پنهنجي حڪومت، پنهنجو احتساب

صاحب خان ڀٽي

تاريخ ۾ پهريون ڀيرو ٿيو  آهي جو ملڪ اندر حڪمران پنهنجو احتساب ڪرڻ جي دعويٰ ڪري رهيا آهن ۽ اهڙيون تصويرون به جاري ڪيون پيو وڃن جنهن محسوس ٿي سگهي ٿو ته  حڪمران احتساب واري عمل ۾ ڪا به سوديبازي نه ڪري رهيا آهن. سڌ سماءَ واري مملڪتي وزير مريم اورنگزيب چئي رهي آهي ته وزيراعظم نوازشريف ٽن نسلن جو حساب ڏنو آهي ته تحريڪ انصاف جو سربراهه عمران خان چئي رهيو آهي ته وزيراعظم نوازشريف پنهنجا اثاثا لڪائي رهيو آهي، مطلب ته ٻئي ڌريون هڪ ٻئي خلاف بيان بازي ۾ مصروف آهن، هي ڪو پهريون ڀيرو نه ٿيو آهي جو وزيراعظم نوازشريف کان استعيفيٰ جو مطالبو ڪيو ويو هجي ان کان اڳ به جماعت اسلامي، تحريڪ انصاف، پيپلزپارٽي ۽ ٻيون کوڙ ساريون تنظيمون وزيراعظم کان استعيفيٰ جو مطالبو ڪري چڪيون آهن، مسلم ليگ نواز چئي رهي آهي ته ايندڙ چونڊن ۾ ووٽ ڪارڪردگي جي بنياد تي ملندو پر حقيقت ۾ هن ملڪ اندر ڪڏهن به صاف شفاف چونڊون ٿيون ئي نه آهن، جيڪڏهن صاف شفاف چونڊون ٿيون هجن ها ته مختلف پارٽيون هڪ ٻئي تي ڌانڌلي جا انتظام نه لڳائن ها ۽ نه ئي وري بيلٽ باڪس ڀريل مليل آهن، ماضي ۾ جيڪي چونڊيون ٿيون ته ان وقت به ڪجهه اهڙيون ويڊيو منظر عام تي آيون جو ماڻهو ڏسي حيران ٿي ويا هئا ۽ اليڪشن ڪميشن طرفان ڪجهه هنڌن تي ٻيهر چونڊون به ڪرايون ويون هيون،

ڪجهه هنڌن تان اليڪشن ڪميشن کي شڪايتون مليون هيون ته ڪجهه هنڌن تان اعتراض واريا ويا هئا. بهرحال چونڊن ۾ ڌانڌليون ته ٿينديون  آهن پر هن ملڪ ۾ هن ڀيري پاناما ليڪس واري معاملي هڪ نئون اختيار ڪري ورتو آهي ۽ تاريخ ۾ پهريون هن ملڪ اندر ٻه ڀيرا جمهوري نظم مڪمل ٿيڻ طرف وڃي رهيو آهي ۽ ان جو ڪريڊٽ سياسي پارٽين ڏانهن ئي وڃي ٿو پر ان جمهوريت جو هن ملڪ جي عوام کي ڪو به فائدو نه پهچي سگهيو آهي، ان جو سڀ کان سبب اهو آهي ته سياسي پارٽين کي اڃا به کٽڪو آهي ته متان وري ڪو آمر اچي سندن حڪومت جو تختو اونڌو نه ڪري هجي، ان حوالي سان مختلف پارٽين طرفان احتياط کان به ڪم ورتو پيو وڃي، جنهن سبب ملڪ  اندر هن وقت تائين جمهوري نظام برقرار آهي پر نوازسرڪار طرفان اهڙا قدم کنيا ويا آهن جو انهن کي برداشت ڪرڻ انتهائي مشڪل هو پر هن وقت تائين نوازسرڪار جي حڪومت ان ڪري بچي پئي آهي جو پيپلزپارٽي ڪجهه عرصو اڳ چيو هو ته هو  نواز ليگ سرڪار خلاف نه آهن ۽ نه ئي ڪو اهڙو قدم کنيو ويندو جنهن سان هن ملڪ ۾ جمهوريت کي نقصان پهچي پر هاڻ پيپلزپارٽي به پنهنجو موقف تبديل ڪري ڇڏيو آهي ۽ چيو پيو وڃي ته هاڻ  پيپزپارٽي نوازسرڪار جو ساٿ نه ڏيندي، ايتري قدر جو پاناماليڪس معاملي تي وزيراعظم نوازشريف کان به استعيفيٰ جو مطالبو ڪيو ويو هو.

بهرحال هن وقت ملڪ اندر سڀ کان اشو صرف پاناما هلي رهيو آهي، ان حوالي سان جي آءِ ٽي طرفان جاچ جو سلسلو به هلي رهيو ۽ سپريم ڪورٽ پاران ڏنل سٺ ڏينهن جي رپورٽ مڪمل ڪري جمع به ڪرائڻي آهي ڇاڪاڻ ته سپريم ڪورٽ  ايف آءِ اي جي واجد ضياءَ جي صدارت هيٺ جوڙيل جاچ ٽيم کي وڌيڪ وقت ڏيڻ کان انڪار ڪيو ويو آهي ۽ عدالت طرفان چيو ويو آهي ته انهن ڏينهن ۾ ئي جاچ رپورٽ مڪمل ڪري پيش ڪئي وڃي، هونءَ ته پندرنهن ڏينهن واري رپورٽ سپريم ڪورٽ ۾ جمع ڪرائي وئي آهي پر هن وقت تائين جاچ مڪمل نه ٿي سگهي  آهي، وزيراعظم جي وڏي پٽ کي به جي آءِ ٽي آڏو پيش ٿيڻو پيو هو ۽ ننڍي پٽ حسن نواز به پاناما جي آءِ ٽي آڏو حاضري ڀري هئي، هاڻ ته نوازسرڪار طرفان وڏي فخر سان اها دعويٰ ڪئي  پئي وڃي ته ملڪ اندر رڪارڊ ترقياتي ڪم ڪرايا ويا آهن پر ان باوجود عوام پريشانين کي منهن ڏئي رهيو آهي جيڪو حڪومت جي ڪارڪردگي تي سواليه نشان آهي.

جڏهن سپريم ڪورٽ پاران پاناما ليڪسجو نوٽيس ورتو ويو هو ته ان وقت جماعت اسلامي جي امير سراج الحق چيو هو ته احتساب سمورن لاءِ هجڻ گهرجي ۽ وزيراعظم نوازشريف کي استعيفيٰ ڏيڻ گهرجي ڇاڪاڻ ته جيستاپاناما جي جاچ هلي رهي آهي تيستائين ڪنهن ٻي کي وزيراعظم بڻايو وڃي ڇاڪاڻ ته جنهن پارٽي جو سربراهه وزيراعظم هجي ته  ان خلاف ئي جاچ هلي رهي هجي ته ان وقت ڪڏهن به ملڪ اندر  صاف شفاف جاچ نه ٿي سگهندي.پر چوندا آهن ته ڏاڍي جي مٿي کي ٻه مٿي، سو وزيراعظم نوازشريف اپوزيشن جي اهڙي مطالبو کي منظور نه ڪيو ۽ نه ئي وري تحريڪ انصاف پارٽي خلاف بيان بازي جو سلسلو ختم ڪيو ويو آهي. هن وقت ملڪ اندر حالتون تمام گهڻو تبديل ٿي رهيون آهن ان جو سڀ کان وڏو ثبوت اڃا ٻيو ڪهڙو ملي سگهي ٿو جڏهن ملڪ اندر ئي حڪمرانن جي اولاد جي آءِ ٽي آڏو پيش ٿيڻو پيو، هونءَ ته ماضي ۾ پيپلزپارٽي جي وزيراعظم خلاف به جاچ  ڪري هٽايو ويو هو پر وزيراعظم نوازشريف استعيفيٰ ڏيڻ جو ڪو به ارادو نه آهي. جماععت اسلامي جي امير سراج الحق چيو هو ته وزيراعظم نوازشريف کي استعيفيٰ ڏيڻ گهرجي پر افسوس جو حڪمرانن اهڙيون حالتن باوجود ڪو به قدم عوامي مفاد وٽان نه کڻي رهي آهي، جنهن سبب هڪ ڀيرو ٻيهر ملڪ اندر ڇڪتاڻ واي صورتحال پيدا ٿيندي پئي وڃي. جيڪڏهن ڪنهن به ماڻهو کان پڇيو وڃي ته ڇا احتساب ٿيندو ته ان جا ڪيترائي جواب ملي رهيا آهن  پر هن قت تائين حڪمران ڌر طرفان ڪو به خاص رد عمل ظاهر نه ڪيو ويو آهي،

هڪ طرف ملڪ اندر بجلي جي لوڊشيڊنگ ته ٻيو وري مهانگائي عوامم جي چيلهه چٻي ڪري ڇڏي آهي. پاڻي ۽ بجلي واري وفاقي وزير خواجا آصف چيو هو ته ارڙهين ترميم کان پوءِ ملڪ اندر صوبا پنهنجا توانائي وارا منصوبا  شروع ڪري سگهن ٿا پر هن وقت تائين هڪ ميگاواٽ بجلي پيدا نه ڪئي وئي آهي، جيڪڏهن واقعي صوبن کي توانائي جا منصوبا شروع ڪرڻ جي اجازت آهي ته پوءِ آخر ڇاجي ڪري هن وقت تائين ڪنهن به صوبي توانائي پيدا ڪرڻ لاءِ ڪو به بندوبست نه ڪيو آهي. هاڻ ڏسڻو اهو آهي ته آخر نوازسرڪار معصومن جون تصويرون جاري ڪري عوام جون همدرديون کٽڻ ۾ ڪامياب ٿيندي يا وري ان پڇا ڳاڇا کي اڃا وڌيڪ ڳنڀير بڻايو ويندو، ڇاڪاڻ ته جنهن ڏينهن کان پاناما جي جاچ شرروع ٿي  آهي تنهن ڏينهن کان ملڪ اندر  هر هڪ ماڻهو پريشاني جو شڪار ٿي ويوآهي  پر ان باوجود حڪمران صرف پنهنجا مسئلا حل ڪرڻ ۾ مصروف نظر اچي رهيا اهن جيڪڏهن پاناما جو مسئلو حل به ٿي وڃي ٿو  پر ان باوجود نواز سرڪار کي ڊان ليڪس ۽ ۽ ٻين مسئلن  کي منهن ڏيڻو پوندو. ڪجهه ماڻهو ته ان احتساب کي قبول به نه ڪري رهيا آهن ڇاڪاڻ ته هي احتساب  ڪڏهن به صاف شفاف نه ٿيندو.

هونءَ به هن ملڪ اندر گذريل ڪيتري ئي عرصي کان اهو ٻڌندا پيا اچون ته ملڪ ترقي ڪري رهيو  آهي پر ان باوجود  ماڻهو پنهنجي ٻچن جي روزگار خاطر آپگهات ڪري رهيا آهن ۽ ڪجههه ته پنهنجا ٻچا به وڪڻي رهيا آهن، مطلب ته هر طرف مهانگائي  عروج ته آهي، سياسي جماعتون به صرف پاناما ليڪس واري معاملي تي متحد آهن پر بجلي جي واڌو بلن ۽ گيس جي بندش واري معاملي تي  ڪو آواز نه اٿاريو ويو آهي ۽ نه ئي وري انهن جا جائز مسئلا حل ڪرڻ لاءِ  ڪي ڌرڻا هنيا ويا  آهن. هاڻ ڏسڻو اهو آهي ته حڪمران ڪهڙي ريت پاناما واري جاچ کي صاف شفاف بڻائين ٿا، ڪجهه ماڻهن جو خيال  آهي ته جي آءِ ٽي  ڪڏهن به صاف شفاف نموني جاچ نه ڪري سگهندي ڇاڪاڻ ته وقت به ٿورو آهي ۽ ان شخص جي اولاد خلاف جاچ ٿي رهي آهي جيڪو هن وقت وزيراعظم جي عهدي تي آهي.

sahibalisindhi@gmail.com