سنڌ جو يگانو ليکڪ علي بابا 76 ورهين جي ڄمار ۾ ڪراچي ۾ لاڏاڻو ڪري ويو،

سنڌ جو يگانو ليکڪ علي بابا 76 ورهين جي ڄمار ۾ ڪراچي ۾ لاڏاڻو ڪري ويو، سنڌي ادبي سنگت سندس لاڏاڻي تي 3 ڏينهن سوڳ جو اعلان ڪيو آهي سنڌ جو يگانو ليکڪ علي بابا 76 ورهين جي ڄمار ۾ ڪراچي ۾ لاڏاڻو ڪري ويو، سنڌي ادبي سنگت سندس لاڏاڻي تي 3 ڏينهن سوڳ جو اعلان ڪيو آهي. 1940ع ڌاري ڪوٽڙي ۾ محمد يوسف بلوچ جي گهر ۾ جنم وٺندڙ علي محمد رند اڳتي هلي سنڌي ادب ۾ علي بابا جي نالي سان شهرت ماڻي. علي بابا ڪوٽڙي جي نانگا لائن ميونسپل پرائمري اسڪول مان  شروعاتي تعليم حاصل ڪرڻ بعد شير دل خان ميونسپل هاءِ اسڪول ڪوٽڙي ۾ به پڙهيو پر هڪ شاگرد سان تڪرار ۽ مهتمم پاران ڪلاس مان ڪڍي ڇڏڻ سبب هو ميٽرڪ پاس نه ڪري سگهيو.  علي بابا پهرين ريلوي ۾ ڪلارڪ مقرر ٿيو، سال کانپوءِ ٽيڪسٽائيل مل ۾ اسسٽنٽ مئنيجر طور 4 سال ڪم ڪيائين پر پوءِ نوڪري ڇڏي1965ع کان لکڻ شروع ڪيو.  علي بابا نه رڳو ڪهاڻيون ۽ ناول پر بهترين ريڊيو ۽ ٽي وي ڊراما به لکيا، سندس ناٽڪ ”دنگيءَ منجهه درياهه“ 1981ع ۾ جرمنيءَ ۾ ميونخ ناٽڪ ميلي ۾ ايوارڊ ماڻيو. سندس ڪتابن ۾ آيل ڙِي اولاڻا، ڌرتي ڌڪاڻا، سنڌباد،  لهندڙ سج جي لام، رُڃ سڄو ئي رت ڦڙا، منهنجون ڪهاڻيون، مسافر ۽ ٻيا ڪتاب شامل آهن، سندس ناول “موهن جو دڙو” کي سنڌي ادب جو شاهڪار ناول قرار ڏنو وڃي ٿو. علي بابا نثر سان گڏ شاعري ۾ به طبع آزمائي ڪئي.  جيجي زرينا جي آواز ۾ سندس ڪلام “اسين ماڻهو لاڙ جا” گهڻي مقبوليت ماڻي.  علي بابا جي لکڻين ۾ سنڌ ۽ سنڌي قوم جو عڪس نظر اچي ٿو، ڌرتي ڌڪاڻا ڪهاڻي ۾ علي بابا ورهاڱي جي درد سان گڏ سنڌين جو درد به بيان ڪيو آهي. علي بابا ڪراچي ڀائٽئي جي گهر ۾ ترسيل هو ته کيس دل جو دورو پيو ۽ هن 76 سالن جي ڄمار ۾ دم ڌڻي حوالي ڪيو. سنڌي ادبي سنگت علي بابا جي لاڏاڻي تي 3 ڏينهن سوڳ جو اعلان ڪيو آهي