏجاڻيون ۽ اجلاس ڪوٺايا ويا  آهن پر انهن اجلاسن ۾ هن وقت تائين اهو اتفاق نه ٿي سگهيو آهي ته آخر ڪڏهن صوبن کي گهرُج موجب پاڻي وقت تي ملي سگهندو،

اهو مسئلو مختلف وقتن تي ڪُر کڻندو رهيو آهي، ان جو وڏو سبب اهو ئي آهي ته سنڌ کي پنهنجي حصي جو پاڻي نه ملي رهيو آهي، جيڪڏهن سنڌ کي پنهنجي حصي جو پاڻي ملي ها ته اڄ سنڌي سراپا احتجاج نه بڻيل آهي، پاڪستان ٺهڻ کان هن وقت تائين سنڌ ۾ نه ته ڪو وڏو ڊيم ٺاهيو ويو آهي ۽ نه ئي وري درياهن جا ڪپر مضبوط ڪيا ويا آهن، اڳوڻو وزيراعظم نوازشريف جڏهن ٺٽي آيو هو ته هن سمنڊ جي ڪناري پچنگ ڪرائڻ، مطلب پٿر رکائي بند ڏيارڻ جو واعدو ڪيو هو، جنهن تي به هن وقت تائين عمل نه ٿي سگهيو آهي، نه سنڌ حڪومت تباهه ٿيندڙ ڊيلٽا کي بچائڻ لاءِ ڪي قدم کڻي رهي آهي نه ئي وفاق کي سنڌ تي ڪو رحم اچي رهيو آهي، هونئن ته وفاق سنڌ جي سمورن وسيلن تي قابض آهي پر سمنڊ سنڌ جي زمين ڳڙڪائي رهيو آهي، سنڌ ۾ فصل تباهه ٿي رهيا آهن، زميون بنجر بڻجي رهيون آهن ۽ ماڻهو بک بدحالي کي منهن ڏئي رهيا آهن، ان جي وفاق کي ڪا به ڳڻتي نه آهي. رڳو زور ڏنو پيو وڃي ته ڪهڙي به ريت سنڌ دشمن منصوبي ڪالا باغ ڊيم کي ٺاهيو وڃي ۽ ان جي هڪ ڪڙي لاهور هاءِ ڪورٽ به آهي.

 ڪجهه ڏينهن اڳ لاهور هاءِ ڪورٽ ۾ ڪالا باغ ڊيم دير ٺهڻ تي توهين عدالت جي درخواست تي ٻڌڻي دوران وزير اعظم شاهد خاقان عباسي کي ٻيهر نوٽيس جاري ڪيو ويو، جنهن ۾ کائنس  17 مئي تائين جواب طلب ڪيو ويو آهي. ان درخواست ۾ خدائي خدمتگار مطلب ته درخواستگذار موقف اختيار ڪيو آهي ته عدالت گڏيل مفادن واري ڪونسل کي ڪالا باغ ڊيم ٺاهڻ جي هدايت ڪئي هئي پر وزير اعظم گڏيل مفادن واري ڪونسل جي سربراهه جي حيثيت سان عملدرآمد نه ڪيو. عدالت کان اپيل آهي ته وزير اعظم شاهد خاقان عباسي خلاف توهين عدالت جي ڪارروائي ڪئي وڃي. هي پهريون ڀيرو نه ٿيو آهي، ڪالا باغ ڊيم نه ٺهڻ تي مذهبي فارمولو به استعمال ڪيو ويو هو، جيئن ڪجهه صديون اڳ هڪ عرب مذهب جي نالي تي سنڌين جي وسيلن تي قبضو ڪيو هو، اهو ئي فارمولو هاڻ به استعمال ڪرڻ جي ڪوشش ڪئي وئي. بهرحال عدالت جي نوٽيس کانپوءِ وزيراعظم شاهد خاقان عباسي به ڊيم جي اڏاوت لاءِ ٿورو سرگرم ٿي ويو آهي،

ڪجهه ڏينهن اڳ وزيراعظم شاهد خاقان عباسي جي صدارت هيٺ قومي مفادن واري ڪائونسل جو اجلاس ٿيو هو، جنهن دوران چئن ئي صوبن جي وڏن وزيرن سميت صوبائي ۽ وفاقي سيڪريٽريز شرڪت ڪئي هئي. اجلاس ۾ پلاننگ ڪميشن جي چيئرمين سرتاج عزيز اجلاس کي نيشنل واٽر پاليسي جي ڊرافٽ تي تفصيلي بريفنگ ڏيندي چيو هو ته ملڪ ۾ پاڻي جي دستيابي تيزي سان گهٽ ٿي رهي آهي، جڏهن ته فوري طور تي پاڻي ذخيرن ۾ واڌ اڻٽر آهي. سرتاج عزيز اجلاس ۾ چيو هو ته پاڪستان ۾ آبي وسيلن ۾ تيزي سان گهٽتائي ٿي رهي آهي ۽ پائيدار ترقي جو هدف حاصل ڪرڻ لاءِ آبي وسيلن جو انتظام ضروري آهي. هاڻ ان مان صاف ظاهر ٿي رهيو آهي ته وزيراعظم عدالتي نوٽيس کي ڪيترو سنجيدگي سان ورتو آهي ۽ اها خدائي خدمتگارن جي  هڪ وڏي ڪاميابي آهي،

جيڪڏهن اڄ به سنڌ جي ساڃاهه وندن اهڙي سازش خلاف  آواز نه اٿاريو ته سنڌ دشمن جيڪي پاڻ کي خدائي خدمتگار سڏائي ڪالا باغ ڊيم ٺهرائڻ لاءِجيڪي حربا استعمال ڪري رهيا آهن، اهي پنهنجي ناپاڪ مقصدن ۾ ڪامياب ٿي ويندا ، جنهن لاءِ ضروري آهي ته هاڻ پاڻي واري مسئلي تي سنڌ حڪومت کي وفاق تي اعتبار ڪرڻ بدران گڏيل قومن سان سڌي ريت رابطو ڪرڻو پوندو، ڇاڪاڻ ته ملڪ جي ٺهڻ کانپوءِ وفاق جو رويو سنڌ سان سٺو نه رهيو آهي، نه ئي وفاق ڪڏهن سنڌين کي هر اداري ۾ شامل ڪري رهيو آهي، سڀ کان وڏو مثال اسان نيوي کان ويندي  پوليس کاتي مان به لڳائي سگهون ٿا ته سنڌين کي ڪيتري نمائندگي ڏني وئي آهي ۽ ڪيترا سنڌي آفيسر ڪيترن عهدن تي آهن. اسان جي اليڪٽرانڪ ميڊيا ۽ پرنٽ ميڊيا جا نمائندا ته اڄ تائين ڪالا باغ ڊيم جي موجوده حالت جون تصويرون به جاري نه ڪري سگهيا آهن ته آخر ڪالا باغ ڊيم ٺهي به ويو آهي يا ان تي ڪم هلي رهيو آهي يا وري ان تي ڪم رڪيل آهي. اسان کي ته اها به خبر نه آهي ته ڪالا باغ ڊيم جو ڪم ڪيترو مڪمل ٿي چڪوآهي، باقي رهي ڳالهه پيپلزپرٽي جي ته اُها رڳو اهو بيان ڏيڻ ۾ پوري آهي ته ڪالا باغ ڊيم مئل گهوڙو آهي، پر پيپلزپارٽي کي اها خبر نه آهي ته خدائي خدمتگار مئل گهوڙي کي زندهه ڪرڻ ۾ ماهر آهن، هڪ ته سنڌ کي حصي جو پاڻي نه پيو ڏنو وڃي ته مٿان وري ڪالا باغ ڊيم ٺاهي سنڌ کي بنجر بڻائڻ جي وڏي سازشي رٿا بندي ڪئي وئي آهي. ڊائون اسٽريم ۾ پاڻي نه هئڻ سبب سمنڊ ۾ پاڻي بدران واري اڏامي رهي آهي، بدين ضلعو به پاڻي نه هئڻ سبب تباهه ٿي رهيو آهي پر وفاق ۽ خدائي خدمتگارن جي سُئي هڪ هنڌ رڪيل آهي ته ڪالا باغ ٺاهڻو آهي.  

sahibalisindhi@yahoo.com